ភ្នំពេញៈ ប្រទេសជប៉ុន ផ្តល់ជំនួយឥតសំណងដល់កម្ពុជាចំនួន ១ ១៣២ លានយ៉េន (១០,៨ លានដុល្លារ) សម្រាប់អនុវត្តគម្រោងអភិវឌ្ឍន៍ចរាចរណ៍នាវានៅកំពង់ផែស្វយ័តក្រុងព្រះសីហនុ ដើម្បីធ្វើឱ្យប្រសើរឡើងនូវសុវត្ថិភាពផ្លូវសមុទ្រ។ នេះបើតាមស្ថានទូតជប៉ុនប្រចាំនៅកម្ពុជា។
លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក MIKAMI Masahiro ឯកអគ្គរាជទូតជប៉ុនប្រចាំនៅកម្ពុជាបានចុះហត្ថលេខាលើលិខិតប្តូរសារស្តីពីការផ្តល់ហិរញ្ញប្បទានឥតសំណងរបស់ជប៉ុនកាលពីថ្ងៃទី ១ ខែមីនា។
សេចក្តីប្រកាសព័ត៌មានរបស់ស្ថានទូតជប៉ុនឱ្យដឹងថា ការផ្តល់ហិរញ្ញប្បទានឥតសំណងនេះគឺជាការឆ្លើយតបនឹងសំណើរបស់រាជរដ្ឋាភិបាលកម្ពុជា និងដើម្បីពង្រឹងទំនាក់ទំនងមិត្តភាពព្រមទាំងកិច្ចសហប្រតិបត្តិការរវាងជប៉ុន និងកម្ពុជា។ គម្រោងនេះនឹងបង្កើតប្រព័ន្ធចរាចរណ៍នាវា (VTS) ដើម្បីធ្វើឱ្យប្រសើរឡើងនូវសុវត្ថិភាពផ្លូវសមុទ្រ និងប្រសិទ្ធភាពការធ្វើនាវាចរនៅជុំវិញកំពង់ផែស្វយ័តក្រុងព្រះសីហនុ។
សេចក្តីប្រកាសព័ត៌មានបានបញ្ជាក់ថា៖ «យើងរំពឹងថា តាមរយៈលទ្ធផលនៃគម្រោងនេះ វិធានការសុវត្ថិភាពនៅកំពង់ផែក្រុងព្រះសីហនុ ការអភិវឌ្ឍសង្គម និងសេដ្ឋកិច្ចកម្ពុជា ព្រមទាំងការតភ្ជាប់ក្នុងតំបន់មេគង្គនឹងត្រូវបានលើកកម្ពស់»។
ការអភិវឌ្ឍសេដ្ឋកិច្ចរបស់កម្ពុជាកំពុងតែបន្ត ការលើកកម្ពស់គុណភាពជីវភាពរស់នៅរបស់ប្រជាជនម្នាក់ៗកាន់តែមានសារៈសំខាន់ណាស់ដែលស្របគ្នានឹងការអភិវឌ្ឍសេដ្ឋកិច្ចជាតិទាំងមូល។ ជប៉ុនមានបំណងបន្តគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាដោយប្រើប្រាស់គម្រោងអភិវឌ្ឍន៍សេដ្ឋកិច្ច និងសង្គមនានា។ នេះបើតាមសេចក្តីប្រកាសព័ត៌មាន។
ក្រសួងការបរទេសកម្ពុជាបានឱ្យដឹងថា ហិរញ្ញប្បទានឥតសំណងដែលផ្តល់ដោយរដ្ឋាភិបាលជប៉ុននឹងរួមចំណែកយ៉ាងសំខាន់ទៅដល់ការលើកកម្ពស់ការអភិវឌ្ឍសេដ្ឋកិច្ច និងសង្គមកម្ពុជាព្រមទាំងពង្រីកបន្ថែមទៀតនូវចំណងមិត្តភាព និងកិច្ចសហប្រតិបត្តិការរវាងប្រទេសទាំង ២។
