ភ្នំពេញៈ កំពង់ផែស្វយ័ត ២ ដែលបានចុះបញ្ជីនៅផ្សារមូលបត្រកម្ពុជាបានរាយការណ៍ពីប្រតិបត្តិការអាជីវកម្មដ៏រឹងមាំរបស់ខ្លួនក្នុងឆ្នាំកន្លងទៅមុនពេលមានការរីករាលដាលជំងឺកូវីដ ១៩ បានផ្ទុះឡើង។
យោងតាមឯកសារដែលផ្ញើទៅផ្សារហ៊ុនមូលបត្រកម្ពុជាកាលពីថ្ងៃចន្ទ កំពង់ផែស្វយ័តភ្នំពេញ (PPAP) បានបង្ហាញការលក់ ២៧,១៩ លានដុល្លារ កាលពីឆ្នាំ ២០១៩ ដោយកើនឡើង ៣១,៤៣ ភាគរយបើធៀបនឹងឆ្នាំ ២០១៨។ ប្រាក់ចំណេញប្រតិបត្តិការបានកើនឡើងជិត ៧៩ ភាគរយដល់ ១៥,៨ លានដុល្លារ ខណៈដែល PPAP រកប្រាក់ចំណេញសុទ្ធបាន ១១,៥៥ លានដុល្លារកើនឡើង ៤២,៨៤ ភាគរយ។
ជាមួយគ្នានេះកំពង់ផែស្វយ័តព្រះសីហនុ (SAP) ក៏បានប្រកាសការកើនឡើងប្រាក់ចំណូលរបស់ពួកគេកាលពីឆ្នាំ ២០១៩ ដែរ។ ប្រាក់ចំណូលបានកើនឡើង ២១,១៧ ភាគរយ ដល់ ៨៣,៤៨ លានដុល្លារជាមួយនឹងប្រាក់ចំណេញប្រតិបត្តិការកើនឡើងជិត ២៧ ភាគរយដល់ ២០,៣៤ លានដុល្លារ។
លោក Jong Weon Ha អនុប្រធានក្រុមហ៊ុនផ្សារមូលបត្រកម្ពុជា (CSX) បានប្រាប់ភ្នំពេញប៉ុស្ដិ៍ថា កំពង់ផែស្វយ័តចំនួន ២ នេះដែលបានចុះបញ្ជីនៅផ្សារមូលបត្រកម្ពុជា (CSX) ទើបនឹងបានប្រកាសការកើនឡើងប្រាក់ចំណូលរបស់ពួកគេកាលពីឆ្នាំ ២០១៩។ យោងតាមការបង្ហាញពី PPAP និង PAS ក្រុមហ៊ុនទាំង ២ នេះបង្ហាញប្រាក់ចំណេញគួរឲ្យកត់សម្គាល់កាលពីឆ្នាំ ២០១៩។
លោកថ្លែងថា៖ «លទ្ធផលនេះបានមកពីការកើនឡើងបរិមាណទំនិញ និងកុងតឺន័រក្នុងអំឡុងពេលនោះ។ ទោះយ៉ាងណាប្រាក់ចំណេញសុទ្ធបានធ្លាក់ចុះបនិ្តចដោយសារតែការកើនឡើងការចំណាយពន្ធលើប្រាក់ចំណូលដែលបានពន្យារពេល»។
ទន្ទឹមនឹងការរីករាលដាលកូវីដ ១៩ នៅតែរីករាលដាលដល់បណ្ដាប្រទេសជាច្រើនជុំវិញពិភពលោក និងតំបន់ដែលធ្វើឲ្យរងផលប៉ះពាល់ខ្លាំងដល់ផ្សារហ៊ុន ក្រុមហ៊ុនផ្សារមូលបត្រកម្ពុជានៅតែរាយការណ៍ការធ្លាក់ចុះខ្លាំងនៃសកម្មភាពជួញដូរចាប់តាំងពីខែកុម្ភៈមក។
