ភ្នំពេញ: ក្រសួងពាណិជ្ជកម្មកម្ពុជាបានចាប់ផ្តើមរៀបចំយុទ្ធសាស្ត្រស្តីពីពាណិជ្ជកម្មតាមប្រព័ន្ធអេឡិចត្រូនិក ដើម្បីត្រៀមខ្លួនសម្រាប់សេដ្ឋកិច្ចឌីជីថល និងបដិវត្តន៍ឧស្សាហកម្មទី ៤។
ក្នុងកិច្ចប្រជុំ ពិនិត្យ និងផ្តល់សុពលភាពលើឯកសារទស្សនទានយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិកកាលពីថ្ងៃទី ២ កញ្ញាដែលមានការចូលរួមពីស្ថាប័នសាធារណៈ វិស័យឯកជន អង្គការសង្គមស៊ីវិល និងដៃគូអភិវឌ្ឍន៍ប្រមាណ ៨០ នាក់លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្មបានឲ្យដឹងថា យុទ្ធសាស្ត្រនេះជាផែនទីបង្ហាញផ្លូវមួយដល់ការអភិវឌ្ឍវិស័យពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។
លោកស្រីថ្លែងថា៖ «ការវិវឌ្ឍដ៏លឿននៃបច្ចេកវិទ្យាឌីជីថលបានបង្កើតឡើងនូវកាលានុវត្តភាពក៏ដូចជាការប្រឈមជាច្រើនដែលទាមទារឲ្យមានការគិតគូរឲ្យច្បាស់លាស់លើការប្រព្រឹត្តទៅការពឹងផ្អែកបច្ចេកវិទ្យាជាមធ្យោបាយ»។
លោកស្រីបន្ថែមថាការរៀបចំយុទ្ធសាស្ត្រនេះធ្វើយ៉ាងណាឆ្លើយតបនឹងអនុសាសន៍ពាក់ព័ន្ធនឹងឯកសារដែលបានរៀបចំឡើងដោយអង្គការ UNCTAD នៅឆ្នាំ ២០១៧ និងយុទ្ធសាស្ត្រសមាហរណកម្មពាណិជ្ជកម្មកម្ពុជា ២០១៩-២០២៣។ លោកស្រីបញ្ជាក់ថា៖ «យុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិកក៏ឆ្លើយតបទៅនឹងតម្រូវការរបស់វិស័យឯកជនដែលជាចលករមួយសំខាន់ក្នុងការជំរុញនៃការធ្វើពាណិជ្ជកម្មតាមរយៈការប្រើប្រាស់បច្ចេកវិទ្យា»។
សេចក្ដីព្រាងច្បាប់ស្ដីពីការធ្វើពាណិជ្ជកម្មតាមប្រព័ន្ធអេឡិចត្រូនិកនឹងត្រូវបានរដ្ឋសភា អនុម័តក្នុងពេលដ៏ខ្លីខាងមុខនេះ។ នេះបើយោងតាមលោកស្រី តឹករ៉េត កំរង៕