ប្រធានសមាគមភ័ស្តុភារកម្មកម្ពុជាលោក ស៊ិន ចន្ធី ប្រាប់ ភ្នំពេញ ប៉ុស្តិ៍ថា ជំនួយនេះនឹងជួយធ្វើឱ្យប្រសើរឡើងនូវសេវាកម្មនៅកំពង់ផែក្រុងព្រះសីហនុស្របពេលកំពង់ផែនេះកំពុងប្រឈមនឹងការកកស្ទះ។
លោកបន្ថែមថា ដើម្បីសម្រួលដល់ការកកស្ទះទំនិញនៅក្នុងកំពង់ផែ សមាគមលោកធ្លាប់ស្នើសុំទៅអគ្គនាយកកំពង់ផែក្រុងព្រះសីហនុឱ្យបង្កើតប្រព័ន្ធតាមដានការមកដល់របស់កប៉ាល់ដឹកទំនិញ (Electric data enter change) ដើម្បីផ្តល់ភាពងាយស្រួលដល់អ្នកក្នុងវិស័យភ័ស្តុភារកម្ម និងដឹកជញ្ជូនដើម្បីទទួលបានព័ត៌មានជាក់លាក់ និងឆាប់រហ័ស។
លោកនិយាយថា៖ «ប្រព័ន្ធនេះអនុញ្ញាតឱ្យយើងទទួលបានព័ត៌មានច្បាស់លាស់អំពីការយឺតយ៉ាវ និងការពន្យារពេល ឬការផ្អាកកប៉ាល់។ យើងនឹងងាយស្រួលត្រៀមឯកសារផ្សេងៗសម្រាប់ទៅយកទំនិញចេញ បើយើងចំណាយពេលច្រើន យើងនឹងចំណាយថ្លៃដើមខ្ពស់ ដូច្នេះខ្ញុំសង្ឃឹមថា ជំនួយនេះនឹងជួយលើផ្នែកនេះ»។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញ (LOBA) រំពឹងថា ហិរញ្ញប្បទាននេះនឹងផ្តល់លទ្ធភាពបន្ថែមដល់កម្ពុជាក្នុងការពង្រីកកន្លែងស្តុកកុងតឺន័រ និងនាំចូលសម្ភារលើកដាក់ទំនិញឱ្យបានគ្រប់គ្រាន់ដើម្បីរួមចំណែកដោះស្រាយបញ្ហាកកស្ទះនៅកំពង់ផែក្រុងព្រះសីហនុ។
លោកនិយាយថា៖ «ជំនួយនេះនឹងជួយកាត់បន្ថយការកកស្ទះកុងតឺន័រនៅកំពង់ផែក្រុងព្រះសីហនុ»។
យោងតាមឯកសារផ្ញើទៅផ្សារមូលបត្រកម្ពុជា (CSX) កំពង់ផែស្វយ័តក្រុងព្រះសីហនុ (PAS) ដែលគ្រប់គ្រងដោយរដ្ឋបានរាយការណ៍ពីកំណើនដ៏រឹងមាំនៃប្រាក់ចំណូលសុទ្ធនៅត្រីមាសទី៤ ឆ្នាំមុនដោយកើន ១៥,៦ ភាគរយ សម្រេចបានប្រហែល ២,៧១៨ លានដុល្លារ ធៀបនឹង ២,៣៤៩ លានដុល្លារ នៅក្នុងរយៈពេលដូចគ្នានៃឆ្នាំ ២០១៩។ ប៉ុន្តែក្នុងអំឡុងត្រីមាសទី៤ ដដែលប្រាក់ចំណូលបានពីការលក់របស់កំពង់ផែមួយនេះបានធ្លាក់ចុះបន្តិចត្រឹម ៧,៥៩ ភាគរយ៕ LA