.jpg)
សកម្មភាពកម្មករ បញ្ជាគ្រឿងចក្រលើកដាក់អង្ករក្នុងឃ្លាំងស្តុកមួយក្នុងរាជធានីភ្នំពេញនាពេលកន្លងមក។ ហេង ជីវ័ន
ភ្នំពេញ: ក្រសួងកសិកម្ម រុក្ខាប្រមាញ់ និងនេសាទបានប្រកាសឲ្យដឹងថា អ្នកនាំចេញអង្ករ និងផលិតផលកសិឧស្សាហកម្មអាចមកដាក់ពាក្យស្នើសុំត្រួតពិនិត្យភូតគាមអនាម័យនៅច្រកចេញចូលតែមួយនៅអគ្គនាយកដ្ឋានកសិកម្ម។ នេះបើតាមអ្នកនាំពាក្យក្រសួងបានឲ្យដឹងកាលពីថ្ងៃពុធ។
ការសម្រេចនេះធ្វើឡើងតាមសំណើរបស់សហព័ន្ធស្រូវអង្ករកម្ពុជាដែលបានស្នើកាលពីសប្តាហ៍មុន។
លោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ពីមុនគ្រប់អ្នកនាំចេញត្រូវដាក់សើ្នសុំពិនិត្យភូតគាមអនាម័យនៅច្រកចេញចូលតែមួយដែលមានទីតាំងក្នុងបរិវេណក្រុមប្រឹក្សាអភិវឌ្ឍន៍កម្ពុជា ប៉ុន្តែសព្វថ្ងៃនេះពួកគេអាចមកដាក់នៅអគ្គនាយកដ្ឋានកសិកម្ម។ លោកបន្តថា៖ «មូលហេតុគឺដោយសារក្រសួងពាក់ព័ន្ធមួយចំនួនបានធ្វើទំនើបកម្មដោយចុះបញ្ជីតាមប្រព័ន្ធអនឡាញ ដូច្នេះវាមិនមានភាពស្មុគស្មាញទៀតទេ ហើយអ្នកនាំចេញនឹងបានប្រយោជន៍ច្រើន»។
លោក ហ៊ុន ឡាក់ អគ្គនាយកក្រុមហ៊ុន Longmate Agriculture Co Ltd ជាក្រុមហ៊ុននាំចេញចេកអំបូងលឿងផ្ទាល់ទៅប្រទេស ចិន បានឲ្យដឹងថា ក្រុមហ៊ុនលោកគាំទ្រសេចក្តីសម្រេចនេះ ដែលវានឹងធ្វើឲ្យប្រសើរឡើងក្នុងការសម្រួលដល់ពាណិជ្ជកម្ម។ លោកថ្លែងថា៖ «ការសម្រេចដ៏ត្រឹមត្រូវដែលយើងចង់បាន ហើយយើងគាំទ្រការសម្រេចនេះ។ វានឹងជួយសម្រួលដល់ការនាំចេញរបស់យើងកាន់ងាយស្រួល និងរហ័ស»។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានប្រាប់ភ្នំពេញប៉ុស្តិ៍កាលពីថ្ងៃពុធថា ការសម្រេចនេះនឹងជួយជំរុញភាពប្រកួតប្រជែងក្នុងវិស័យស្រូវអង្គរ។ លោកថ្លែងថា៖ «វាចំណេញពេលវេលា និងកាត់បន្ថយភាពស្មុគស្មាញចំពោះអ្នកនាំចេញអង្ករ ហើយការនាំចេញនឹងលឿនជាងពីមុន»។
លោកបន្ថែមថា បច្ចុប្បន្នក្រសួងពាណិជ្ជកម្មបានធ្វើទំនើបកម្មដោយចុះបញ្ជីបញ្ជាក់ប្រភពដើមទំនិញ (CO) តាមប្រព័ន្ធអនឡាញ ខណៈអគ្គនាយកដ្ឋានគយ និងរដ្ឋាករកម្ពុជាក៏តម្រូវឲ្យបំពេញវិញ្ញាបនបត្រអនាម័យ និងភូតគាមអនាម័យតាមប្រព័ន្ធអនឡាញផងដែរ។
ការនាំចេញអង្ករកម្ពុជាទៅកាន់ទីផ្សារអន្តរជាតិកាលពីឆ្នាំមុនមានចំនួន ៦២០ ១០៦ តោន ធ្លាក់ចុះជិត ១ ភាគរយ បើធៀបនឹងឆ្នាំ ២០១៨ ដែលមាន ៦២៦ ២២៥ តោន។ នេះបើតាមសហព័ន្ធស្រូវអង្ករកម្ពុជា។
ដោយឡែកការនាំចេញអង្ករកម្ពុជាមានតម្លៃសរុប ៥០១ លានដុល្លារ កាលពីឆ្នាំមុនធ្លាក់ចុះ ៤,៣ ភាគរយ បើធៀននឹងឆ្នាំ ២០១៨។
តួលេខបង្ហាញទៀតថា ការនាំចេញទៅចិនមានចំណែក ៤០,៧៣ ភាគរយ ស្មើនឹង ២៤៨ ១០៥ តោន ទីផ្សារអឺរ៉ុប ៣២,០១ ភាគរយ ស្មើនឹង ២០២ ៩៩០ តោន តំបន់អាស៊ាន ៨៣ ១៦៤ តោន(១៣,៤១ ភាគរយ) និងទិសដៅផ្សេងទៀត ៨៥ ៨៤៧ តោន (១៣,៨៤ ភាគរយ)។
កម្ពុជាការនាំចេញស្រូវទៅទីផ្សារវៀតណាម ២,១៥ លានតោនកាលពីឆ្នាំមុន។ នេះបើយោងតាមរបាយការណ៍បង្ហាញក្រសួងកសិកម្ម។
សហព័ន្ធស្រូវអង្ករកម្ពុជាបានឲ្យដឹងថា កម្ពុជានាំចេញអង្ករទៅកាន់ទីផ្សារអន្តរជាតិបានចំនួន ៥០ ៤៥០ តោន មានតម្លៃ ៣៩ លានដុល្លារ សម្រាប់ខែមករា ឆ្នាំ ២០១០ ធ្លាក់ចុះ ១៥,៣៩ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩។ របាយការណ៍បង្ហាញថា ការនាំចេញអង្ករកម្ពុជាទៅកាន់សហភាពអឺរ៉ុបកាលពីខែមុនធ្លាក់ចុះ ៥ ២៦៩ តោន (២២ ភាគរយ) បើធៀបនឹងខែមករាឆ្នាំមុនចាប់តាំងពីសហភាពអឺរ៉ុបអនុវត្តន៍របាំងពន្ធគយកាលពីឆ្នាំមុនចំពោះការនាំចេញអង្ករពីកម្ពុជា។
ទន្ទឹមនឹងនេះការនាំចេញអង្ករទៅទីផ្សារប្រទេសចិនក៏ធ្លាក់ ៣ ៦៦៤ តោន (២០ ភាគរយ) បើធៀបនឹងរយៈពេលដូចគ្នាកាលពីឆ្នាំមុន៕LA
