The Phnom Penh Post Search

Search form




Logo of Phnom Penh Post newspaper Phnom Penh Post - កំណើន​ភ្ញៀវ​ទេសចរ​នៅ​តាម​តំបន់​ឆ្នេរ ឆ្នាំ​២០១៣ កើន​ឡើង

កំណើន​ភ្ញៀវ​ទេសចរ​នៅ​តាម​តំបន់​ឆ្នេរ ឆ្នាំ​២០១៣ កើន​ឡើង

កំណើន​ភ្ញៀវ​ទេសចរ​នៅ​តាម​តំបន់​ឆ្នេរ ឆ្នាំ​២០១៣ កើន​ឡើង

ភ្នំពេញៈ មន្ត្រី​ទេសចរណ៍​ខេត្ត​បាន​ឲ្យ​ដឹង​ថា ចំនួន​ភ្ញៀវ​ទេសចរ​ទស្សនា​នៅ​តំបន់​ឆ្នេរ​របស់​កម្ពុជា​នៅ​ឆ្នាំ ២០១៣ បាន​កើន​ឡើង​គួរ​ឲ្យ​កត់​សម្គាល់។

តំបន់​ឆ្នេរ​គ្រប​ដណ្ដប់​លើ​ខេត្ត ៤ រួម​មាន ខេត្ត ព្រះ​សីហនុ កំពត កែប និង​ខេត្ត កោះកុង។

លោក សេង ខា ប្រធាន​មន្ទីរ​ទេសចរណ៍​ខេត្ត ព្រះ​សីហនុ ប្រាប់ ភ្នំពេញ ប៉ុស្ដិ៍ កាល​ពី​ម្សិលមិញ​ថា ចំនួន​ភ្ញៀវ​ទេសចរ​មក​ទស្សនា​ក្នុង​ខេត្ត​ភាគ​ខាង​ត្បូង​នេះ​កំពុង​កើន​ឡើង​ជា​រៀង​រាល់​ឆ្នាំ។

លោក​និយាយ​ថា៖ «ឆ្នេរ​ដ៏​ស្រស់​ស្អាត​របស់​យើង​គឺជា​ការ​ទាក់​ទាញ​ដ៏​សំខាន់​សម្រាប់​ភ្ញៀវ​ទេសចរ។ ពួក​គេ​មក​ទី​នេះ​ដើម្បី​សម្រាក​លម្ហែកាយ​នៅ​លើ​ឆ្នេរ​ខ្សាច់​នេះ»។ លោក​លើក​ឡើង​ថា ហេដ្ឋា​រចនា​សម្ព័ន្ធ ចំនួន​សណ្ឋាគារ និង​ភោជនីយដ្ឋាន​គ្រប់​គ្រាន់​បាន​រួម​ចំណែក​ដល់​ចំនួន​ភ្ញៀវ​ទេសចរ​ដែល​កំពុង​កើន​ឡើង​នេះ។

ចំនួន​ភ្ញៀវ​ទេសចរ​សរុប​បាន​មក​ដល់​តំបន់​ឆ្នេរ​នេះ​កាល​ពី​ឆ្នាំ ២០១៣ បាន​កើន​ឡើង​ដល់​ជាង ១ លាន​នាក់។ យោង​តាម​លោក សេង ខា ចំនួន​ភ្ញៀវ​ទេស​បរទេស​បាន​កើន​ឡើង​ដល់ ៣០២ ៣២៥ នាក់ ដែល​កើន​ឡើង ៤២ ភាគរយ ធៀប​នឹង​ឆ្នាំ ២០១២។ ខណៈ​ភ្ញៀវ​ទេសចរ​ក្នុង​ស្រុក​បាន​កើន​ឡើង ១២ ភាគរយ​ដល់ ៧៣១ ៦០៤ ផង​ដែរ។ លោក​បន្ត​ថា៖ «ភ្ញៀវ​ទេសចរ​ចិន​ជាប់​លំដាប់​ថ្នាក់​លេខ ១ បន្ទាប់​មក​ភ្ញៀវ​មក​ពី រុស្ស៊ី និង វៀតណាម»។ លោក​រំពឹង​ថា​ចំនួន​ភ្ញៀវ​ទេសចរ​នឹង​កើន​ច្រើន​នៅ​ឆ្នាំ ២០១៤។

លោក ប៊ុន បៀង ប្រធាន​មន្ទីរ​ទេសចរណ៍​ខេត្ត កោះកុង បាន​និយាយ​ថា ភ្ញៀវ​ទេសចរ​បរទេស​នៅ​ខេត្ត កោះកុង ក៏​មាន​ការ​កើន​ឡើង​គួរ​ឲ្យ​កត់សម្គាល់​ដែរ​នៅ​ឆ្នាំ ២០១៣។

