ភ្នំពេញ: ការកើនឡើងនៃខ្សែចង្វាក់ផលិតកម្មចំណីសត្វនៅក្នុងស្រុកបានធ្វើឲ្យការនាំចេញពោតក្រហមសម្រាប់ផលិតចំណីសត្វធា្លក់ចុះយ៉ាងគំហុកក្នុងរយៈពេល ២-៣ ឆ្នាំចុងក្រោយនេះ។ នេះបើយោងតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ការនាំចេញពោតក្រហមសម្រាប់ផលិតជាចំណីសត្វពីកម្ពុជាទៅកាន់ទីផ្សារអន្តរជាតិបានធ្លាក់ចុះជាបន្តបន្ទាប់ ខណៈការផលិតពោតក្រហមសម្រាប់ផលិតចំណីសត្វក្នុងស្រុកបានកើនឡើងក្នុងរយៈពេល ៣ ឆ្នាំចុងក្រោយនេះ។
លោកបានបន្តថា ការនាំចេញពោតក្រហមសម្រេចបាន ៣៥ ៦៣៦ តោនក្នុងរយៈពេល ៥ ខែដើមឆ្នាំ ២០២០ ធ្លាក់ចុះ ២៩,៦៨ ភាគរយធៀបនឹងរយៈពេលដូចគ្នាកាលពីឆ្នាំមុនដែលមានចំនួន ៥០ ៦៧៩ តោន។ ដោយឡែកកាលពីឆ្នាំ ២០១៨ ការនាំចេញពោតសម្រេចបាន ២០៤ ១៨៤ តោន ខណៈឆ្នាំ ២០១៩ បាននាំចេញចំនួន ១១៩ ៩៩៣ តោន។
លោកបានបន្ថែមថា បើទោះបីការនាំចេញពោតក្រហមសម្រាប់ផលិតចំណីសត្វធ្លាក់ចុះ ក៏ការដាំពោតក្រហមរបស់កសិករកម្ពុជាមានការកើនឡើងជាបន្តបន្ទាប់ក្នុងរយៈពេល ៤ ឆ្នាំចុងក្រោយនេះ។ ជាក់ស្តែងការផលិតពោតក្រហមរបស់កសិករសម្រេចបានជាង ១,១១ លានតោន កាលពីឆ្នាំ ២០១៩ កើនឡើងពីចំនួន ៣៣៣ ០៥៨ តោនកាលពីឆ្នាំ ២០១៦។
លោកថ្លែងថា៖ «លទ្ធផលខាងលើនេះគឺបានបង្ហាញនូវមោទនភាពជាតិ និងជាការពេញចិត្តសម្រាប់ប្រជាជន និងរាជរដ្ឋាភិបាល បើទោះបីតួលេខនាំចេញពោតក្រហមមានការថយចុះក្នុងអំឡុងរយៈពេលនេះ ព្រោះប្រាកដណាស់ថា បរិមាណពោតក្រហមដែលសល់ពីការនាំចេញយ៉ាងច្រើនសន្ធឹកសន្ធាប់បានដឹកចូលទៅកាន់រោងចក្រកែច្នៃចំណីសត្វក្នុងស្រុក»។
លោកបន្តថា៖ «លទ្ធផលនេះស្របទៅតាមគោលនយោបាយរបស់ប្រមុខរាជរដ្ឋាភិបាលកម្ពុជាក្នុងការជំរុញការកែច្នៃផលិតផលកសិកម្ម និងបង្កើនការចិញ្ចឹមសត្វក្នុងស្រុក រួមទាំងការអនុវត្តគោលនយោបាយរបស់កម្ពុជាក្នុងការដំឡើងពន្ធនាំចូលពោតក្រហមពីខាងក្រៅមកកែច្នៃនៅកម្ពុជា»។
យោងតាមទិន្នន័យក្រសួងកសិកម្ម ខេត្តត្បូងឃ្មុំ ជាកន្លែងដែលមានដាំដុះពោតក្រហមសម្រាប់ផ្គត់ផ្គង់រោងចក្រផលិតចំណីសត្វក្នុងស្រុកច្រើនជាងគេ ដោយមានសមត្ថភាពផលិត ៥៦ ៧៥០ តោន ក្នុង ១ ឆ្នាំ នៅលើផ្ទៃដីដាំដុះសរុប ១០ ៧៩០ ហិកតា។ បច្ចុប្បន្នខេត្តនេះមានឡសម្ងួតពោតចំនួន ៧ ដែលឡ ១ មានសមត្ថភាពសម្ងួតចន្លោះពី ១ ៥០០ តោន ទៅ ៣ ០០០ តោនក្នុង ១ ឆ្នាំ។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍កាលពីថ្ងៃចន្ទថា បច្ចុប្បន្នរោងចក្រផលិតចំណីសត្វមានចំនួន ១៨ កំពុងប្រតិបត្តិការនៅកម្ពុជា និងរោងចក្រចំនួន ១ កំពុងដំណើរការសាងសង់ដែលជិតរួចរាល់ហើយ។ រោងចក្រទាំងនេះមានសមត្ថភាពផលិតចំណីសត្វបានជាង ១,២ លានតោន ក្នុង ១ ឆ្នាំ ស្មើនឹង ៥៦ ភាគរយនៃការផ្គត់ផ្គង់ទូទាំងប្រទេស។
លោកបានបន្តថា ទន្ទឹមនឹងនេះការចិញ្ចឹមសត្វរបស់ប្រជាកសិករក៏កំពុងមាននិន្នាការកើនឡើងខ្លាំងតាមរយៈការនាំចូលពូជជ្រូកពីក្រៅប្រទេសដែលកើនឡើងជាង ៤ ដងបើធៀបនឹងឆ្នាំមុន។ កម្ពុជាបាននាំចូលកូនជ្រូកពូជចំនួន ៨៨ ០០០ ក្បាល ក្នុងរយៈពេល ៥ ខែដើមឆ្នាំ ២០២០ នេះ ខណៈកាលពីឆ្នាំមុនមានចំនួន ២២ ០០០ ក្បាល។ ចំណែកការនាំចូលមេជ្រូកពូជអំឡុងពេលនេះសម្រេចបាន ១៤ ១៦៩ ក្បាល ខណៈឆ្នាំមុនមានត្រឹម ៧ ៨៥០ ក្បាលប៉ុណ្ណោះ។
លោកថ្លែងថា៖ «ក្រោយពីក្រសួងកសិកម្មបានអនុវត្តតាមអនុសាសន៍របស់ប្រមុខរាជរដ្ឋាភិបាលពាក់ព័ន្ធនឹងការកាត់បន្ថយការនាំចូលជ្រូក យើងឃើញថា កសិករមានជំនឿទុកចិត្តលើចំណាត់ការរបស់ក្រសួងកសិកម្ម ហើយពួកគាត់ចាប់ផ្តើមចិញ្ចឹមសត្វឡើងវិញ»៕ LA