The Phnom Penh Post Search

Search form




Logo of Phnom Penh Post newspaper Phnom Penh Post - កំណើន​តួលេខ​ទេសចរណ៍ ៦​ខែ មាន​ត្រឹម​តែ ៥%

កំណើន​តួលេខ​ទេសចរណ៍ ៦​ខែ មាន​ត្រឹម​តែ ៥%

មគ្គុទេសក៍​ទេសចរណ៍​កំពុង​បង្ហាញ​ពី​រូប​ចម្លាក់​នៅ​លើ​ជញ្ជាំង​ប្រាសាទ​អង្ករវត្ត​ដល់​ភ្ញៀវ​ទេសចរ​បរទេស​នា​ពេល​កន្លង​មក។
មគ្គុទេសក៍​ទេសចរណ៍​កំពុង​បង្ហាញ​ពី​រូប​ចម្លាក់​នៅ​លើ​ជញ្ជាំង​ប្រាសាទ​អង្ករវត្ត​ដល់​ភ្ញៀវ​ទេសចរ​បរទេស​នា​ពេល​កន្លង​មក។ ហុង មិនា

កំណើន​តួលេខ​ទេសចរណ៍ ៦​ខែ មាន​ត្រឹម​តែ ៥%

ភ្នំពេញៈ ទិន្នន័យ​ចុង​ក្រោយ​បំផុត​នៃ​វិស័យ​ទេសចរណ៍​បាន​បង្ហាញ​ថា ឧស្សាហកម្ម​ទេសចរណ៍​កម្ពុជា ដែល​ត្រូវ​បាន​មើល​ឃើញ​ថា មាន​កំណើន​ពីរ​ខ្ទង់​អស់​រយៈ​ពេល​ជាច្រើន​ឆ្នាំ​មក​ហើយ​នោះ កំពុង​បង្ហាញ​សញ្ញា​នៃ​ការ​ធ្លាក់​ចុះ​ខណៈ​ភ្ញៀវ​ទេសចរ​ថៃ​មក​ទស្សនា​កម្ពុជា​បាន​ថយ​ចុះ។

របាយ​ការណ៍​ពាក់​កណ្ដាល​ឆ្នាំ​បាន​ពី​ក្រសួង​ទេសចរណ៍​បង្ហាញ​ថា ការ​មក​ដល់​របស់​ភ្ញៀវ​ទេសចរ​សរុប ២,២ លាន​នាក់​ចន្លោះ ខែ​មករា និង ខែ​មិថុនា ឆ្នាំ​នេះ​កើន​ឡើង ៥ ភាគរយ​ធៀប​នឹង​រយៈ​ពេល​ដូច​គ្នា​ពី​ឆ្នាំ​មុន។

ការ​កើន​ឡើង​នេះ​បាន​បង្អាក់​និន្នាការ​រយៈ​ពេល ៤​ឆ្នាំ ដែល​ត្រូវ​បាន​គេ​មើល​ឃើញ​ថា មាន​កំណើន​ដូច​គ្នា​ចន្លោះ​ពី ១៣ និង ២៦ ភាគរយ​នៅ​ឆមាស ទី១ ក្នុង​ឆ្នាំ​នីមួយៗ​ចាប់​តាំង​ពី ឆ្នាំ​២០១០។

លោក គង់ សុភារក្ស ប្រធាន​នាយកដ្ឋាន​ស្ថិតិ​របស់​ក្រសួង​ទេសចរណ៍​បាន​ថ្លែង​ថា កំណើន​មិន​សូវ​ខ្លាំង​នេះ​ភាគ​ច្រើន​បណ្ដាល​មក​ពី​ការ​ធ្លាក់​ចុះ​នៃ​ការ​មក​ដល់​ភ្ញៀវ​ទេសចរ​តាម​ផ្លូវ​គោក​ចេញ​ពី ប្រទេស​ថៃ ក្នុង​រយៈ​ពេល ៦​ខែ កន្លង​មក​នេះ។

លោក​លើក​ឡើង​ថា៖ «ចាប់​តាំង​ពី​ចុង​បញ្ចប់​នៃ​វិបត្តិ​ហិរញ្ញវត្ថុ​ពិភពលោក​កម្ពុជា​បាន​មើល​ឃើញ​កំណើន​ភ្ញៀវ​ទេសចរ​បរទេស​ពីរ​ខ្ទង់​ថេរ។ ប៉ុន្តែ​រហូត​មក​ដល់​ពេល​ឆ្នាំ​នេះ តួលេខ​នោះ​បាន​ធ្លាក់​ចុះ​ដោយ​សារ​តែ​ការ​មក​ដល់​របស់​ភ្ញៀវ​ទេសចរ​មាន​ចំនួន​តិច​ចេញ​ពី ប្រទេស​ថៃ កាត់​តាម​ច្រក​ទា្វរ​ព្រំដែន»។

យោង​តាម​លោក សុភារក្ស ការ​មក​ដល់​តាម​ផ្លូវ​គោក​មក​កាន់​កម្ពុជា​តាម​រយៈ​ច្រក​ទ្វារ​ព្រំដែន​ប៉ោយប៉ែត​បាន​ថយ​ចុះ ២៣ ភាគរយ​ចន្លោះ ខែ​មករា និង ខែ​មិថុនា ឆ្នាំ​នេះ ខណៈ​ដែល​ការ​ធ្វើ​ដំណើរ​តាម​ផ្លូវ​អាកាស​រវាង​ប្រទេស​ទាំង​ពីរ​នេះ​បាន​បន្ត​កើន​ឡើង។ សរុប​មក​ចំនួន​នៃ​ការ​មក​ដល់​របស់​ភ្ញៀវ​ទេសចរ​ថៃ​មក​កាន់​កម្ពុជា​នៅ​ឆមាស ទី១ ឆ្នាំ​នេះ​មាន ១០៦ ០០០ នាក់ ធ្លាក់​ចុះ​ជាង ៤ ភាគ​រយ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន។