សណ្ឋាគារ​ថ្នាក់​ផ្កាយ​ប្រាំ និង​កន្លែង​កម្សាន្ត​ដែល​មាន​ឆ្នេរ​សមុទ្រ​សួន​ទឹក និង​កាស៊ីណូ​នៅ​ក្នុង​ខេត្ត កោះកុង បាន​ក្លាយ​ជា​ការ​ទាក់​ទាញ​ដ៏​សំខាន់​សម្រាប់​ភ្ញៀវ​ទេសចរ​ថៃ ខណៈ​ភ្ញៀវ​ទេសចរ​ក្នុង​ស្រុក​ឆ្ពោះ​ទៅ​រក​តំបន់​ទេសចរណ៍​ធម្មជាតិ​មាន ដូចជា ជីផាត់ តាតៃ និង​ត្រពាំងរូង។

លោក ប៊ុន បៀង បាន​ឲ្យ​ដឹង​ថា ភ្ញៀវ​ទេសចរ​បរទេស​នៅ​ខេត្ត កោះកុង មាន​ចំនួន ៤៧ ៤៤៦ នាក់ កើន​ឡើង ៥១៤ ភាគរយ​ធៀប​នឹង​ឆ្នាំ ២០១២ ខណៈ​ចំនួន​ភ្ញៀវ​ទេសចរ​ក្នុង​ស្រុក​សរុប​មាន ៩៦ ០៨០ នាក់ កើន ១៦ ភាគរយ។

លោក​បន្ត​ថា៖ «ជនជាតិ​ថៃ​គឺជា​ភ្ញៀវ​ទេសចរ​លេខ ១ នៅ​ខេត្ត​នេះ។ ពួក​គេ​ឆ្លង​ព្រំដែន​ដើម្បី​ទស្សនា​រមណីយដ្ឋាន​ខេត្ត កោះកុង លំដាប់ ផ្កាយ​ប្រាំ​និង​ឆ្នេរ​នេះ។ ភ្ញៀវ​ទេសចរ​កម្ពុជា​ភាគ​ច្រើន​ចូល​ចិត្ត​ដើរ​កម្សាន្ត​បែប​ទេសចរ​ធម្មជាតិ»។

ខេត្ត កំពត ក៏​មាន​កំណើន​ភ្ញៀវ​ទេសចរ​បរទេស​ផង​ដែរ។ តួលេខ​ផ្ដល់​ដោយ​មន្ទីរ​ទេសចរ​បង្ហាញ​ថា ភ្ញៀវ​ទេសចរ​ក្នុង​ស្រុក​កើន​ឡើង ១៦ ភាគរយ​ដល់ ១ ១១៤ ៦០៧ នាក់​កាល​ពី​ឆ្នាំ ២០១៣ ខណៈ​ភ្ញៀវ​ទេសចរ​បរទេស​កើន​ឡើង​ដល់ ១១៧ ២៨០ នាក់ គឺ​កើន​ឡើង ៣៦៩ នាក់​ធៀប​នឹង​ឆ្នាំ ២០១២។

លោក ម៉ុក សេកាណូ អនុ​ប្រធាន​មន្ទីរ​ទេសចរណ៍​ខេត្ត កំពត និយាយ​ថា រមណីយដ្ឋាន បូកគោ កំពុង​ក្លាយជា​ទិស​ដៅ​ទាក់​ទាញ​ដ៏​សំខាន់​សម្រាប់​ខេត្ត​នេះ។ លោក​បាន​បន្ត​ថា៖ «ជនជាតិ​វៀតណាម​ជាប់​ជា​ភ្ញៀវ​ទេសចរ​លំដាប់​ថ្នាក់​លេខ ១»។

កែប ដែល​ល្បី​ល្បាញ​ខាង​ម្ហូប​សមុទ្រ​ស្រស់ និង​ឆ្ញាញ់ មាន​ចម្ងាយ​ត្រឹម​តែ ២៥ គីឡូម៉ែត្រ​ពី​ខេត្ត កំពត ប៉ុណ្ណោះ។ លោក សម ចិន្តា មន្ដ្រី​ទេសចរណ៍​ខេត្ត​ជា​តំបន់​ឆ្នេរ​មួយ​នេះ អះអាង​ថា កែប​ក៏​ទទួល​បាន​កំណើន​ផង​ដែរ​សម្រាប់​ឆ្នាំ ២០១៣។

លោក​ថា៖ «សណ្ឋាគារ និង​ភោជនីយដ្ឋាន​កាន់​តែ​ច្រើន​កំពុង​សាងសង់។ វា​គឺជា​ការ​ឆ្លុះ​បញ្ចាំង​ថា​ភ្ញៀវ​កាន់​តែ​ច្រើន​កំពុង​មក​ទស្សនា​ខេត្ត​នេះ»៕ PB

អត្ថបទគួរចាប់អារម្មណ៍