The Phnom Penh Post Search

Search form

Logo of Phnom Penh Post newspaper Phnom Penh Post - កំ​ណើន​ថ្លៃ​ស្នាក់​នៅ​ អាច​រា​រាំង​ភ្ញៀ​វ​​ក្នុង​​ស្រុក​​ទៅ​ខេត្តព្រះ​សី​ហ​នុ

កំ​ណើន​ថ្លៃ​ស្នាក់​នៅ​ អាច​រា​រាំង​ភ្ញៀ​វ​​ក្នុង​​ស្រុក​​ទៅ​ខេត្តព្រះ​សី​ហ​នុ

Content image - Phnom Penh Post
ទិដ្ឋភាព​នៅ​រង្វង់មូល​តោ២ ក្នុងក្រុង​ព្រះសីហនុ​កាលពី​ដើម​ខែ​កញ្ញា។ រូបថត ហេង ជីវ័ន

កំ​ណើន​ថ្លៃ​ស្នាក់​នៅ​ អាច​រា​រាំង​ភ្ញៀ​វ​​ក្នុង​​ស្រុក​​ទៅ​ខេត្តព្រះ​សី​ហ​នុ

ភ្នំពេញៈ ការ​កើន​ឡើ​ង​នៃ​តម្លៃ​ស្នាក់​នៅ​ក្នុង​ក្រុងព្រះ​សី​ហនុ ​ដោយ​សារ​តែ​លំ​ហូរ​យ៉ាង​គំ​ហុក​នៃ​ជន​ជាតិ​​ចិន​ អាច​នឹង​រា​រាំង​ដល់​ភ្ញៀវ​ទេស​ចរ​ក្នុង​ស្រុក​​​​​ក្នុង​ការ​ទៅ​កម្សាន្ត​នា​ពេល​​ខាង​មុខ ​ដោយ​សារ​​ការ​ ចំ​ណាយ​កាន់​តែ​ខ្ពស់​បើ​ធៀប​នឹង​រយៈ​ពេល​​ប៉ុន្មាន​ឆ្នាំ​មុន​។

ទី​ក្រុងព្រះ​សី​ហ​នុ ​ដែល​បាន​ក្លាយ​ទៅ​ជា​បេះ​ដូង​នៃ​ការ​វិនិ​យោគ​របស់​ចិន​ ដែល​រួម​មាន​រោង​ចក្រ​ផលិត ​វិ​ស័យ​ទេស​ចរណ៍ ​និង​កា​ស៊ី​ណូ ​កំ​ពុង​ជំ​រុញ​ឲ្យ​តម្លៃ​នៃ​ការ​ចំ​ណាយ​កាន់​តែ​ខ្ពស់​ រួម​មាន​ការ​ស្នាក់​នៅ​ និង​ថ្លៃ​ម្ហូប​អា​ហារ​​ ខណៈ​បន្ទប់​ និង​ភោជ​នីយ​ដ្ឋាន​​ភាគ​ច្រើ​ន​បំ​ផុត​ត្រូវ​បាន​ជួល​ឲ្យ​ចិន​។

បុគ្គ​លិក​ផ្នែក​ទទួល​ភ្ញៀវ​ម្នាក់​នៃ​សណ្ឋា​គារ ​ខ្សាច់​មាស ​សុំ​មិន​បញ្ចេញ​ឈ្មោះ​បាន​ឲ្យ​ដឹង​ថា ​ចាប់​តាំង​ពី​សណ្ឋា​គារ​នេះ​​ត្រូវ​បាន​ជួល​ឲ្យ​វិនិ​យោ​គិន​​ចិន​ ចំនួន​ភ្ញៀវ​ក្នុង​ស្រុក​បាន​ធ្លាក់​ចុះ​​​ជាង ​៥០ ​ភាគ​រយ​បើ​ធៀប​នឹង​​ឆ្នាំ​មុន​ ខណៈ​តម្លៃ​បាន​កើន​ឡើង​តិច​តួច​ដោយ​សារ​តែ​តម្លៃ​វា​ខ្ពស់​ស្រាប់​ទៅ​ហើយ​។ ​លោក​បញ្ជាក់​ថា ​ការ​ធ្លាក់​ចុះ​នេះ​អាច​មិន​មែន​ដោយ​សារ​តែ​តម្លៃ​ទេ ​ប៉ុន្តែ​ដោយ​សារ​តែ​សណ្ឋា​គារ​នេះ​​ពោរ​ពេញ​ដោយ​ភ្ញៀវ​ចិន​។​

