.jpg)
អតិថិជនដែលមកទទួលសេវាហិរញ្ញវត្ថុនៅគ្រឹះស្ថានមីក្រូហិរញ្ញវត្ថុប្រាសាក់នៅសាខា អង់ស្នួល ខេត្តកណ្តាល នាពេលកន្លងមក។ ហុង មិនា
ភ្នំពេញៈ កំណើននៅក្នុងវិស័យមីក្រូហិរញ្ញវត្ថុឆ្នាំ ២០២០ នេះត្រូវបានព្យាករថា នឹងធ្លាក់ចុះបើធៀបនឹងឆ្នាំ ២០១៩ ដោយសារការព្យាករពីការធ្លាក់ចុះកំណើនសេដ្ឋកិច្ច បញ្ហាវីរុស កូរ៉ូណា និងបញ្ហា EBA ។ នេះបើតាមប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា។
នៅក្នុងសន្និបាតលើកទី ១៤ របស់សមាគមមីក្រូហិរញ្ញវត្ថុកម្ពុជាកាលពីថ្ងៃសុក្រ លោក គា បូរាណ ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជាបាននិយាយថា ខណៈស្ថាប័នជាតិ និងអន្តរជាតិធំៗបានព្យាករថា កំណើនសេដ្ឋកិច្ចកម្ពុជាឆ្នាំ ២០២០ នេះអាចនឹងធ្លាក់ចុះពី ៧ ភាគរយពីឆ្នាំ ២០១៩ មកនៅក្នុងរង្វង់ ៦ ភាគរយ ដោយសារបញ្ហាដែលកំពុងកើតឡើងក្នុងពិភពលោក វិស័យមីក្រូហិរញ្ញវត្ថុកម្ពុជាអាចនឹងមានកំណើនទាប។
លោកថ្លែងថា៖ «ជាធម្មតាប្រសិនបើកំណើន GDP (ផលិតផលក្នុងស្រុកដុល) ប្រទេស កម្ពុជា មានការថមថយចុះ ខ្ញុំគិតថាវានឹងមានផលប៉ះពាល់ខ្លះដោយសារតែយើងជាអ្នកដាក់ទុនចូលទៅក្នុងវិស័យសេដ្ឋកិច្ច ដូច្នេះបើកំណើនសេដ្ឋកិច្ចថមថយ តម្រូវការទុនក៏វានឹងថមថយដែរ»។
ទោះយ៉ាងណាលោក បូរាណ បញ្ជាក់ថាដោយសារគ្រឹះស្ថានមីក្រូហិរញ្ញវត្ថុធ្វើការភាគច្រើនតែនៅក្នុងវិស័យកសិកម្ម ពាណិជ្ជកម្ម និងផលិតកម្ម ខ្នាតតូច ដូច្នេះផលប៉ះពាល់នឹងមិនមានទំហំធំទេ។
លោកលើកឡើងថាក្នុងឆ្នាំ ២០១៩ វិស័យហិរញ្ញវត្ថុនៅកម្ពុជាបានបង្ហាញពីភាពល្អប្រសើរជាបន្តបន្ទាប់បើទោះបីបានជួបបញ្ហាក្នុងការផ្តល់ឥណទានមួយចំនួនកាលពីដើមឆ្នាំ ដោយសារបញ្ហាអាកាសធាតុរាំងស្ងួតក៏ដោយ។
បើតាមលោក បូរាណ ផលបត្រឥណទានក្នុងឆ្នាំ ២០១៩ បានកើនឡើងក្នុងរង្វង់ ៣០ ភាគរយ ចំណែកចំនួនប្រាក់សន្សំក៏បានកើនឡើងផងដែរ ខណៈឥណទានមិនដំណើរការបានស្ថិតក្នុងរង្វង់ប្រហែល ១ ភាគរយ។
សេចក្ដីប្រកាសព័ត៌មានរបស់សមាគមមីក្រូហិរញ្ញវត្ថុកម្ពុជាបានឲ្យដឹងថា គិតត្រឹមខែកញ្ញា ឆ្នាំ ២០១៩ វិស័យមីក្រូហិរញ្ញវត្ថុកម្ពុជាបានផ្តល់ឥណទានចំនួនប្រហែល ៧ ពាន់លានដុល្លារដល់អតិថិជនជាង ២ លាននាក់ ខណៈអ្នកសន្សំមានចំនួនជិត ៣ លាននាក់ដោយមានទឹកប្រាក់ជិត ៤ ពាន់លានដុល្លារ។
សមាគមមីក្រូហិរញ្ញវត្ថុកម្ពុជាបានបន្ថែមទៀតថា វិស័យហិរញ្ញវត្ថុនៅកម្ពុជាមានការផ្លាស់ប្តូរគួរឲ្យកត់សម្គាល់ក្នុងរយៈពេល ១០ ឆ្នាំចុងក្រោយនេះ។
ដើម្បីជួយដល់អតិថិជនដែលប្រើប្រាស់សេវាពីគ្រឹះស្ថានមីក្រូហិរញ្ញវត្ថុ និងជួយកាត់បន្ថយការជាប់បំណុលវ័ណ្ឌករបស់អតិថិជន ធនាគារជាតិនៃកម្ពុជា (NBC) កាលពីខែមេសា ឆ្នាំ ២០១៧ បានសម្រេចកំណត់ពិតានអត្រាការប្រាក់សម្រាប់ការផ្តល់ឥណទានត្រឹម ១៨ ភាគរយ ក្នុង ១ ឆ្នាំ ខណៈកាលពីមុនមានការកំណត់នេះ អត្រាការប្រាក់របស់ស្ថាប័នមីក្រូហិរញ្ញវត្ថុខ្លះមានដល់ជិត ៥០ ភាគរយ។
ទិន្នន័យរបស់ធនាគារជាតិនៃកម្ពុជា (NBC) បានឲ្យដឹងថា អត្រាការប្រាក់បញ្ញើជារៀល និងដុល្លាររបស់គ្រឹះស្ថានមីក្រូហិរញ្ញវត្ថុនៅកម្ពុជាក្នុងឆ្នាំ ២០១៩ មានភាពប្រហាក់ប្រហែលនឹងឆ្នាំមុន ដោយមានកម្រិតប្រែប្រួលតិចតួចក្នុងអត្រាជាមធ្យម ៨ ភាគរយ និង ៧,៨ ភាគរយរៀងគ្នា។ ទន្ទឹមនឹងនេះអត្រាការប្រាក់ឥណទានជារៀល និងដុល្លារមានការថយចុះមកត្រឹម ១៥ ភាគរយ និង ១៦ ភាគរយ។ គិតត្រឹមត្រីមាសទី ២ ឆ្នាំ ២០១៩ នៅកម្ពុជាមានធនាគារពាណិជ្ជកម្មចំនួន ៤៥ ធនាគារឯកទេស ១៥ គ្រឹះស្ថានទទួលប្រាក់បញ្ញើមីក្រូហិរញ្ញវត្ថុ ៧ គ្រឹះស្ថានមីក្រូហិរញ្ញវត្ថុ ៧៤ ប្រតិបត្តិករឥណទានជនបទ ២៥៤ ក្រុមហ៊ុនជួល ១៥ និងក្រុមហ៊ុនផ្ដល់សេវាទូទាត់ ១៦។ នេះបើតាមធនាគារជាតិនៃកម្ពុជា៕
