.jpg)
អង្ករដែលដាក់លក់នៅក្រៅប្រទេសដោយប្រើនិមិត្តសញ្ញាអង្គរវត្ត តែដាក់ថាជាផលិតផលថៃ។ ពី ហ្វេស ប៊ុក
ភ្នំពេញៈ សហព័ន្ធស្រូវអង្ករកម្ពុជា (CRF) នឹងសហការជាមួយក្រសួងពាណិជ្ជកម្ម ដើម្បីស៊ើបអង្កេតពីការកន្លែងបន្លំផលិតផលអង្កររបស់កម្ពុជាដោយប្រើប្រាស់រូបប្រាសាទអង្គរវត្តជាឡូហ្គោ។
វិធានការនេះធ្វើឡើង ខណៈរដ្ឋមន្ដ្រីក្រសួងព័ត៌មានកាលពីថ្ងៃពុធបង្ហោះលើហ្វេសប៊ុករបស់លោកនូវរូបភាពអង្ករដែលលក់នៅទីផ្សារអាមេរិកដោយដាក់រូបប្រាសាទអង្គរវត្តនៅលើបាវអង្ករ ប៉ុន្តែសរសេរថាជា «ផលិតផលរបស់ថៃ»។
លោក មូល សារិទ្ធិ អគ្គលេខាធិការសហព័ន្ធស្រូវអង្ករកម្ពុជាបានថ្លែងថា សហព័ន្ធស្រូវអង្ករកម្ពុជាទើបតែបានដឹងពីករណីនេះ ហើយនឹងសហការជាមួយក្រសួងពាណិជ្ជកម្មដើម្បីស៊ើបអង្កេតក្រុមហ៊ុនចែកចាយនេះ។
លោកថ្លែងថា៖ «ពេលនេះយើងកំពុងសហការជាមួយក្រសួងពាណិជ្ជកម្ម ដើម្បីស៊ើបអង្កេតលើករណីនេះនៅពេលនេះយើងមិនអាចនិយាយថាវាចេញមកពីប្រទេសណាមួយ ឬនរណាធ្វើវានោះទេ»។ លោកបន្តថា៖ «យើងនឹងធ្វើការងារជាមួយស្ថានទូតកម្ពុជា ដើម្បីស្វែងរកក្រុមហ៊ុនចែកចាយ និងទីតាំង»។
ប៉ុន្តែ CRF ថាករណីនេះនឹងមិនទាន់ធ្វើឲ្យខូចប្រយោជន៍ដល់ឧស្សាហកម្មស្រូវអង្ករកម្ពុជានៅឡើយទេ។ លោកថ្លែងថា៖ «យើងទើបតែទទួលបានព័ត៌មាននេះជាលើកដំបូងប៉ុណ្ណោះ ខ្ញុំគិតថាវាមិនអាចធ្វើឲ្យខូចប្រយោជន៍ដល់ការនាំចេញអង្កររបស់យើងនោះទេ ដោយសារយើងមានការគ្រប់គ្រងលើយីហោ និងឡូហ្គោអង្កររបស់យើងព្រមទាំងការត្រួតពិនិត្យគុណភាពផងដែរ»។
រដ្ឋមន្ដ្រីក្រសួងព័ត៌មានកាលពីថ្ងៃពុធបានអំពាវនាវដល់ស្ថានទូតកម្ពុជាប្រចាំនៅអាមេរិកត្រូវស៊ើបអង្កេតករណីនេះដើម្បីឲ្យក្រសួងពាណិជ្ជកម្មចាត់វិធានការលើករណីនេះ។
លោក សុង សារ៉ន អគ្គនាយកក្រុមហ៊ុនរោងម៉ាស៊ីនកិនស្រូវ AMRU Rice Co.Ltd បានឲ្យដឹងថាការក្លែងក្លាយឡូហោ្គ ឬផលិតផលបានកើតឡើងយូរមកហើយ ជាពិសេសនៅទីផ្សារអាមេរិក សហភាពអឺរ៉ុប និងបណ្ដាប្រទេសផ្សេងទៀត។ លោកថ្លែងថា៖ «យើងធ្លាប់ជូនដំណឹងដល់រដ្ឋាភិបាលអំពីករណីក្លែងបន្លំនេះរួចហើយដែរ ប៉ុន្តែរដ្ឋាភិបាលមិនមានវិធានការនោះទេ»។
