ភ្នំពេញៈ ការជួសជុលឡើងវិញនៃកំពង់ផែទេសចរណ៍អន្តរជាតិដែលស្ថិតនៅតំបន់ឆ្នេរសមុទ្រក្នុងខេត្តកែបនាពេលនេះសម្រេចបានប្រមាណជាង ៣០ ភាគរយហើយ ខណៈការសាងសង់គ្រោងនឹងបញ្ចប់ទាំងស្រុងនៅចុងឆ្នាំ ២០២០ នេះ។ នេះបើតាមអភិបាលខេត្តកែប។
ថ្លែងប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍លោក កែន សត្ថា អភិបាលខេត្តកែប បានឲ្យដឹងថា គម្រោងជួសជុលកំពង់ផែទេសចរណ៍ដែលមានតម្លៃប្រមាណ ១ លានដុល្លារនេះកំពុងដំណើរការទៅមុខយ៉ាងរលូន ដោយការសាងសង់ដល់ពេលនេះបានជាង ៣០ ភាគរយហើយ និងគ្រោងបញ្ចប់ក្នុងខែធ្នូ ឆ្នាំ ២០២០។
លោកបន្តថា កំពង់ផែនេះនឹងចូលរួមចំណែកយ៉ាងសំខាន់ក្នុងការជួយលើកកម្ពស់កម្រិតជីវភាពរបស់ប្រជាជននៅក្នុងតំបន់តាមរយៈការបង្កើនភាពទាក់ទាញភ្ញៀវទេសចរពីប្រទេសជិតខាង និងប្រជាជនក្នុងស្រុកឲ្យធ្វើដំណើរមកកម្សាន្តក្នុងខេត្តកែប និងអាចបង្កើនការលក់ផលិតផលសមុទ្របានកាន់តែច្រើន។
លោកថ្លែងថា៖ «បច្ចុប្បន្នយើងកំពុងសាងសង់កំពុងផែស្តង់ដាទេសចរណ៍មួយដែលអាចអនុញ្ញាតឲ្យនាវាទេសចរណ៍ទំនើបៗផ្ទុកអ្នកដំណើរពី ២០០-៣០០ នាក់ ពីប្រទេសជិតខាងចូលមកចតបាន»។
កំពង់ផែនេះត្រូវបានរដ្ឋាភិបាលសាងសង់ឡើងនាអំឡុងដើមទសវត្សរ៍ឆ្នាំ ៩០ ដើម្បីបម្រើដល់ការប្រើប្រាស់របស់សហគមន៍ក្នុងតំបន់តែប៉ុណ្ណោះ។ នេះបើតាមលោក កែន សត្ថា។
លោកលើកឡើងទៀតថា ពេលនេះអាជ្ញាធរខេត្តក៏កំពុងរៀបចំផែនការមេដើម្បីអភិវឌ្ឍតំបន់ទេសចរណ៍ជាច្រើន ដូចជាតំបន់ឆ្នេរ ការកសាងហេដ្ឋារចនាសម្ព័ន្ធ និងកន្លែងស្នាក់នៅ។
របាយការណ៍របស់រដ្ឋបាលខេត្តកែបបានឲ្យដឹងថា កាលពីឆ្នាំ ២០១៩ ខេត្តជាប់មាត់សមុទ្រនេះទទួលបានភ្ញៀវទេសចរសរុប ១,៧៤ លាននាក់។
យោងតាមលោក ម៉ម ទូច ប្រធានមន្ទីរសាធារណការ និងដឹកជញ្ជូនខេត្តកែប បានឲ្យដឹងថា កំពង់ផែដែលស្ថិតនៅក្បែរកោះទន្សាយនេះមានទំហំ ៣៤០០ ម៉ែត្រការ៉េ និងត្រូវបានជួសជុលដោយក្រសួងសាធារណការ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានប្រាប់ថា ខេត្តកែបមិនត្រឹមតែមានឆ្នេរសមុទ្រស្អាត និងបរិស្ថានស្រស់បំព្រងដោយមានតំបន់ព្រៃកោងកាងប៉ុណ្ណោះទេ ប៉ុន្តែទីនោះក៏មានអាហារសមុទ្រស្រស់ៗទៀតផង។ លោកស្រីបន្តថា នៅពេលមានកំពង់ផែនឹងមានការរៀបចំដំណើរទស្សនកិច្ចតាមផ្លូវសមុទ្រទៅកាន់ទីនោះជាមិនខាន។
លោកស្រីបន្ថែមថា ខណៈចំនួនភ្ញៀវទេសចរកំពុងធ្លាក់ចុះនៅគ្រប់ទីកន្លែងលើពិភពលោកដែលរួមទាំងកម្ពុជាដែរនោះពេលនេះក្រសួងទេសចរណ៍កម្ពុជាក៏កំពុងរៀបចំនូវគោលនយោបាយទេសចរណ៍ថ្មីៗបន្ថែមទៀតក្នុងការពង្រឹងភាពទាក់ទាញ ជាពិសេសការរក្សាអនាម័យ និងការកំណត់តម្លៃសេវាកម្មទេសចរណ៍ជាដើម៕