ភ្នំពេញៈ ទោះបីប្រជាជនកម្ពុជា ពី៤០ ទៅ ៥០ភាគរយ នៅតែប្រើឱសថបុរាណក៏ដោយ ប៉ុន្តែតាមការប៉ាន់ស្មានរបស់ក្រសួងសុខាភិបាល ឧស្សាហកម្មឱសថនៅកម្ពុជាកំពុងតែកើនយ៉ាងឆាប់រហ័ស។
ការព្យាករចុងក្រោយរបស់វិទ្យាស្ថានពិនិត្យតាមដានពាណិជ្ជកម្ម (BMI) បង្ហាញថា ឆ្នាំ២០១២ ប្រជាជននៅកម្ពុជា ចំណាយជាមធ្យម២៣៦ដុល្លារលើការទិញឱសថ បើធៀបនឹង២០១១ ដែលមាន២១៧ដុល្លារ។
របាយការណ៍ពីការផ្តល់សេវាសុខភាពនៅកម្ពុជាចេញផ្សាយដោយអង្គការសុខភាពពិភពលោក និងក្រសួងសុខាភិបាលបានបង្ហាញថា កាលពីឆ្នាំមុន ប្រជាជន៧០ភាគរយទៅរកសេវាសុខភាពពីវិស័យឯកជន។របាយការណ៍នោះ បានបញ្ជាក់ថា ក្នុងចំណោមនោះ ២០ភាគរយនៃប្រជាជននៅទីក្រុងកាលពីឆ្នាំ២០១០ទិញថ្នាំមកព្យាបាលហើយ៨ភាគរយនៅតំបន់ជនបទ។
ទោះយ៉ាងនេះក្តី វិស័យនេះ នៅតែទទួលរងផលប៉ះពាល់ដោយសារតែការពឹងផ្អែកខ្លាំងលើឱសថនាំចូល។
កាលពីឆ្នាំ២០១១ នៅកម្ពុជាមានរោងចក្រផលិតឱសថតែ៨កន្លែងប៉ុណ្ណោះ។ នេះបើតាមរបាយការណ៍ក្រសួងពាណិជ្ជកម្មអាមេរិកកាលពីឆ្នាំ២០១១។ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានគូសបញ្ជាក់ថា កាលពីឆ្នាំមុនឱសថផលិតក្នុងស្រុក ចាំបាច់ត្រូវមានការប្រកួតប្រជែង។
ទិន្នន័យពីក្រសួងពាណិជ្ជកម្មកម្ពុជាពីឆ្នាំ២០១២ បង្ហាញថា កម្ពុជានាំចូលឱសថនិងបរិក្ខារពេទ្យមានតម្លៃសរុបប្រហែល ១៦៥,៥៧លានដុល្លារកើនឡើង ៣៣,១៧ភាគរយ បើធៀបនឹងឆ្នាំ២០១១។តាមរបាយការណ៍ BMI កម្ពុជា នាំចូលឱសថពីឥណ្ឌា កូរ៉េខាងត្បូង ប៉ាគីស្ថាន ថៃ អូស្ត្រាលី និងជប៉ុន។
លោកស្រី យិន សុជាតិ ប្រធានផ្នែកលក់ និងទីផ្សារប្រចាំសហគ្រាសផលិតឱសថកម្ពុជា (CPE) បានប្រាប់ភ្នំពេញ ប៉ុស្តិ៍ថាការពឹងផ្អែកលើការនាំចូលវត្ថុធាតុដើម អាចជាបញ្ហាប្រឈមដោយសារផលិតផលពីបរទេស ដូចជា ចិន ឥណ្ឌា សិង្ហបុរី និងអាល្លឺម៉ង់ តែងតែជួបភាពយឺតយ៉ាវ។
ទោះបីក្រសួងសុខាភិបាល ជាអ្នកទិញឱសថបរិក្ខារពេទ្យ និងឧបករណ៍ពេទ្យផ្សេងៗទៀតច្រើនជាងគេក៏ដោយ ប៉ុន្តែសមាមាត្រនៃការថែទាំសុខភាពរបស់វិស័យឯកជន បែរជាកំពុងកើនទៅវិញ។
