.jpg)
ទិដ្ឋភាពការកម្សាន្តរបស់ប្រជាជននៅឆ្នេរសមុទ្រក្នុងខេត្តកែប នាពេលកន្លងមក។ ហុង មិនា
ភ្នំពេញៈ ក្រសួងទេសចរណ៍កំពុងរៀបចំផែនការអភិវឌ្ឍន៍ខេត្តកែបឱ្យក្លាយជាគោលដៅទេសចរណ៍ធម្មជាតិសម្រាកកម្សាន្តកម្រិតខ្ពស់នៅភាគនិរតី ខណៈក្រសួងកំពុងចងក្រងសេចក្តីព្រាងផែនការមេសម្រាប់ការអភិវឌ្ឍវិស័យទេសចរណ៍ខេត្តនេះ។
សេចក្តីព្រាងផែនការមេសម្រាប់អភិវឌ្ឍទេសចរណ៍ខេត្តកែបបានកំណត់អភិវឌ្ឍប៉ូលទេសចរណ៍ធំៗចំនួន ៤ និងគម្រោងអភិវឌ្ឍន៍ចំនួន ២៥១។
ការលើកឡើងនេះបានធ្វើឡើងក្នុងកិច្ចប្រជុំពិភាក្សាលើសេចក្តីព្រាងផែនការមេ ដឹកនាំដោយលោក ថោង ខុន រដ្ឋមន្ត្រីក្រសួងទេសចរណ៍កាលពីថ្ងៃទី ១៤ មករានៅក្រសួងទេសចរណ៍។
ក្នុងកិច្ចប្រជុំនេះលោក នី ផល្លី អនុរដ្ឋលេខាធិការក្រសួងទេសចរណ៍ និងជាប្រធានលេខាធិការដ្ឋាននៃគណៈកម្មការអន្តរក្រសួងបានឱ្យដឹងថា ប៉ូលអភិវឌ្ឍន៍ទេសចរណ៍ធំៗចំនួន ៤ រួមមាន អភិវឌ្ឍទីក្រុងកែបបច្ចុប្បន្ន តំបន់ឆ្នេរអង្កោល តំបន់ភ្នំវល្លិ និងតំបន់ប្រជុំកោះនៅក្នុងខេត្តនេះ។
លោក ផល្លី បានឱ្យដឹងថា នៅក្នុងផែនការមេនេះនឹងកែលម្អឆ្នេរកែបដែលមានស្រាប់បន្ថែមទៀត ព្រមទាំងកែលម្អឆ្នេរអង្កោល និងឆ្នេរថ្មីមួយទៀតឱ្យកាន់តែមានភាពទាក់ទាញឡើង។
លោកលើកឡើងថា៖ «ក្រៅពីកែលម្អតំបន់ឆ្នេរទាំង ៣ នេះក៏នៅមានគម្រោងអភិវឌ្ឍន៍ជាច្រើនទៀតដូចជា ការពង្រីកផលិតផលកីឡាទេសចរណ៍កម្រិតអន្តរជាតិ សារមន្ទីរសង្គ្រាមទេសចរណ៍ ការរៀបចំឱ្យមានដំណើរទៅទស្សនានៅតាមប្រជុំកោះទាំង ១៣ កោះនូវជីវចម្រុះសម្បូរបែប ដូចជា ផ្កាថ្ម ផ្សោតសមុទ្រ ជ្រូកទឹក មច្ឆជាតិ និងប្រភេទសត្វកម្រជាច្រើនទៀត»។
លោក ផល្លី បន្តថា ផែនការមេនេះក៏នឹងប្រែក្លាយតំបន់ស្រែអំបិលឱ្យទៅជាគោលដៅកសិទេសចរណ៍ស្រែអំបិលដោយបង្កើតជាសារៈមន្ទីរស្រែអំបិល ដើម្បីឱ្យភ្ញៀវទេសចរក្នុងស្រុក និងភ្ញៀវទេសចរអន្តរជាតិស្គាល់ពីចង្វាក់ផលិតកម្មអំបិលនៅកម្ពុជា។
លោកបន្ថែមថា៖ «យើងក៏នឹងបង្កើតឱ្យមានផ្សារទំនើបខ្នាតតូច ផ្សាររាត្រី វិថីម្ហូបអាហារ ហើយតភ្ជាប់ទេសចរណ៍តាមផ្លូវទឹកពីកំពង់ផែទេសចរណ៍អន្តរជាតិនៅខេត្តកំពត មកខេត្តកែប ព្រមទាំងបង្កើតពិធីបុណ្យ និងព្រឹត្តិការណ៍ទេសចរណ៍នានាជាដើម»។
គណៈកម្មការអន្តរក្រសួងក៏បានបញ្ជូនយុទ្ធសាស្ត្រគោលចំនួន ៩ នៅក្នុងឯកសារព្រាងផែនការមេសម្រាប់ការអភិវឌ្ឍវិស័យទេសចរណ៍ខេត្តនេះ។ នេះបើតាមលោក ផល្លី។