លោក​បន្ត​ថា៖ «ស្ថាន​ការណ៍​នយោបាយ​បាន​កាត់​បន្ថយ​ទេសចរណ៍​មក​កម្ពុជា។ ប៉ុន្តែ​តាម​ការ​មើល​ឃើញ​នេះ ខ្ញុំ​ជឿ​ជាក់​ថា យើង​នឹង​មើល​ឃើញ​តួលេខ​ទេសចរណ៍​ទាំង​មូល​មាន​ស្ថិរភាព​ក្នុង​កំណើន​ជា​មធ្យម​នៅ​ចុង​ឆ្នាំ​នេះ ៨ ភាគរយ»។

កាល​ពី​ដើម​ខែ​នេះ ក្នុង​អំឡុង​ពេល​ដំណើរ​ទស្សនកិច្ច​សារ​ព័ត៌មាន​មួយ​របស់​ថៃ លោក Thawatchai Arunyik ប្រធាន​អាជ្ញាធរ​ទេសចរណ៍​ថៃ​បាន​ប្រាប់ ភ្នំពេញ ប៉ុស្ដិ៍ ថា ភាព​ចលាចល​ផ្នែក​នយោបាយ​រយៈ​ពេល​វែង​នៅ ប្រទេស​ថៃ បាន​ធ្វើ​ឲ្យ​ប៉ះ​ពាល់​ដល់​ឧស្សាហកម្ម​ទេសចរណ៍​របស់​ប្រទេស​នេះ ពិសេស​ទាក់​ទង​នឹង​អ្នក​ធ្វើ​ដំណើរ​ផ្សង​ព្រេង​មក​កាន់ ប្រទេស​កម្ពុជា។

លោក​បញ្ជាក់​ថា៖ «យើង​ត្រូវ​តែ​លើក​កម្ពស់​រួម​គ្នា​ដោយ​សារ​តែ​យើង​ជា​ប្រទេស​ជិត​ខាង»។

លោក​បាន​បន្ថែម​ថា៖ «កាល​ពី​អតីតកាល​យើង​បាន​លើក​កម្ពស់​ព្រះ​រាជា​ណាចក្រ​ទាំង​ពីរ​នេះ​ជា​ទិស​ដៅ​តែ​មួយ។ អ្នក​ដែល​ចូល​មក ថៃ ពួក​គេ​មិន​បញ្ឈប់​នៅ​ក្នុង ប្រទេស​ថៃ នោះ​ទេ ពួក​គេ​នៅ​បន្ត​ទៅ​ទស្សនា ប្រទេស​កម្ពុជា ផង​ដែរ»។

លោក ហូ វណ្ឌី សហ​ប្រធាន​ក្រុម​ការងារ​ទេសចរណ៍​វិស័យ​ឯកជន និង​រដ្ឋាភិបាល​ថ្លែង​ថា លោក​មាន​ទំនុក​ចិត្ត​ថា ការ​មក​ដល់​របស់​ភ្ញៀវ​ទេសចរ​នឹង​ស្ទុះ​ងើប​ឡើង​វិញ​នៅ​ឆមាស ទី២ ឆ្នាំ​នេះ។

លោក​ថ្លែង​ថា៖ «តួលេខ​ពាក់​កណ្ដាល​ឆ្នាំ​នេះ​មិន​មែន​ជា​លទ្ធផល​ចុង​ឆ្នាំ​នោះ​ទេ។ យើង​គ្រាន់​តែ​បាន​ឆ្លង​កាត់​រដូវ​ធ្លាក់​ចុះ​ប៉ុណ្ណោះ»។ លោក​បន្ថែម​ថា ជើង​ហោះ​ហើរ​ត្រង់​ទៅ​កាន់ ប្រទេស​ជប៉ុន ត្រូវ​បាន​គ្រោង​នឹង​ចាប់​ផ្ដើម​ឲ្យ​ឆាប់​នៅ​ខែ​ក្រោយ​នេះ។

ទន្ទឹម​នឹង​នេះ​ដែរ​បើ​យោង​តាម​ទិន្នន័យ​របស់​រដ្ឋាភិបាល​ជប៉ុន​គឺជា​ទីផ្សារ​មួយ​ក្នុង​ចំណោម​ទី​ផ្សារ​មួយ​ចំនួន​ដែល​បាន​បង្ហាញ​កំណើន​វិជ្ជមាន​ក្នុង​អំឡុង​ពេល ៦​ខែ ដំបូង​នៅ​ឆ្នាំ​នេះ​ដោយ​មាន​ការ​មក​ដល់​នៃ​ភ្ញៀវ​ទេសចរ​ជប៉ុន​មក ប្រទេស​កម្ពុជា កើន​ឡើង​ជាង ១០៧ ០០០ នាក់​គឺ​កើន ១២ ភាគរយ​ធៀប​នឹង​រយៈ​ពេល ៦​ខែ ដូច​គ្នា​កាល​ពី​ឆ្នាំ​មុន៕

អត្ថបទគួរចាប់អារម្មណ៍