.jpg)
កម្មករកំពុងធ្វើការក្នុងរោងចក្រមួយកន្លែង នៅតំបន់សេដ្ឋកិច្ចពិសេសក្រុងព្រះសីហនុ។ ភ្នំពេញ ប៉ុសិ៍្ត
ភ្នំពេញៈ កំណើនសេដ្ឋកិច្ចកម្ពុជានឹងមានការថមថយបន្តិចនៅឆ្នាំនេះធៀបនឹងឆ្នាំ ២០១៨ ប៉ុន្តែស្ថិតក្នុងកម្រិតកំណើនខ្ពស់ និងរឹងមាំ ខណៈរបាយការណ៍ថ្មីមួយរបស់ធនាគារអភិវឌ្ឍន៍អាស៊ី (ADB) ចេញផ្សាយនៅថ្ងៃពុធព្យាករថា កម្ពុជានឹងមានអត្រាកំណើនសេដ្ឋកិច្ច ៧ ភាគរយនៅឆ្នាំ ២០១៩។ កាលពីឆ្នាំ ២០១៨ ADB បានឲ្យដឹងថា កម្ពុជាមានកំណើនសេដ្ឋកិច្ចរហូតដល់ ៧,៣ ភាគរយ ដែលគាំទ្រដោយកំណើនដ៏ខ្ពស់នៃការនាំចេញ ភាពរឹងមាំនៃវិស័យទេសចរណ៍ និងការបន្តហូរចូលនៃវិនិយោគដោយផ្ទាល់ពីបរទេស (FDI)។
ស្របពេលកំណើនសេដ្ឋកិច្ចរបស់ប្រទេសជឿនលឿន និងប្រទេស ចិន ដែលជាគោលដៅចម្បងសម្រាប់ការនាំចេញរបស់កម្ពុជា ត្រូវបានព្យាករថា នឹងថយចុះជាងមុន ADB បានព្យាករថា កត្តានេះទំនងជាធ្វើឲ្យសម្ទុះកំណើននៃការនាំចេញរបស់កម្ពុជា និងកំណើនចំនួនភ្ញៀវទេសចរ មានកម្រិតទាបជាងឆ្នាំមុន។ ដូច្នេះកំណើនសេដ្ឋកិច្ចត្រូវបានមើលឃើញថា នឹងថយមកនៅ ៧ ភាគរយនៅឆ្នាំនេះ និង ៦,៨ ភាគរយក្នុងឆ្នាំ ២០២០។
លោកស្រី Sunniya Durrani-Jamal នាយិកា ADB ប្រចាំកម្ពុជា បានថ្លែងថា៖ «អត្រាកំណើន ៧ ភាគរយជាអត្រាខ្ពស់ស្រេចហើយ ប៉ុន្តែខ្ញុំគិតថា យើងមិនគួរផ្តោតខ្លាំងពេកតែលើបរិមាណទេ តែយើងត្រូវផ្តោតលើគុណភាព ផ្តោតលើកំណើនប្រកបដោយចីរភាព ដែលវាមានសារៈសំខាន់ជាង»។
លោកស្រីបានបញ្ជាក់ថា៖ «កត្តាសំខាន់មួយដែលអាចទាក់ទាញនិងរក្សាឲ្យបាននូវកំណើនក្នុងរយៈពេលវែង គឺកត្តាគុណភាពធនធានមនុស្សរបស់កម្ពុជា ដែលរួមបញ្ចូលទាំងជំនាញបច្ចេកទេស និងជំនាញវិជ្ជាជីវៈដែលអាចឆ្លើយតបនឹងតម្រូវការរបស់វិស័យឯកជន»។
យោងតាម ADB ហានិភ័យខាងក្រៅដ៏ចម្បងមួយ ដែលធ្វើឲ្យប៉ះពាល់ដល់ទស្សនវិស័យនេះគឺ សេដ្ឋកិច្ចសកលអាចថយចុះខ្លាំងជាងកម្រិតដែលបានរំពឹងទុកនាពេលនេះ។ ហានិភ័យមួយទៀត គឺសហភាពអឺរ៉ុបកំពុងពិចារណាក្នុងការព្យួរភាពអនុគ្រោះពន្ធពាណិជ្ជកម្ម (EBA) ពីកម្ពុជា។ ហានិភ័យក្នុងស្រុកគួរឲ្យកត់សម្គាល់ រួមមានការកើនឡើងនូវផលធៀបឥណទានលើ ផ.ស.ស និងគ្រោះរាំងស្ងួតដែលអាចកើតមានឡើងនៅឆ្នាំនេះ។
