.jpg)
លោក Ning Jizhe អគ្គនាយករងនៃការិយាល័យជាតិស្ថិតិ។ រូបថត AFP
ទីក្រុងប៉េកាំងៈ ទិន្នន័យផ្លូវការបានបង្ហាញកាលពីថ្ងៃចន្ទថា សេដ្ឋកិច្ចរបស់ប្រទេសចិន បានកើនឡើងក្នុងល្បឿនយឺតបំផុតក្នុងរយៈពេលជាង ៤ ទសវត្សរ៍ កាលពីឆ្នាំមុនទោះបីជាការស្ទុះងើបឡើងវិញ បន្ទាប់ពីការផ្ទុះឡើងវីរុសកូរ៉ូណារបស់ប្រទេសនេះក៏ដោយ។
ការកើនឡើង ២,៣ ភាគរយ គឺជាតួលេខទាបបំផុត ចាប់តាំងពីសេដ្ឋកិច្ចប្រទេសចិន បានចាប់ផ្ដើមកែទម្រង់កាលពីទសវត្សរ៍ឆ្នាំ ១៩៧០។
ការិយាល័យជាតិស្ថិតិ (NBS) បានឲ្យដឹងថា ឆ្នាំមុនគឺជា «បរិយាកាសធ្ងន់ធ្ងរ និងស្មុគ្រស្មាញ ទាំងនៅក្នុងប្រទេសចិន និងក្រៅប្រទេស» ដោយសារតែការរីករាលដាលជំងឺដែលធ្វើឲ្យ «ប៉ះពាល់ធ្ងន់ធ្ងរ»។
តួលេខនេះ គឺជាការថមថយល្បឿនគួរឲ្យកត់សម្គាល់ចាប់ពីកំណើនឆ្នាំ ២០១៩ ចំនួន ៦,១ ភាគរយ ដែលទាបរួចទៅហើយក្នុងរយៈពេលជាច្រើនទសវត្សរ៍ ដោយប្រទេសនេះរងផលប៉ះពាល់ដោយសារតែតម្រូវការក្នុងស្រុកខ្សោយ និងភាពតានតឹងផ្នែកពាណិជ្ជកម្ម។
ប៉ុន្តែតួលេខនេះប្រសើរជាងការព្យាករដោយការស្ទង់មតិដោយទីភ្នាក់ងារព័ត៌មាន AFP ក្នុងចំណោមអ្នកវិភាគជាច្រើនមកពីគ្រឹះស្ថានហិរញ្ញវត្ថុ ១៣ ដែលបានព្យាករថា នឹងកើនឡើង ២ ភាគរយ។
ជំងឺកូវីដ ១៩ ដែលបានបំផ្លាសសេដ្ឋកិច្ចពិភពលោក ដែលបានផ្ទុះឡើងដំបូងនៅភាគកណ្ដាលប្រទេសចិនកាលពីចុងឆ្នាំ ២០១៩។ ប៉ុន្តែប្រទេសមានសេដ្ឋកិច្ចឈានមុខគេទី២ របស់ពិភពលោកមួយនេះ ក៏បានក្លាយជាប្រទេសដំបូងគេ ក្នុងការស្ទុះងើបឡើងវិញ បន្ទាប់ពីការវិធានការបិទប្រទេសដ៏តឹងរ៉ឹង និងវិធានការគ្រប់គ្រងវីរុសនេះ។
ប្រទេសនេះត្រូវបានរំពឹងថា នឹងក្លាយជាប្រទេសលើពិពលោកតែមួយគត់ ដែលមានកំណើនវិជ្ជមានកាលពីឆ្នាំ ២០២០។
នៅក្នុងរយៈពេល៣ខែចុងក្រោយឆ្នាំ ២០២០ ការស្ទុះងើបឡើងវិញសេដ្ឋកិច្ចរបស់ប្រទេសចិន បានបន្តកំណើន ៦,៥ ភាគរយ ដែលប្រសើរជាងការរំពឹងទុកធៀបនឹងរយៈពេលដូចគ្នាកាលពីឆ្នាំមុន ដែលជាការកើនឡើងប្រកបដោយចីរភាពចាប់តាំងពីត្រីមាសទី២។
កំណើននេះបានធ្វើឲ្យប្រទេសនេះត្រឡប់ទៅរកដំណើរផ្លូវមុនការរីករាលដាលជំងឺកូវីដ ១៩ ទោះបីជាកំណើនពេលរយៈពេលមួយឆ្នាំ ២០២០ នៅតែមានប្រតិបត្តិការអាក្រក់ក៏ដោយ នៅពេលសេដ្ឋកិច្ចនេះបានធ្លាក់ចុះ ១,៦ ភាគរយ។
នោះគឺជារយៈពេលពីរឆ្នាំ មុនពេលលោក Deng Xiaoping អតីតមេដឹកនាំបានកំណត់នៅក្នុងញត្តិមួយនូវការផ្លាស់ប្តូរពីផែនការកណ្ដាលតាមបែបកុំម្មុយនីស្ដ ដែលប្រែក្លាយប្រទេសចិនទៅប្រទេសមហាអំណាចឧស្សាហកម្ម ពាណិជ្ជកម្ម និងបច្ចេកវិទ្យា។
លោក Ning Jizhe ស្នងការ NBS បានប្រាប់ក្រុមអ្នកយកព័ត៌មានកាលពីថ្ងៃចន្ទថា មូលដ្ឋានគ្រឹះសម្រាប់ការស្ទុះងើបឡើងវិញនៃសេដ្ឋកិច្ចរបស់ប្រទេសចិន «គឺនៅតែមិនទាន់រឹងមាំនៅឡើយទេ»។
លោកថ្លែងថា៖ «មានភាពមិនច្បាស់លាស់ជាច្រើន នៅក្នុងការផ្លាស់ប្តូរថាមពលការរីករាលដាលជំងឺមួយនេះ ព្រមទាំងបរិយាកាសខាងក្រៅផងដែរ»។
យោងតាមទិន្នន័យចុងក្រោយបំផុត ផលិតកម្មឧស្សាហកម្មបានកើនឡើង ២,៨ ភាគរយ ធៀបនឹងរយៈពេលដូចគ្នាកាលពីឆ្នាំ ២០២០ ដែលថមថយល្បឿនបន្ថែមទៀតធៀបនឹងឆ្នាំមុនៗ៕ AFP/LA