លោកថ្លែងថា៖ «ផ្សារហ៊ុនជុំវិញពិភពលោកត្រូវបានរងផលប៉ះពាល់ដោយសារជំងឺនេះ។ សម្រាប់ប្រទេសកម្ពុជាចាប់ពីពាក់កណ្ដាលខែកុម្ភៈ សន្ទស្សន៍ CSX បានធ្លាក់ចុះប្រហែល ១៦ ភាគរយ។ ទោះបីជាការជួញដូរមិនសកម្មក៏ដោយ មិនមានអ្វីសំខាន់ត្រូវនិយាយនោះទេ»។
លោកបន្ថែមថា៖ «តាមការយល់ឃើញរបស់ខ្ញុំផលប៉ះពាល់នេះនឹងមានរយៈពេលខ្លី ហើយវានឹងស្ទុះងើបឡើងវិញនៅពេលអនាគតដ៏ខ្លី។ ឧទាហរណ៍ ទីផ្សារហ៊ុនសំខាន់ៗជុំវិញពិភពលោកដូចជាផ្សារហ៊ុន Nikkei 225 ផ្សារហ៊ុន Dow Jones ផ្សារហ៊ុន S&P 500 KOSPI Composite Index ផ្សារហ៊ុន NASDAQ Composite បានចាប់ផ្ដើមស្ទុះងើបឡើងវិញហើយ។ ខ្ញុំនៅតែគិតថា នេះជាឱកាសដ៏ល្អក្នុងការទិញភាគហ៊ុននៅក្នុងតម្លៃកាន់តែទាប»។
លោកបន្តថា សម្រាប់ CSX ក្នុងអំឡុងពេល ២-៣ សប្ដាហ៍ចុងក្រោយនេះ សន្ទស្សន៍ CSX ពិតជាមានស្ថិរភាព ទោះបីជាបានរាយការណ៍ករណីថ្មីការរកឃើញជំងឺកូវីដ១៩ ក៏ដោយ។
លោកលើកឡើងថា៖ «ដូចដែលខ្ញុំបានលើកឡើងអ៊ីចឹង ខ្ញុំគិតថាផលប៉ះពាល់មានរយៈពេលខ្លី និងមិនមានភាពស្មុគស្មាញណាមួយក្នុងរយៈពេលវែងនោះទេ។ ទីផ្សារនេះនឹងស្ទុះងើបឡើងវិញដល់តម្លៃខាងក្នុងរបស់ខ្លួន នៅពេលស្ថានការណ៍ធូរស្រាលឡើងវិញ»។
យោងតាមទិន្នន័យរបស់ CSX តម្លៃផ្សារហ៊ុន ៣ នៅក្នុងចំណោម ៥ បានធ្លាក់ចុះដោយសារតែការបិទការជួញដូរនៅថ្ងៃម្សិលមិញ តម្លៃភាគហ៊ុនរបស់ក្រុមហ៊ុន PPAP បានធ្លាក់ចុះមកនៅត្រឹម ១០ ៧០០ រៀលដែលបិទការជួញដូរក្នុងតម្លៃ ១០០ រៀល ចំណែកតម្លៃភាគហ៊ុនក្រុមហ៊ុនតំបន់សេដ្ឋកិច្ចពិសេសភ្នំពេញ (PPSP) បានធ្លាក់ចុះមកនៅត្រឹម ២ ៣១០ រៀលដែលបិទការជួញដូរក្នុងតម្លៃ ២០ រៀល និងក្រុមហ៊ុន PAS បានធ្លាក់ចុះមកនៅត្រឹម ១៣ ១៤០ រៀលដែលបិទការជួញដូរក្នុងតម្លៃក្រោម ២០ រៀល។ ម្យ៉ាងវិញទៀតតម្លៃភាគហ៊ុនក្រុមហ៊ុន PWSA បានកើនឡើងដល់ ៥ ៩៦០ រៀល។ មិនមានការជួញដូរសម្រាប់ភាគហ៊ុនក្រុមហ៊ុន GTI នោះទេកាលពីថ្ងៃម្សិលមិញ។
តម្លៃសន្ទស្សន៍ CSX បានធ្លាក់ចុះចំនួន ០,០៨ ភាគរយ មកនៅត្រឹម ៥៩០,៦៣ ពិន្ទុ និងតម្លៃជួញដូរគឺ ១៩,៦៣ រៀល៕ LA