ភ្នំពេញ: ក្រសួងកសិកម្មបានបញ្ចេញកញ្ចប់ថវិកាជាង ៤,៥ លានដុល្លារ ដែលជាកញ្ចប់ហិរញ្ញវត្ថុសម្រាប់គាំទ្រការអភិវឌ្ឍ វារីវប្បកម្មដល់កសិករនៅទីជនបទ ដើម្បីជំរុញចង្វាក់ផលិតកម្ម ផ្គត់ផ្គង់ត្រីទៅកាន់ទីផ្សារក្នុងស្រុក កាន់តែច្រើន បន្ថយផលប៉ះពាល់ ដោយសារការរាតត្បាតជំងឺកូវីដ ១៩។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទប្រាប់ភ្នំពេញប៉ុស្តិ៍កាលពីថ្ងៃចន្ទថា ឆ្លើយតបទៅនឹងសារាចរណែនាំរបស់រដ្ឋាភិបាលស្តីពីការបង្កើនយុទ្ធនាការជំរុញផលិតកម្មកសិកម្មក្នុងស្ថានភាពរងផលប៉ះពាល់ជាសកលដោយសារជំងឺកូវីដ ១៩ រដ្ឋបាលជលផលនៃក្រសួងកសិកម្មទទួលបានហិរញ្ញប្បទានពីដៃគូអភិវឌ្ឍន៍ និងថវិការបស់រដ្ឋាភិបាលផ្ទាល់សរុបជាង ៤,៦៨ លានដុល្លារ ដើម្បីចាប់ផ្តើមសកម្មភាពចុះជួយដល់កសិករចិញ្ចឹមកង្កែប និងត្រីអណ្តែងជាង ៦ ០០០ គ្រួសារនៅទូទាំងប្រទេស។
លោកបន្តថា កម្មវិធីនេះគាំទ្រគម្រោងចិញ្ចឹមត្រីអណ្តែង និងកង្កែបក្នុងតង់ប្លាស្ទិកដោយប្រើរយៈពេលខ្លីដល់កសិករក្នុងខេត្តចំនួន ១០ រួមមានៈ ខេត្តរតនគិរី មណ្ឌលគិរី ព្រះវិហារ ឧត្តរមានជ័យ កំពត ព្រះសីហនុ ត្បូងឃ្មុំ ស្វាយរៀង កំពង់ស្ពឺ និងខេត្តប៉ៃលិន។
លោកបន្ថែមថា៖ «កញ្ចប់ថវិកាពិសេសរបស់រដ្ឋាភិបាលនេះនឹងផ្តោតលើកសិករចំនួន ១ ០០០ គ្រួសារ ដែលចិញ្ចឹមត្រីអណ្តែង និងកសិករចិញ្ចឹមកង្កែបចំនួន ៧០០ គ្រួសារព្រមទាំងពង្រឹងសមត្ថភាពកសិករផលិតកូនត្រីពូជចំនួន ៥០ គ្រួសារ»។
លោកឲ្យដឹងថា ក្រសួងកសិកម្មទទួលបានហិរញ្ញប្បទានផ្សេងទៀតចំនួន ១ ១២៩ ៧៩៧ ដុល្លារ លើគម្រោងគាំទ្រកសិករចិញ្ចឹមត្រីអណ្តែងចំនួន ១ ០០០ គ្រួសារ និងចិញ្ចឹមកង្កែប ១ ០០០ គ្រួសារ ហើយគាំទ្រដល់កសិករផលិតកូនត្រីអណ្តែងចំនួន ២០ គ្រួសារ និងកូនកង្កែបចំនួន ៣៥ គ្រួសារ។
គម្រោងនេះផ្តោតលើចំនួន ១០ រួមមានៈ ខេត្តតាកែវ កំពង់ចាម បាត់ដំបង សៀមរាប ពោធិ៍សាត់ ព្រៃវែង កណ្តាល កំពង់ឆ្នាំង កំពង់ធំ និងខេត្តបន្ទាយមានជ័យ។
លោកបន្ថែមថា គម្រោងនេះទទួលបានហិរញ្ញប្បទានពីសហភាពអឺរ៉ុប និងគ្រប់គ្រងគម្រោងដោយភ្នាក់ងារអភិវឌ្ឍន៍បារាំង (AFD) ដែលជាគម្រោងជំរុញវារីវប្បកម្មតាមជនបទឆ្លើយតបនឹងជំងឺរាតត្បាតជំងឺកូវីដ១៩។
គម្រោងនេះត្រូវបានអនុវត្តតាមរយៈកម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ននៃផ្នែកវារីវប្បកម្មនៅកម្ពុជា (Cap-Fish វារីវប្បកម្ម) រយៈពេល ១ ឆ្នាំ។