បុគ្គ​លិក​ខាង​លើ​​អះ​អាង​ថា៖​ «​ខ្ញុំ​គិត​ថា​ ចំ​នួន​ភ្ញៀវ​ក្នុង​ស្រុក​មក​លេង​ក្រុង​ព្រះ​សី​ហ​នុ​​ធ្លាក់​ចុះ​អាច​បណ្តាល​មក​ពី​ពួក​គាត់​មិន​ចូល​ចិត្ត​ភាព​រញ៉េ​រញ៉ៃ​របស់​​ជន​ជាតិ​ចិន។ មាន​ភ្ញៀវ​ក្នុង​ស្រុក​​ខ្លះ​គាត់​បាន​យល់​ព្រម​​ចំ​ពោះ​តម្លៃ​​បន្ទប់​​​ ​ហើយ​តែ​​​​នៅ​ពេល​​​ចូល​ដល់​បន្ទប់​​គាត់​ក៏​​ចេញ​ទៅ​វិញ​ដោយ​​និ​យាយ​ថា​ មាន​ក្លិន​​បារី​​នៅ​​ជាប់​ក្នុង​បន្ទប់​​»​។

សណ្ឋា​គារ ​ខ្សាច់​មាស ​ដែល​ស្ថិត​នៅ​​ជិត​រង្វង់​មូល​តោ​​​ ២ ពី​មុន​មាន​ម្ចាស់​​ជា​ជន​ជាតិ​ខ្មែរ បច្ចុប្បន្ន​ត្រូវ​បាន​ជួល​បន្ត​ដោយ​ជន​ជាតិ​ចិន​។

របាយ​ការណ៍​​របស់​មន្ទីរ​ទេស​ចរណ៍​​ខេត្ត​ព្រះ​សី​ហ​នុ​ ដែល​ភ្នំ​ពេញ​ប៉ុស្តិ៍​ទទួល​បាន​កាល​ពី​ម្សិល​មិញ​បង្ហាញ​ថា ក្នុង​​ឆ​មាស​ទី ១ ឆ្នាំ​ ២០១៨​ ខេត្ត​ព្រះ​សី​ហ​នុ​ទទួល​បាន​ភ្ញៀវ​ទេស​ចរ​សរុប​ជាង ១,៣ លាន​​នាក់​ កើន​ឡើង​ជាង​ ១០ ​ភាគ​រយ បើ​ធៀប​​​នឹង​រយៈ​ពេល​ដូច​គ្នា​ក្នុង​ឆ្នាំ​ ២០១៧។

របាយ​ការណ៍​បាន​​បង្ហាញ​ថា ​​ភ្ញៀវ​ទេស​ចរ​​ក្នុង​ស្រុក​ មាន​ជាង​ ១ លាន​​​នាក់​ កើន​ឡើង ៨,១០ ភាគ​​រយ​ ខណៈ​​ភ្ញៀវ​ទេស​ចរ​បរ​ទេស​មាន​ជាង ២៩០-៧៨២ ​នាក់ កើន​​​ ១៧,៧៨ ​ភាគ​រយ​។

ក្នុង​ចំ​ណោម​ទេស​ចរ​បរ​ទេស ភ្ញៀវ​ចិន​​មាន​ចំនួន ៨៤ ៦៦៤ នាក់​ កើន​ឡើង ៤៣​,៦៣ ​ភាគ​រយ ​ខណៈ​អ្នក​ទេស​ចរ​មក​ពី​ប្រទេស វៀត​ណាម ​ស្ថិត​នៅ​ចំ​ណាត់​ថ្នាក់​លេខ ២ មាន​ចំនួន ២០ ០២០ ​នាក់ ​កើន​ឡើង ៣,៣​៥ ​ភាគ​រយ។ ចំ​ណែក​ភ្ញៀវ​​ទេស​ចរ​ពី​តំ​បន់​អឺ​រ៉ុប​ និង​អា​មេ​រិក​ បាន​ធ្លាក់​ចុះ​ស្ទើរ​គ្រប់​ប្រ​ទេស​។ ​នេះ​បើ​តាម​របាយ​ការណ៍​។​