ក្រុមហ៊ុនជាតិ និងអន្តរជាតិកំពុងស្វែងរកឱកាសនៅក្នុងទីផ្សារដែលស្ថិតនៅក្រោមការអភិវឌ្ឍ។
កាលពីខែកុម្ភៈ ឆ្នាំ២០១២ ក្រុមហ៊ុន Merck KGaA មានមូលដ្ឋាននៅអាល្លឺម៉ង់ឲ្យដឹងថា តម្រូវការថែទាំសុខភាពដែលមិនទាន់មានការឆ្លើយតបផ្តល់ឱកាសដ៏ធំធេងដល់កម្ពុជា។ដូច្នេះក្រុមហ៊ុនធំៗមួយចំនួនតូច បានបោះជំហានមកក្នុងវិស័យនេះ។
ក្រៅពីអ្នកធ្វើពាណិជ្ជកម្មឱសថ ដៃគូអន្តរជាតិ ដូចជា Bayer នៅអាល្លឺម៉ង់ Sanofi នៅបារាំង និង GlaxoSmithKline នៅអង់គ្លេស បានមកដល់ទីផ្សារកម្ពុជាហើយ។
លោក ស្រ៊ុន ម៉ាលីន ប្រធានសាខារបស់ Bayer បានប្រាប់ភ្នំពេញ ប៉ុស្តិ៍ថា៖ «អាជីវកម្មរបស់យើងនៅកម្ពុជា បានកើនឡើងជាលំដាប់ពីមួយឆ្នាំ ទៅមួយឆ្នាំស្របតាមកំណើនទីផ្សារ។ យើងមានទំនុកចិត្តក្នុងការផ្តល់សេវាល្អនៅឆ្នាំខាងមុខៗទៀត។ ដើម្បីឆ្លើយតបនឹងតម្រូវការកើនឡើង Bayer មានគម្រោងជ្រើសរើសបុគ្គលិកបន្ថែម និងពង្រឹងទីតាំងនៅតាមបណ្តាខេត្តមួយចំនួន»។
ក្រុមហ៊ុន Bayer មានបុគ្គលិកជាង៤០នាក់ នៅកម្ពុជា ដែលរួមចំណែកដល់ការលក់ពេញមួយឆ្នាំ នៅតំបន់អាស៊ីប៉ាស៊ីហ្វិក ចំនួន៤,៨៧ពាន់លានដុល្លារកាលពីឆ្នាំ២០១១កើនឡើង៩,៤ភាគរយ ធៀបនឹង២០១០។
ទោះបីយ៉ាងនេះក្តី សហគ្រាស CPE លក់ឱសថរបស់ខ្លួនបានជោគជ័យនៅលើទីផ្សារក្នុងស្រុក ក្នុងខេត្តទាំងអស់នៅកម្ពុជា។
លោកស្រី យិន សុជាតិ ឲ្យដឹងថា ក្រុមហ៊ុននេះ លក់បាន១លានដុល្លារកាលពីឆ្នាំមុន ហើយមានបុគ្គលិកប្រហែល ១០០នាក់។ លោកស្រីបន្តថា៖ «ក្នុងឆ្នាំ២០១៣ យើងមានគម្រោងពង្រីកការលក់រហូតដល់ ១,៥លានដុល្លារហើយជ្រើសរើសបុគ្គលិកបន្ថែម»។
លោក Benoit Martineau ប្រធានប្រតិបត្តិការរបស់ Sanofi ប្រចាំនៅកម្ពុជា និងឡាវ និងជាសមាជិក Pharmagroup of the Eurocham ដែលទើបនឹងបង្កើតនាពេលថ្មីៗនេះបានឲ្យដឹងថា ឧស្សាហកម្មឱសថ មានកំណើនយ៉ាងសកម្មភាព។ការប៉ាន់ស្មានពីខាងក្រៅបង្ហាញថា គឺ៩ទៅ ១០ភាគរយ កាលពីប៉ុន្មានឆ្នាំចុងក្រោយនេះ។ លោកបន្ថែមថា បន្ទាប់ពីបើកដំណើរការនៅកម្ពុជាបានមួយឆ្នាំមក Sanofi Cambodia មានកំណើនជាពិសេសដោយសារការរីកចម្រើនខ្លាំងក្លានៅតាមបណ្តាខេត្ត។