រដ្ឋបាលជលផលក៏បានដាក់សំណើទៅធនាគារពិភពលោកស្នើសុំហិរញ្ញប្បទានសម្បទានដែលមានទឹកប្រាក់ចំនួន ៣ ០៥៩ ៦២០ ដុល្លារ សម្រាប់គម្រោងការពង្រឹងវារីវប្បកម្មកម្ពុជាក្នុងអំឡុងពេល និងក្រោយពេលនៃការរីករាលដាលជំងឺកូវីដ១៩។ នេះបើតាមលោករដ្ឋមន្ត្រី។
គម្រោងខាងលើនេះនឹងពង្រឹងផ្នែកបច្ចេកទេសដល់កសិករចិញ្ចឹមត្រីអណ្តែង និងកង្កែបក្នុងតង់ប្លាស្ទិកចំនួន ២ ០០០ គ្រួសារ ព្រមទាំងជួយឧបត្ថម្ភដល់កសិករផលិតខ្នាតមធ្យមចំនួន ២៦០ គ្រួសារ។
លោកឲ្យដឹងថា មន្ត្រីជំនាញនឹងជួយរៀបចំការចិញ្ចឹមរបស់កសិករបណ្តាក់គ្នា ដើម្បីចៀសវាងការផលិតលើសតម្រូវការទីផ្សារ។
លោកថ្លែងថា៖ «ការចិញ្ចឹមត្រីអណ្តែង និងកង្កែបវាឲ្យផលភ្លាមៗដែលជាឱកាសមាសសម្រាប់កសិករចិញ្ចឹមដើម្បីរកប្រាក់ចំណូលប្រចាំ»។
លោក ភួង ភារុន ម្ចាស់កសិដ្ឋានចិញ្ចឹមត្រីអណ្តែង និងកង្កែបពូជ ស្ថិតនៅស្រុកស្អាង ខេត្តកណ្តាល ប្រាប់ភ្នំពេញប៉ុស្តិ៍ថា ការទម្លាក់កញ្ចប់ថវិកានាពេលនេះនឹងជួយជំរុញតម្រូវការកូនត្រី និងកង្កែបកាន់តែច្រើន។
លោកសម្គាល់ថា តម្រូវការកូនកង្កែប និងត្រីអណ្តែងកើនឡើងនៅប៉ុន្មានឆ្នាំចុងក្រោយ ប៉ុន្តែការនាំចូលត្រីពីប្រទេសជិតខាងជាឧបសគ្គដល់ការអភិវឌ្ឍវារីវប្បកម្មក្នុងប្រទេស។
លោកនិយាយថា៖ «កសិករកាន់តែច្រើនមានការយល់ដឹងបច្ចេកទេសចិញ្ចឹម ហើយពួកគាត់មានការចាប់អារម្មណ៍ចាប់របរនេះកាន់តែច្រើន»។
លោកសម្គាល់ថា ចាប់តាំងពីមានការបិទច្រកព្រំដែនជាមួយប្រទេសជិតខាងកន្លងមក កសិដ្ឋានជាច្រើនបង្កើនការចិញ្ចឹមត្រី និងកង្កែប ដើម្បីផ្គត់ផ្គង់ទីផ្សារក្នុងស្រុក ដែលកំពុងមានតម្រូវការខ្ពស់ក្នុងអំឡុងពេលរីករាលដាលវីរុសកូរ៉ូណា។
លោក ភារុន លក់ចេញកូនត្រីប្រមាណ ៨ ០០០ ក្បាល និងកង្កែប ៥ ០០០ ជាមធ្យមក្នុង ១ ខែ។
លោកនិយាយថា៖ «ឥឡូវខ្ញុំលក់ដាច់ខ្លាំង បងប្អូនខ្មែរយើងគាំទ្រច្រើន គាត់ទិញយកទៅចិញ្ចឹមសម្រាប់លក់នៅទីផ្សារក្នុងស្រុកយើង»។
របាយការណ៍ក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ការប្រមូលផលនេសាទទឹកសាបតាមរយៈដាយត្រី ដែននេសាទ និងលក្ខណៈ គ្រួសារតាមប្រភពផ្សេងៗមានតាមវាលស្រែជាដើមកាលពីឆ្នាំ ២០១៩ សម្រេចបានបរិមាណ ៤៧៨ ៨៥០ តោន និងនេសាទសមុទ្រ សម្រេចបាន ១២២ ២៥០ តោន។
ចំណែកផ្នែកវារីវប្បកម្ម ការចិញ្ចឹមត្រី និងបង្គាសម្រេចបានប្រមាណ ៣០៧ ៤០៨ តោន។ ផលនេសាទកែច្នៃមាន ៤ ៩១០ តោនធៀបនឹងឆ្នាំ ២០១៨ ថយចុះចំនួន ៩០ តោន៕ LA