.jpg)
អ្នកបច្ចេកទេសកំពុងភ្ជាប់ខ្សែបញ្ជូនអគ្គិសនីក្នុងរាជធានីភ្នំពេញ។ ហេង ជីវ័ន
ភ្នំពេញៈ អាជ្ញាធរអគ្គិសនីកម្ពុជាបានអះអាងថា ប្រទេសកម្ពុជា មិនបានប្រឈមកង្វះថាមពលអគ្គិសនីនៅក្នុងរដូវប្រាំងឆ្នាំ ២០២០ នេះទេ ព្រោះតម្រូវការប្រើប្រាស់បានថយចុះដោយសារការរាតត្បាតជំងឺកូវីដ ១៩ ដែលបណ្តាលឲ្យរោងចក្រនៅក្នុងវិស័យឧស្សាហកម្មកាត់ដេរ និងបដិសណ្ឋារកិច្ចមួយចំនួនបិទដំណើរការ។
លោក តេង សុខុមាល នាយកប្រតិបត្ដិអាជ្ញាធរអគ្គិសនីកម្ពុជា (EAC) បានថ្លែងក្នុងសិក្ខាសាលាផ្សព្វផ្សាយស្តីពីការអនុគ្រោះ និងលើកទឹកចិត្ដចំពោះការបង់ថ្លៃអគ្គិសនីក្នុងវិស័យឧស្សាហកម្ម និងកសិកម្ម ពាណិជ្ជកម្ម និងសេវាកម្មកាលពីថ្ងៃចន្ទថា កំណើនតម្រូវការថាមពលអគ្គិសនីនៅក្នុងឆ្នាំនេះមិនបានកើនឡើងគួរឲ្យកត់សម្គាល់ទេ ដោយសារចង្វាក់ផលិតកម្មមួយចំនួននៅក្នុងវិស័យវាយនភណ្ឌកាត់ដេរ និងទេសចរណ៍ថយចុះ បន្ទាប់ពីមានការព្យួរការងារបណ្តាលមកពីវិបត្តិជំងឺកូវីដ ១៩។
លោកព្យាករថា កំណើនតម្រូវការថាមពលអគ្គិសនីឆ្នាំនេះនឹងធ្លាក់មកនៅត្រឹម ២០ ភាគរយ ខណៈឆ្នាំមុនៗកំណើនជាមធ្យម ៣០ ភាគរយ។
លោកថ្លែងថា៖ «ធម្មតាពីមួយឆ្នាំទៅមួយឆ្នាំ កំណើនថាមពល និងតម្រូវការមានការកើនឡើង ប៉ុន្ដែនៅឆ្នាំនេះ វាមិនមានការកើនឡើងច្រើនដូចឆ្នាំមុនៗទេ ដោយសារវិបត្តិកូវីដ១៩ បានធ្វើឲ្យការផលិតរបស់រោងចក្រមួយចំនួនមានការថយចុះ»។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពល ក្រសួងរ៉ែ និងថាមពលបានប្រាប់ភ្នំពេញប៉ុស្តិ៍ថា កម្ពុជាមានតម្រូវការថាមពលអគ្គិសនីជាមធ្យមជាង ២ ០០០ មេហ្គាវ៉ាត់ ក្នុង ១ ឆ្នាំ ប៉ុន្តែតម្រូវការថាមពលអគ្គិសនីអាចនឹងធ្លាក់មកត្រឹម ១ ៨០០ មេហ្គាវ៉ាត់នៅឆ្នាំនេះ។
លោកថ្លែងថា៖ «ជាគោលការណ៍នៅពេលតម្រូវការធ្លាក់ចុះ យើងនឹងកាត់បន្ថយបរិមាណនាំចូលមកពីប្រទេសជិតខាង។ ឧទាហរណ៍យើងត្រូវការ ១០០ មេហ្គាវ៉ាត់ យើងអាចយកតែ ៥០ មេហ្គាវ៉ាត់វិញ ព្រោះតម្រូវការយើងមានការប្រែប្រួល តែប្រភពអគ្គិសនីក្នុងស្រុកយើងនៅរក្សាបរិមាណដដែល»។
យោងតាមសមាគមរោងចក្រកាត់ដេរនៅកម្ពុជា (GMAC) រោងចក្រចំនួន ២៥០ ត្រូវបានប្រកាសព្យួរការងារ ដោយសារការរាតត្បាតជំងឺកូវីដ។
អ្នកស្រី ម៉ៅ សុធា អ្នកគ្រប់គ្រងផ្នែកលក់ក្រុមហ៊ុន Kirirom Food Product Co., Ltd ដែលជារោងចក្រកែច្នៃផលិតផលពីផ្លែស្វាយបាននិយាយថា ទោះជាបច្ចុប្បន្នក្រុមហ៊ុនកំពុងកាត់បន្ថយចង្វាក់ផលិតកម្មដោយសារផុតរដូវប្រមូលផលស្វាយក៏ដោយ តែរោងចក្រនៅតែត្រូវការនិរន្តរភាពថាមពលដើម្បីរក្សាគុណភាពដំណាប់ស្វាយដដែល។
អ្នកស្រីបន្តថា សព្វថ្ងៃក្រុមហ៊ុនប្រឈមនឹងបញ្ហាដាច់ចរន្តអគ្គិសនីជាញឹកញាប់ដែលនឹងធ្វើឲ្យប៉ះពាល់ដល់ចង្វាក់ផលិតកម្ម។ អ្នកស្រីថ្លែងថា៖ «សព្វថ្ងៃនៅរោងចក្រខ្ញុំដាច់ភ្លើងជាញឹកញាប់ធ្វើឲ្យសម្ភាររបស់រោងចក្រខូចជាញឹកញាប់»។
អ្នកស្រីបន្តថា ជាមធ្យមក្រុមហ៊ុនត្រូវចំណាយជាង ១ ០០០ ដុល្លារ ក្នុង ១ ខែសម្រាប់ទិញប្រេងដើម្បីបញ្ឆេះម៉ាស៊ីនភ្លើងនៅពេលដាច់ចរន្តអគ្គិសនីម្តងៗ។
បុគ្គលិកនៅសណ្ឋាគារ Angkor Vattanak Pheap Hotel ដែលស្ថិតនៅក្នុងក្រុងសៀមរាបបានប្រាប់ថា ការរាតត្បាតជំងឺកូវីដ ១៩ បានធ្វើឲ្យប៉ះពាល់វិស័យបដិសណ្ឋារកិច្ចយ៉ាងខ្លាំងនៅក្នុងខេត្តសៀមរាប។ លោកបន្តថា សណ្ឋាគាររបស់លោកមានបន្ទប់ចំនួន ៤០ ប៉ុន្តែបើកទទួលភ្ញៀវត្រឹម ១០ ប៉ុណ្ណោះ ដោយសារគ្មានលទ្ធភាពបង់ថ្លៃអគ្គិសនី។
លោកនិយាយថា៖ «សព្វថ្ងៃយើងបើកមិនដល់ ១០ បន្ទប់ផងនៅជាន់ផ្ទាល់ដី។ ប្រសិនបើបើកច្រើនបន្ទប់អត់មានលទ្ធភាពបង់ថ្លៃភ្លើង និងប្រាក់ខែបុគ្គលិកទេ»៕
វីដេអូ៖
