ភ្នំពេញៈ ខុទ្ទកាល័យនាយករដ្ឋមន្ត្រីនៃប្រទេស កូរ៉េខាងត្បូង ត្រូវបានរំពឹងថានឹងដឹកនាំក្រុមការងារមកធ្វើទស្សនកិច្ចនៅកម្ពុជានៅពាក់កណ្តាលខែវិច្ឆិកានេះ ដើម្បីជួបជាមួយលោកនាយករដ្ឋមន្ត្រី ហ៊ុន សែន ទាក់ទងនឹងការដោះស្រាយទឹកប្រាក់ប្រមាណ ៦៧០ លានដុល្លារ របស់ធនាគារ Busan Savings Bank ក្នុងគម្រោងអភិវឌ្ឍន៍ក្រុងរណប Camko City។ នេះបើយោងតាមគេហទំព័រ www.mk.co.kr។
គេហទំព័រ www.mk.co.kr បានឲ្យដឹងថា លោក Yoo Dong-soo ជំនួយការអភិបាលនៃគណៈកម្មាធិការកិច្ចការរដ្ឋ និងជាសមាជិកនៃគណបក្សប្រជាធិបតេយ្យប្រទេសកូរ៉េខាងត្បូង (DPK) បានស្នើឲ្យខុទ្ទកាល័យនាយករដ្ឋមន្ត្រីដឹកនាំគណៈប្រតិភូ ដើម្បីធ្វើទស្សនកិច្ចមកកាន់ប្រទេស កម្ពុជា។
ដំណើរទស្សនកិច្ចនេះត្រូវរំពឹងថា ធ្វើឲ្យបានមុនកិច្ចប្រជុំកំពូលកូរ៉េ-អាស៊ាន ដែលនឹងរៀបចំឡើងនៅទីក្រុងប៊ូសាននៅចុងខែវិច្ឆិកានេះ។ កិច្ចប្រជុំនេះក៏នឹងមានរបៀបវារៈសម្រាប់កិច្ចប្រជុំកំពូលកូរ៉េ-កម្ពុជា ផងដែរ។
តាមផែនការគណៈប្រតិភូនេះអាចនឹងមានសមាសភាពចូលរួមពីមន្ត្រីជាន់ខ្ពស់ ដូចជាខុទ្ទកាល័យនាយករដ្ឋមន្ត្រីក្រសួងការបរទេស គណៈកម្មាធិការសេវាហិរញ្ញវត្ថុ អយ្យការនៃទីក្រុងប៊ូសាន។
លោក Yoo Dong-soo និងលោក Chun Jae-soo ដែលជាសមាជិកសភាមកពីគណបក្សប្រជាធិបតេយ្យនឹងអមដំណើរគណៈប្រតិភូនេះ។
មូលហេតុដែលសមាជិកសភាមកពីគណបក្សប្រជាធិបតេយ្យជំរុញឲ្យមានការឆ្លើយតបពីរដ្ឋាភិបាល គឺដើម្បីស្វែងរកដំណោះស្រាយនានា ដើម្បីជួយជនរងគ្រោះចំនួន ៣៨ ៨៩១ នាក់នៃធនាគារ Busan Savings Bank។
លោក ផៃ ស៊ីផាន អ្នកនាំពាក្យរបស់រាជរដ្ឋាភិបាលមិនអាចទាក់ទងបានទេកាលពីម្សិលមិញ។
គម្រោងអភិវឌ្ឍន៍ ខេមកូស៊ីធី បានចាប់ផ្តើមសាងសង់ដំបូងក្នុងឆ្នាំ ២០០៧ ដោយបានអភិវឌ្ឍគម្រោងជាច្រើនរួមមានផ្ទះវីឡា អគារខុនដូ ចំនួនជាង ៤០០ យូនីត និងហាងទំនិញជាដើម។
លោក គីម ហ៊ាង ប្រធានក្រុមហ៊ុនអចលនទ្រព្យ KW Cambodia បាននិយាយថា បើគម្រោងនេះត្រូវបានដោះស្រាយ វានឹងជួយធ្វើឲ្យវិស័យដីធ្លីនៅកម្ពុជា ពិសេសនៅតំបន់នៅមានសកម្មភាពឡើងវិញ។
លោកបន្តថា៖ «មិនត្រឹមតែគម្រោងនេះអាចបន្តសកម្មភាពឡើងវិញប៉ុណ្ណោះទេ តែវានឹងធ្វើឲ្យកេរ្តិ៍ឈ្មោះរបស់គម្រោងនេះរស់ឡើងវិញផងដែរ»។
បន្ទាប់ពីផ្អាកដំណើរការមួយរយៈ គម្រោងនេះក៏បានចាប់ផ្តើមសាងសង់បន្តជាច្រើនដង ដូចជាឆ្នាំ ២០១០ ឆ្នាំ ២០១២ និងឆ្នាំ ២០១៤។
ខេមកូស៊ីធី គឺជាគម្រោងអភិវឌ្ឍន៍ទីក្រុងរណប ១ ក្នុងចំណោមគម្រោងអភិវឌ្ឍន៍ទីក្រុងរណបចំនួន ៧ ក្នុងរាជធានីភ្នំពេញដែលរួមមាន ហ្គ្រេនភ្នំពេញ, ជ្រោយចង្វារ, កោះពេជ្រ, បឹងកក់, លីយ៉ុងផាត់ និង ING City។
កាលពីខែមុន គម្រោងអភិវឌ្ឍន៍ក្រុងរណបហ្គ្រេនភ្នំពេញក៏ទើបត្រូវបានលក់ទៅឲ្យក្រុមហ៊ុន ជីប ម៉ុងលែន ខូអិលធីឌី ដើម្បីអភិវឌ្ឍបន្ត៕ LA