ក្រុងអូតាវ៉ាៈ សេដ្ឋកិច្ចរបស់ប្រទេស កាណាដា បានថមថយនៅត្រីមាសទី ៣ ឆ្នាំនេះដោយកំណើនសេដ្ឋកិច្ចបានធ្លាក់ចុះមកនៅត្រឹម ១,៣ ភាគរយ ឬស្មើនឹងជិត ១ ភាគរយ ៣ នៃកំណើនសេដ្ឋកិច្ចដែលសម្រេចបានកាលពីត្រីមាសទី ២។ នេះបើយោងតាមទីភ្នាក់ងារស្ថិតិនៅចុងសប្តាហ៍មុន។
ការិយាល័យស្ថិតិកាណាដាបានស្តីបន្ទោសការធ្លាក់ចុះនេះថា ដោយសារការធ្លាក់ចុះការនាំចេញ។ ការិយាល័យនេះក៏បានកត់សម្គាល់ផងដែរថា កំណើនសេដ្ឋកិច្ចបានថមថយដោយសារការកើនឡើងតិចតួចនៃការចំណាយអតិថិជន និងការវិនិយោគរបស់ក្រុមហ៊ុន។
ទីភ្នាក់ងារនេះក៏បានវាយតម្លៃឡើងវិញឆ្ពោះទៅរកការទម្លាក់ចុះផលិតផលក្នុងស្រុកសរុប (ផ.ស.ស) ប្រចាំត្រីមាសទី ២ ផងដែរមកនៅត្រឹម ៣,៥ ភាគរយ ពីអត្រាកំណើនដែលត្រូវបានប៉ាន់ប្រមាណបឋមនៅខែសីហា ៣,៧ ភាគរយ។ កំណើននេះគឺជាអត្រាខ្ពស់បំផុតក្នុងចំណោមក្រុមប្រទេសមានឧស្សាហកម្មរីកចម្រើនទាំង ៧ (G7)។
ផ.ស.ស របសកាណាដាក្នុងត្រីមាសទី ៣ កើតមានឡើងស្របតាមការព្យាកររបស់អ្នកវិភាគ។
ដោយព្យាករថានឹងមានការថមថយសកម្មភាពសេដ្ឋកិច្ចបន្ថែមទៀតរហូតដល់ដំណាច់ឆ្នាំនេះ សេដ្ឋវិទូភាគច្រើនជឿថា ធនាគារកណ្តាលកាណាដានឹងរក្សាអត្រាការប្រាក់គោលរបស់ខ្លួននៅដដែលក្នុងអត្រា ១,៧៥ ភាគរយនៅពេលមានការប្រកាសនៅសប្តាហ៍នេះ។
លោក Avery Shenfeld អ្នកវិភាគប្រចាំក្រុមហ៊ុន CIBC បានធ្វើអត្ថាធិប្បាយថា៖ «សេដ្ឋកិច្ចនៅត្រីមាសទី ៣ របស់ប្រទេសកាណាដា គឺជាលទ្ធផលល្អមួយផ្សេងទៀត។ ជាមួយនឹងអត្រាកំណើនរបស់ត្រីមាសទីនេះ វាក៏ស្ថិតក្នុងកម្រិតជាមធ្យមដែលយើងបានមើលឃើញផងដែរនៅលោកថ្លែងថា អត្រាការប្រាក់ទំនងជា «មានកម្រិតទាបល្មម ដើម្បីប៉ះប៉ូវដល់តម្រូវការខ្សោយពីទីផ្សារខាងក្រៅ»។
យោងតាមការិយាល័យស្ថិតិកាណាដា ទំហំនាំចេញបានធ្លាក់ចុះ ០,៤ ភាគរយនៅត្រីមាសទី ៣ បន្ទាប់ពីកើនឡើង ៣,១ ភាគរយ នៅត្រីមាសទី ២ ខណៈទំហំនាំចូលថ្មីៗនេះមានកម្រិតថេរ បន្ទាប់ពីធ្លាក់ចុះតិចតួចនៅត្រីមាសទី ២។
ការនាំចេញរ៉ែមិនមែនលោហៈ និងផលិតកម្មកសិកម្ម និងនេសាទបានធ្លាក់ចុះ។ ការធ្លាក់ចុះនេះមួយផ្នែកត្រូវបានប៉ះប៉ូវដោយការកើនឡើងការនាំចេញរ៉ែលោហៈ និងសម្លៀកបំពាក់ និងស្បែកជើង៕ KC