លោកបានបន្ថែមថា នៅឆ្នាំនេះ ក្រុមហ៊ុនផ្តោតសំខាន់លើកំណើនបន្ថែម។ លោកបន្តថា៖ «កាលពីខែមករា យើងបានបង្កើនអ្នកតំណាងលក់ឱសថដល់ទ្វេដងនៅតាមខេត្ត។ យើងបានចុះដោយផ្ទាល់នៅគ្រប់ខេត្តទាំងអស់»។
លោក Benoit សង្ឃឹមថា ក្រុមហ៊ុនរបស់លោកនឹងចាក់គ្រឹះរឹងមាំនៅក្នុងទីផ្សារឱសថនៅកម្ពុជា ក្នុងឆ្នាំ២០១៣ ហើយនឹងមានដៃគូប្រកួតប្រជែងកាន់តែច្រើន។ ខណៈវៀតណាម និងថៃ មានការរីកចម្រើនគួរឲ្យកត់សម្គាល់ ក្នុងការផ្តល់សេវាថែទាំសុខភាពនិងការបង្កើតបទប្បញ្ញត្តិ ឧស្សាហកម្មឱសថនៅកម្ពុជាកំពុងស្ថិតក្រោមការអភិវឌ្ឍនៅឡើយ។ នេះបើតាមរបាយការណ៍ BMI។
កម្ពុជា នៅតែស្ថិតក្នុងចំណាត់ថ្នាក់ចុងក្រោយ ក្នុងចំណោមទីផ្សារសំខាន់ៗប្រចាំតំបន់អាស៊ីប៉ាស៊ីហ្វិករបស់ BMI។ BMI បានរាយការណ៍ថា៖ «ខណៈទីផ្សារទូទៅស្ថិតក្រោមការអភិវឌ្ឍដែលបង្ហាញពីឱកាសយូរអង្វែង អំពីពុករលួយ និងកង្វះអភិបាលកិច្ច បានកម្រិតសក្តានុពលទីផ្សារ»។ លោក Benoit ឲ្យដឹងថា៖
«កម្ពុជាជាទីផ្សារក្មេងខ្ចីមិនទាន់មានរបៀបរៀបរយ ដែលអាចនាំដល់ហានិភ័យកាន់តែខ្ពស់ ក្នុងការផលិតឱសថគ្មានស្តង់ដារ»។
លោក ស្រ៊ុន ម៉ាលីន មកពី Bayer បានចាត់ទុកឱសថក្លែងក្លាយ ជាហានិភ័យដ៏ធំផងដែរ។
ទីផ្សារងងឹតសម្រាប់ឱសថក្លែងក្លាយ បង្កការព្រួយបារម្ភដល់សហគ្រិន។ កាលពីប៉ុន្មានឆ្នាំថ្មីៗនេះ សារព័ត៌មានបានចេញផ្សាយអំពីឱសថមិនមានការចុះបញ្ជី និងការលក់ឱសថគ្មានស្តង់ដារខុសច្បាប់។ កាលពីខែកញ្ញា ឆ្នាំមុនឱសថក្លែងក្លាយរាប់ពាន់តោនត្រូវបានដុតបំផ្លាញ។
យោងតាមក្រសួងសុខាភិបាល បញ្ហាទាំងនោះ បានកែលម្អវិញហើយ។ នាយកដ្ឋានប្រឆាំងបទល្មើសសេដ្ឋកិច្ចនៃក្រសួងមហាផ្ទៃ បានប្រយុទ្ធប្រឆាំងនឹងការធ្វើពាណិជ្ជកម្មខុសច្បាប់។ មន្ត្រីសុខាភិបាលបានឲ្យដឹងថា ការចរាចរឱសថខុសច្បាប់បានថយចុះពី ០,៥ភាគរយ កាលពីឆ្នាំ២០១០ មកនៅត្រឹម ០,១៨ភាគរយ កាលពីឆ្នាំ២០១១។
លោកស្រី យិន មកពី CPE បានលើកឡើងថា៖ «មានការងារជាច្រើន ដែលត្រូវធ្វើដើម្បីធ្វើឲ្យឧស្សាហកម្មឱសថនៅកម្ពុជា មានកំណើន»៕ CS