បើបែងចែកតាមវិស័យវិញ ADB រំពឹងថា វិស័យឧស្សាហកម្ម និងវិស័យសំណង់នឹងងាយទទួលរងផលប៉ះពាល់អវិជ្ជមានខ្លាំងជាងគេ ដោយសារការធ្លាក់ចុះនៃកំណើនសេដ្ឋកិច្ចនៃប្រទេសឧស្សាហកម្មធំៗ។ កំណើនក្នុងវិស័យឧស្សាហកម្មទំនងជាថយចុះមកនៅត្រឹម ១០,១ ភាគរយ ក្នុងឆ្នាំ ២០១៩ និង ៩,៤ ភាគរយក្នុងឆ្នាំ ២០២០។ កំណើននៃវិស័យសំណង់មាន ១៧ ភាគរយនៅឆ្នាំនេះ សេវាកម្ម ៦,៨ ភាគរយ និងវិស័យកសិកម្មមានអត្រា ១,៧ ភាគរយ។
ជាមួយនឹងកំណើនយឺតជាងមុន ការធ្លាក់ចុះតម្លៃប្រេងលើទីផ្សារអន្តរជាតិស្ថិរភាពតម្លៃស្បៀង អត្រាអតិផរណាអាចបន្តស្ថិតក្នុងកម្រិតទាប ពោលគឺនៅកម្រិតជាមធ្យម ២,៥ ភាគរយ នៅឆ្នាំនេះ និងឆ្នាំបន្ទាប់។
ដើម្បីបន្តរក្សាកំណើនខ្ពស់នៅពេលអនាគត ADB បានលើកឡើងថា ប្រទេស កម្ពុជា ត្រូវអភិវឌ្ឍកម្លាំងពលកម្មជំនាញ ដែលងាយសម្របខ្លួនទៅតាមបំផ្លាស់ប្តូរដ៏ឆាប់រហ័សនៃបច្ចេកវិទ្យា ដូចជាការប្រើប្រាស់បច្ចេកវិទ្យាស្វ័យប្រវត្តិកម្ម និងបច្ចេកវិទ្យាមនុស្សយន្ត ដែលកំពុងមានឥទ្ធិពលលើសេដ្ឋកិច្ចទូទាំងសកលលោក។
លោក លឹម ហេង អនុប្រធានសភាពាណិជ្ជកម្មកម្ពុជា បានលើកឡើងកាលពីម្សិលមិញថា សេដ្ឋកិច្ចកម្ពុជានឹងនៅរក្សាបានអត្រាកំណើនយ៉ាងហោចណាស់ប្រហែលនឹងឆ្នាំមុនបើទោះបីមានកត្តាប្រឈមនឹងការថមថយកំណើនសេដ្ឋកិច្ចរបស់បណ្តាប្រទេសជាទីផ្សារនាំចេញរបស់កម្ពុជាក៏ដោយព្រោះថារដ្ឋាភិបាលទើបសម្រេចពីកំណែទម្រង់ទ្រង់ទ្រាយធំដោយសម្រេចដាក់ចេញយុទ្ធសាស្ត្រចំនួន ១៧ ចំណុច ដើម្បីសម្រួលដល់ការធ្វើអាជីវកម្ម។
យោងតាមលោក ហេង កំណែទម្រង់នេះនឹងជួយពង្រឹងភាពប្រកួតប្រជែងរបស់កម្ពុជា ដោយសារវាបានកាត់បន្ថយថ្លៃដឹកជញ្ជូនទំនិញតាមនាវា ថ្លៃសេវាកំពង់ផែ ការកាត់បន្ថយថ្លៃអគ្គិសនី និងការលើកទឹកចិត្តផ្នែកសារពើពន្ធជាដើម។
លោកបានថ្លែងថា៖ «កំណែទម្រង់ថ្មីនេះនឹងទាក់ទាញកាន់តែខ្លាំងនៃលំហូរវិនិយោគផ្ទាល់ពីបរទេស និងបង្កើនភាពប្រកួតប្រជែងផ្នែកនាំចេញរបស់កម្ពុជា»។
លោកបន្តថា៖ «វានឹងដើរតួនាទីជាចលករដ៏សំខាន់ក្នុងការជំរុញកំណើនសេដ្ឋកិច្ចនៅឆ្នាំនេះ និងឆ្នាំបន្តទៀត»៕ LA
