.jpg)
ក្រសួងពាណិជ្ជកម្មកម្ពុជា។ រូបថត ភ្នំពេញ ប៉ុស្តិ៍
ភ្នំពេញៈ ការធ្វើកំណែទម្រង់បានធ្វើឱ្យប្រាក់ចំណូលប្រចាំឆ្នាំ ២០២០ របស់ក្រសួងពាណិជ្ជកម្មធា្លក់ចុះជាង ៥០ ភាគរយបើធៀបនឹងឆ្នាំ ២០១៩។ នេះបើតាមរបាយការណ៍ប្រចាំឆ្នាំរបស់ក្រសួង។
របាយការណ៍ឱ្យដឹងថា ការសម្រេចអនុវត្តប្រព័ន្ធថ្មី និងការបញ្ចុះកម្រៃសេវាចុះបញ្ជីមួយចំនួនដើម្បីសម្រួលដល់ការធ្វើពាណិជ្ជកម្មបានធ្វើឱ្យចំណូលរបស់ក្រសួងពាណិជ្ជកម្មក្នុងឆ្នាំ ២០២០ សម្រេចបាន ១២,៧ លានដុល្លារធ្លាក់ចុះ ៥០,៨៣ ភាគរយធៀបឆ្នាំ ២០១៩ មានចំនួន ២៦,៦០ លានដុល្លារ។
របាយការណ៍ឱ្យដឹងទៀតថា ក្នុងចំណោមចំណូលជាង ១២ លានដុល្លារនេះ រួមមានចំណូលទទួលបានពីការចុះបញ្ជីពាណិជ្ជកម្មជាង ៤,៧៥ លានដុល្លារ និងចំណូលពីការផ្តល់វិញ្ញាបនបត្រប្រភពដើមទំនិញ និងការចេញអាជ្ញាប័ណ្ណ និងសេវាពាក់ព័ន្ធ ៥,៧៩ លានដុល្លារ។
ជាមួយគ្នានេះក្រសួងក៏បានទទួលចំណូលជាង ២ លានដុល្លារពីការចុះបញ្ជីម៉ាក និងសេវាពាក់ព័ន្ធ និងចំណូលពីការតម្កល់លិខិតជូនដំណឹងនៃប្រតិបត្តិការដែលមានកិច្ចធានាចំនួនជាង ៧៦ ៩៣២ ដុល្លារ។
ដោយឡែកចំណូលពីសេវារបស់អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) មាន ២១ ៨០៧ ដុល្លារ និងចំណូលពីកិច្ចការពិព័រណ៍ចំនួន ១០ ៤៩២ ដុល្លារ។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ ភ្នំពេញ ប៉ុស្តិ៍ថា ការធ្លាក់ចុះចំណូលប្រចាំឆ្នាំ ២០២០ ព្រោះក្រសួងបានដាក់ឱ្យអនុវត្តនូវប្រព័ន្ធថ្មី និងការបញ្ចុះកម្រៃសេវាចុះបញ្ជីមួយចំនួន។
លោកបន្ថែមថា ក្រសួងបានសម្រេចលុបចោលនូវការចេញវិញ្ញាបនបត្របញ្ជាក់ដើមកំណើតទំនិញ (CO) សម្រាប់ប្រទេសមិនមានតម្រូវការនាពេលកន្លងមក។ លោកថ្លែងថា៖ «ថ្មីៗនេះក្រសួងមិនតម្រូវឱ្យក្រុមហ៊ុននាំចេញមកសុំ CO ទៀតទេ បើប្រទេសនាំចូលគេមិនតម្រូវឱ្យមាន CO។ នេះជានិន្នាការសកលក្នុងការលុបបំបាត់ឯកសារមិនចាំបាច់មួយចំនួន»។
លោកបានបន្ថែមទៀតថា ការអនុវត្តពេញលេញការចុះបញ្ជីអ្នកនាំចេញតាមប្រព័ន្ធ REX របស់សហភាពអឺរ៉ុបគឺក្រុមហ៊ុន និងរោងចក្រដែលបានចុះឈ្មោះជាអ្នកនាំចេញអាចស្វ័យប្រកាសពីដើមកំណើតទំនិញ និងនាំចេញទំនិញបានដោយមិនតម្រូវឱ្យសុំ CO ពីក្រសួងពាណិជ្ជកម្មទៀតឡើយ។
អ្នកនាំពាក្យរូបនេះបានឱ្យដឹងទៀតថា ចំណុចទាំង ២ ខាងលើនេះបានធ្វើឱ្យចំនួន CO ដែលក្រសួងចេញជូនក្រុមហ៊ុនមានការធ្លាក់ចុះ។
ទន្ទឹមនឹងនេះការបញ្ចុះកម្រៃសេវាចុះបញ្ជីពាណិជ្ជកម្មចំនួន ៣ ប្រភេទក៏រួមចំណែកនាំឱ្យចំណូលរបស់ក្រសួងធ្លាក់ចុះផងដែរ។ ការបញ្ចុះកម្រៃសេវានេះ រួមមានកម្រៃសេវាចុះបញ្ជីក្រុមហ៊ុនថ្មីត្រូវបានបញ្ចុះពី ១ ៦៨០ ០០០ រៀលមកត្រឹម ១ ០១០ ០០០ រៀល កម្រៃសេវាចុះបញ្ជីសហគ្រាសថ្មីចុះពី ៣០០ ០០០ រៀល មក ១៨០ ០០០ រៀល និងកម្រៃសេវាពិនិត្យនាមករណ៍ចុះពី ៤០ ០០០ រៀល មក ២៥ ០០០ រៀល៕ LA