លោកបានបញ្ជាក់ថា៖ «ក្រសួងពាណិជ្ជកម្ម និងស្ថានទូតកម្ពុជាគួរតែរកឲ្យឃើញ ដើម្បីស្វែងរកថា នរណានៅពីក្រោយដែលវាកើតឡើងច្រើនដងហើយ លើទីផ្សារអន្តរជាតិ»។
លោកបន្តថា៖ «បើវានៅតែបន្ត វានឹងប៉ះពាល់ដល់ទីផ្សាររបស់យើង ដោយសារតែអតិថិជនយល់ច្រឡំ ហើយលែងទុកចិត្តលើផលិតផលរបស់យើង»។
លោក ឡុង កែមវិចិត្រ អ្នកនាំពាក្យក្រសួងពាណិជ្ជកម្មបានថ្លែងថា ក្រសួងក៏បានដឹងករណីនេះដែរហើយកំពុងធ្វើការស៊ើបអង្កេត។
តាមទិន្នន័យរដ្ឋាភិបាលការនាំចេញអង្កររបស់កម្ពុជារយៈពេល ៤ ខែដំបូងឆ្នាំនេះមានចំនួនសរុប ១៩៧ ៣៥៤ តោនធៀបនឹង ២១២ ៣៩៤ តោនដែលបាននាំចេញក្នុងរយៈពេលដូចគ្នាកាលពីឆ្នាំមុន។
ជាមួយគ្នានេះដែរក្រសួងពាណិជ្ជកម្មកាលពីថ្ងៃម្សិលមិញបានចេញសេចក្តីប្រកាសព័ត៌មានមួយស្តីពីបញ្ហានេះដោយបានលើកឡើងថា តាមការស្រាវជ្រាវដំបូងរបស់ក្រសួងទំនិញអង្ករដែលបានដាក់រូបប្រាសាទអង្គរវត្ត មានដាក់លក់នៅក្នុងទីក្រុងម៉ុងរ៉េអាល់ ប្រទេសកាណាដាដោយពុំមានលក់នៅតាមបណ្តាប្រទេសផ្សេងទៀតទេ។
ក្រសួងពាណិជ្ជកម្មបានបញ្ជាក់ថា៖ «ការនាំចេញអង្ករពីកម្ពុជាទៅកាន់ទីផ្សារអន្តរជាតិ ជាពិសេសទីផ្សារសហគមន៍អឺរ៉ុប សហរដ្ឋអាមេរិក និងកាណាដា គឺត្រូវបានឆ្លងកាត់ការត្រួតពិនិត្យ និងផ្ទៀងផ្ទាត់យ៉ាងហ្មត់ចត់ពីស្ថាប័នមានសមត្ថកិច្ចរបស់រដ្ឋាភិបាលដោយមានការសហការពីវិស័យឯកជន និងក្រុមហ៊ុននាំចេញ»។
ក្នុងសេចក្តីប្រកាសព័ត៌មានរបស់ក្រសួងពាណិជ្ជកម្មបានឲ្យដឹងថា ឆ្លើយតបនឹងបាតុភាពខាងលើក្រសួងពាណិជ្ជកម្មនឹងធ្វើការស្រាវជ្រាវបន្ថែមទៀត ដើម្បីចាត់វិធានការតាមមធ្យោបាយការទូត និងផ្លូវច្បាប់នានាដើម្បីស្វែងរកប្រភព និងបុគ្គលល្មើសក្នងការបញ្ឈប់ការធ្វើចរាចរណ៍ទំនិញក្លែងបន្លំអត្តសញ្ញាណនេះ៕LA