យុទ្ធសាស្ត្រទាំងនោះរួមមាន យុទ្ធសាស្ត្រអភិវឌ្ឍន៍ប៉ូលទេសចរណ៍ខេត្តកែប វិនិយោគ និងអភិវឌ្ឍន៍របៀងទេសចរណ៍ ពង្រឹងគុណភាព និងសុវត្ថិភាពទេសចរណ៍ អភិវឌ្ឍន៍ធនធានមនុស្សក្នុងវិស័យទេសចរណ៍ ទីផ្សារ និងផ្សព្វផ្សាយទេសចរណ៍ ព្រមទាំងយុទ្ធសាស្ត្រគ្រប់គ្រង និងគាំទ្រដល់ការអភិវឌ្ឍវិស័យទេសចរណ៍ ពង្រឹងចង្វាក់ផលិតកម្មក្នុងវិស័យទេសចរណ៍ អភិវឌ្ឍនវានុវត្តន៍នៃវិស័យទេសចរណ៍ និង ពង្រឹងអភិបាលកិច្ច ត្រួតពិនិត្យ និងវាយតម្លៃសម្រាប់ការអភិវឌ្ឍវិស័យទេសចរណ៍ខេត្តកែប។
លោករដ្ឋមន្ត្រី ថោង ខុន បានថ្លែងថា ការរៀបចំផែនការមេត្រូវបានធ្វើឡើងក្នុងគោលបំណងសម្រាប់ការអភិវឌ្ឍវិស័យទេសចរណ៍ខេត្តកែបឱ្យក្លាយជាគោលដៅទេសចរណ៍ធម្មជាតិសម្រាកកម្សាន្តបែបប្រណីតកម្រិតខ្ពស់ដែលផ្តោតលើភាពទាក់ទាញ ភាពប្រកួតប្រជែងក្នុងតំបន់ និងពិភពលោក។
លោកថ្លែងថា៖ «ផែនការមេសម្រាប់ការអភិវឌ្ឍវិស័យទេសចរណ៍ខេត្តកែប គឺជាឯកសារយុទ្ធសាស្ត្រដ៏មានសារៈសំខាន់ដែលអាចជួយស្តារ និងលើកស្ទួយវិស័យទេសចរណ៍ខេត្តកែបទាំងក្នុងដំណាក់កាលវិបត្តិកូវីដ១៩ ក៏ដូចជាក្នុងដំណាក់កាលក្រោយកូវីដ១៩»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានឱ្យដឹងថា ខេត្តកែបគឺជាតំបន់សក្តានុពលទេសចរណ៍ជាប់មាត់សមុទ្ររបស់កម្ពុជា។ ការអភិវឌ្ឍខេត្តនេះបន្ថែមទៀតនឹងក្លាយជាផលិតផលទេសចរណ៍ថ្មីមួយទៀតកាន់តែមានភាពទាក់ទាញភ្ញៀវទេសចរជាតិ និងអន្តរជាតិ។
លោកស្រីបានឱ្យដឹងថា៖ «ខេត្តកែបជាតំបន់ទេសចរណ៍ធម្មជាតិសម្បូរបែប មានស្ទឹងព្រែក ម្ហូបអាហារពីគ្រឿងសមុទ្រ ស្រែអំបិល ភ្នំ។ ខ្ញុំជឿថា វាមានសក្តានុពលខ្ពស់ក្នុងការទាក់ទាញភ្ញៀវទេសចរឱ្យទៅកម្សាន្តនៅទីនោះ។
លោកស្រីបញ្ជាក់ថា៖ «ខ្ញុំស្វាគមន៍ចំពោះការរៀបចំផែនការអភិវឌ្ឍន៍នេះ ដែលនឹងរួមចំណែកលើកកម្ពស់វិស័យទេសចរណ៍នៅកម្ពុជាពេលអនាគត។ យើងនៅមិនទាន់ប្រើប្រាស់ខេត្តនេះឱ្យអស់សក្តានុពលទេ។ ប្រសិនបើមានការអភិវឌ្ឍបន្ថែមទៀតនឹងទាក់ទាញភ្ញៀវទេសចរមកស្នាក់នៅទីនេះកាន់រយៈពេលយូរជាងមុន»។
បើតាមក្រសួងទេសចរណ៍ អង្គប្រជុំបានឯកភាពនឹងបន្តកិច្ចប្រជុំលើសេចក្ដីព្រាងផែនការមេនេះទៀតនៅខែមីនា មុននឹងដាក់ឆ្លងទៅគណៈកម្មាធិការជាតិអភិវឌ្ឍន៍វិស័យទេសចរណ៍៕ LA