Content image - Phnom Penh Post

លោក ​ហាង​ រ៉េត អ្នក​​គ្រប់​គ្រង​ផ្ទះ​សំ​ណាក់ The Moonflower Bungalows ដែល​ស្ថិត​នៅ​ឆ្នេរ​អូរ​ត្រេះ​ ក្រុង​ព្រះ​សី​ហ​នុ​ ដែល​មិន​ទាន់​មាន​ចិន​ច្រើន​​ទៅ​ដល់​នៅ​ឡើយ​នោះ​បាន​​និ​យាយ​ថា​ ការ​កើន​ឡើង​នៃ​​ចំនួន​ភ្ញៀវ​ជន​ជាតិ​ចិន​​បាន​ធ្វើ​​ឲ្យ​ផ្ទះ​សំ​ណាក់​របស់​លោក​ដែល​ធ្លាប់​​ជា​​​កន្លែង​ដ៏​ពេញ​និ​យម​របស់​​​​ភ្ញៀវ​ទេស​ចរ​​ពី​តំបន់​អឺ​រ៉ុប​នោះ​​បាត់​បង់​ភ្ញៀវ​​​ស្ទើរ​ទាំង​ស្រុង​។

ទោះ​បី​យ៉ាង​នេះ​ក្តី​លោក​កត់​សម្គាល់​ឃើញ​ថា ​ឆ្នេរ​អូរ​ត្រះ​ហាក់​​កំពុង​ក្លាយ​ជា​​កន្លែង​ទាក់​ទាញ​ទេស​ចរ​ក្នុង​ស្រុក​។ ​​លោក​ថ្លែង​ថា៖​ «​ជា​រួម​នៅ​ពេល​នេះ​កន្លែង​ខ្ញុំ​ទទួល​បាន​ភ្ញៀវ​ទេស​ចរ​​ក្នុង​ស្រុក​ខ្លះ ​ខណៈ​ពី​មុន​ស្ទើរ​​តែ​មិន​មាន​សោះ​​។ ការ​ទទួល​​បាន​ភ្ញៀវ​ទេស​ចរ​ក្នុង​ស្រុក ​ដោយ​សារ​​ពួក​គេ​ពិ​បាក​រក​កន្លែង​ស្នាក់​នៅ​កណ្តាល​ក្រុង​ដូច​ពេល​​​មុន​»។

លោក​បញ្ជាក់​ថា៖​ «ការ​អត់​ជម្រើស​ដោយ​សារ​កន្លែង​ស្នាក់​នៅ​កណ្តាល​ក្រុង​មាន​តម្លៃ​ខ្ពស់​ គឺ​ជា​​កម្លាំង​​​ដែល​ជំ​រុញ​ឲ្យ​ភ្ញៀវ​ក្នុង​ស្រុក​នាំ​គ្នា​មក​ស្នាក់​នៅ​តាម​ផ្ទះ​សំ​ណាក់ ឬ​សណ្ឋា​គារ​នៅ​តាម​ជាយ​ក្រុង​»។

អ្នក​​គ្រប់​គ្រង​​​​ផ្ទះ​សំ​ណាក់​រូប​នេះ​​​​និ​យាយ​ថា​ ជា​រួម​ភ្ញៀវ​ទេស​ចរ​ក្នុង​ស្រុក និង​អឺ​រ៉ុប បាន​ថយ​ចុះ​ជា​បន្ត​បន្ទាប់​ ដោយ​សារ​ក្រុង​ព្រះ​សី​ហ​នុ​នា​ពេល​នេះ​មិន​មាន​សណ្ដាប់​ធ្នាប់ គ្មាន​អ​នា​ម័យ និង​ផ្លូវ​គមនា​គមន៍​ល្អ​ដូច​មុន​នោះ​ទេ​។ លោក​​​បញ្ជាក់​ថា៖​ «ខ្ញុំ​គិត​ថា​ចំ​នួន​ភ្ញៀវ​ទេស​ចរ​ក្នុង​ស្រុក​ នឹង​ធ្លាក់​ចុះ​ច្រើន​ជា​បន្ត​ទៀត​នៅក្រុង​ព្រះ​សី​ហ​នុ»។

បើ​តាម​លោក រ៉េត ចំនួន​ភ្ញៀវ​ទេស​ចរ​អឺ​រ៉ុប ​ដែល​ធ្លាប់​កក់​កន្លែង​​​​ស្នាក់​នៅ​រយៈ​ពេល​វែង ពេល​​នេះ​ពួក​គេ​​ស្នាក់​នៅ​ត្រឹម​តែ​ ២-៣ ​យប់​ប៉ុ​ណ្ណោះ​ ខណៈ​ជន​​ជាតិ​ខ្មែរ​មក​លេង​​​តែ​​នៅ​ថ្ងៃ​ចុង​សប្តាហ៍ និង​បុណ្យ​ទាន​​​។

ប្រ​ធាន​សមា​គម​ទី​ភ្នាក់​ងារ​ទេស​ចរណ៍​កម្ពុជា ​លោក​ស្រី​ ឆាយ​ ស៊ីវលីន​ បាន​និ​យាយ​ថា ការ​​កើន​ឡើង​នៃ​តម្លៃ​កន្លែង​​ស្នាក់​​​នៅ ​ទំ​និញ​ និង​ម្ហូប​អា​ហារ​​ កំ​ពុង​ធ្វើ​ឲ្យ​​ផល​ប៉ះ​ពាល់​ដល់​​ភ្ញៀវ​ទេស​ចរ​​ក្នុង​ស្រុក ដោយ​ពួក​គេ​​​មួយ​ចំ​នួន​​បាន​​​​​បង្វែរ​គោល​ដៅ​ទេស​ចរណ៍​​​ពី​​ក្រុង​ព្រះ​សី​ហ​នុ​ ទៅ​​​តំបន់​កោះ​ និង​បណ្តា​ខេត្ត​​មាត់​សមុទ្រ​ជិត​ខាង​វិញ​​។ ​

លោក​ស្រី​ថ្លែង​ថា៖ ​«​ការ​ធ្លាក់​ចុះ​ចំ​នួន​ភ្ញៀវ​ទេស​ចរ​ក្នុង​ស្រុក ​និង​មក​ពី​តំ​បន់​អឺ​រ៉ុប​ នៅ​​​​ក្រុង​ព្រះ​សី​ហ​នុ ​នឹង​មាន​ជា​​​​បន្ត​​ទៀត​ ​​បើ​មិន​មាន​ការ​​អន្ត​រាគ​មន៍​ពី​ស្ថា​ប័ន​ពាក់​ព័ន្ធ»។​

ប៉ុន្តែ​លោក​ស្រី​ជឿ​​ថា​ ស្ថា​ប័ន​ពាក់​​ព័ន្ធ​​ទាំង​អស់​​​នឹង​មាន​ចំ​ណាត់​ការ​ទៅ​លើ​រឿង​នេះ​ ដើ​ម្បី​ធ្វើ​​ឲ្យ​ក្រុង​ព្រះ​សី​ហ​នុ​នៅ​តែ​មាន​សក្តា​នុ​ពល​អាច​ទាក់​ទាញ​ភ្ញៀវ​ទេស​ចរ​ក្នុង​ស្រុក និង​​​ពី​គ្រប់​តំបន់​។

លោក​ទិត្យ​ ចន្ថា ​អ្នក​នាំ​ពាក្យ​ក្រ​សួង​​ទេស​ចរណ៍​មិន​អាច​ទាក់​​ទង​បាន​ទេ​កាល​ពី​ម្សិល​មិញ​។

លោក ​យន្ត​ មីន ​អភិ​បាល​ខេត្ត​ព្រះ​សី​ហ​នុ កាល​ពី​ដើម​ខែ​កញ្ញា​ ​ធ្លាប់​បាន​ប្រាប់​ភ្នំ​ពេញ​ប៉ុស្តិ៍​ថា ​​​ចំ​នួន​​ទេស​ចរ​ក្នុង​​ស្រុក ​និង​​អឺ​រ៉ុប​​​អាច​នឹង​មើល​ឃើញ​ពី​ការ​បាត់​បង់​ ដោយ​សារ​តែ​​​ពិ​បាក​ក្នុង​ការ​ស្វែង​រក​កន្លែង​ស្នាក់​នៅ​។

​លោក​​ថ្លែង​ថា៖​ «​កង្វះ​ខាត​កន្លែង​​​ស្នាក់​នៅ និង​ការ​កើន​ឡើង​នៃ​តម្លៃ​បន្ទប់​​ស្នាក់​​​នៅ​គឺ​ជា​មូល​ហេតុ​ចម្បង​ដែល​​ធ្វើ​ឲ្យ​អ្នក​ទេស​ចរ​ក្នុង​ស្រុក និង​មក​​ពី​តំ​បន់​អឺ​រ៉ុប​មាន​ការ​ធ្លាក់​ចុះ​តិច​តួច​នៅ​​កណ្តាល​ក្រុង​​»៕​LA

អត្ថបទគួរចាប់អារម្មណ៍