ភ្នំពេញៈ ក្រសួងពាណិជ្ជកម្មលើកទឹកចិត្តឲ្យអង្គការអភិវឌ្ឍន៍នានាស្វែងរកផលិតផលសក្តានុពលនៅតាមតំបន់នីមួយៗដើម្បីយកមកចុះបញ្ជីម៉ាកសម្គាល់ភូមិសាស្ត្រ (GI) ឲ្យបានកាន់តែច្រើនក្នុងគោលបំណងដើម្បីលើកស្ទួយកិត្តិនាមនូវផលិតផលទាំងនោះ និងជំរុញការនាំចេញ។ នេះបើតាមមន្ត្រីជាន់ខ្ពស់នៃក្រសួងពាណិជ្ជកម្ម។
មកដល់ពេលនេះមានផលិតផលសម្គាល់ភូមិសាស្ត្រ (GI) ចំនួន ៣ នៅកម្ពុជាត្រូវបានក្រសួងពាណិជ្ជកម្មសម្រេចចុះបញ្ជីសម្គាល់ភូមិសាស្ត្រ ដែលរួមមាន ម្រេចកំពត ស្ករត្នោតកំពង់ស្ពឺ និងក្រូចថ្លុងកោះទ្រង់ (ខេត្តក្រចេះ) ចំណែកក្រុមហ៊ុនបរទេសដែលបានយកផលិតផលរបស់ខ្លួនមកចុះបញ្ជីនៅកម្ពុជា រួមមាន ស្រាសំប៉ាញ «Champagne» របស់បារាំង និងម៉ាកកាហ្វេ DoiTung Coffee មកពីប្រទេសថៃ។
លោក អប់ រ៉ាឌី ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម កាលពីថ្ងៃចន្ទបាននិយាយថា ក្រសួងពាណិជ្ជកម្មតែងខិតខំជំរុញឲ្យផលិតផលិតផលដែលមានគុណភាពល្អក្នុងតំបន់នីមួយៗត្រូវបានយកចុះបញ្ជីសម្គាល់ភូមិសាស្ត្រ ព្រោះនៅពេលដែលទទួលបានការចុះបញ្ជីសម្គាល់ភូមិសាស្ត្រ វានឹងទទួលបាននូវការការពារ និងផលប្រយោជន៍ជាច្រើន។
លោកបន្តថា នៅពេលដែលផលិតផលមួយត្រូវបានចុះបញ្ជី GI វានឹងជួយឲ្យផលិតផលនោះមានការទទួលស្គាល់កាន់តែច្រើននៅលើទីផ្សារ។ លោកថ្លែងថា៖ «អត្ថប្រយោជន៍នៃការចុះបញ្ជី GI មានដូចជា ការទទួលបានសិទ្ធិរារាំងទៅកាន់ភាគីណាដែលយកផលិតផលដែលបានចុះបញ្ជី GI រួចហើយ ទៅប្រើប្រាស់ ឬផលិតដោយមានរូបរាងប្រហាក់ប្រហែល ឬក្លែងបន្លំ ដោយគ្មានការអនុញ្ញាត»។
ទោះយ៉ាងណាលោកបញ្ជាក់ថា ដំណើរការនៃការចុះបញ្ជី GI មិនមែនជារឿងងាយស្រួល និងឆាប់រហ័សនោះទេ ព្រោះវាត្រូវការរៀបចំឯកសារ និងថវិកាមួយចំនួនសម្រាប់ការចុះទៅត្រួតពិនិត្យនៅទីតាំងជាក់ស្តែងផងដែរ។ លោកអះអាងថា៖ «ក្រសួងពាណិជ្ជកម្មតែងធ្វើការផ្សព្វផ្សាយឲ្យប្រជាកសិករនៅតាមតំបន់ ឬភូមិសាស្ត្រនីមួយៗត្រូវខិតខំពង្រឹងគុណភាពផលិតផលរបស់ខ្លួនឲ្យបានល្អ និងរៀបចំចងក្រងជាក្រុម ឬសហគមន៍អ្នកផលិត ដើម្បីឈានទៅចុះ GI»។
បច្ចុប្បន្នម្រេចកំពត និងស្ករត្នោតកំពង់ស្ពឺក៏ត្រូវបានកម្ពុជាយកទៅចុះបញ្ជីរួចរាល់ផងដែរនៅលើទីផ្សារអឺរ៉ុប ថៃ និងប្រទេសវៀតណាម។
លោក ងួន ឡាយ ប្រធានសមាគមម្រេចកំពត (KPPA) បាននិយាយថា ការទទួលបានការចុះបញ្ជីសម្គាល់ភូមិសាស្ត្រ GI មិនត្រឹមតែធ្វើឲ្យផលិតផលម្រេចកំពតទទួលកេរ្តិ៍ឈ្មោះល្អប៉ុណ្ណោះទេ តែវាថែមទាំងបានធ្វើឲ្យការលក់ទាំងក្នុងស្រុក និងបរទេសកើនឡើងផងដែរ។
លោកបន្តថា ផលិតផល GI ជាផលិតផលដែលមានការកំណត់លើចំណុចសំខាន់ៗជាច្រើនដូចជា ទីតាំងដាំដុះ បច្ចេកទេស ពូជ និងគុណភាពជាដើម។ លោកថ្លែងថា៖ «ការទទួលបាន GI បានធ្វើឲ្យម្រេចកំពតទទួលបានទំនុកចិត្តខ្ពស់ពីអ្នកប្រើប្រាស់នៅគ្រប់ទីកន្លងលើពិភពលោក»។ ទន្ទឹមនឹងនេះលោកក៏បានលើកទឹកចិត្តឲ្យគ្រប់ផលិតផលដែលមានសក្តានុពលទាំងអស់គួរតែរៀបចំអភិវឌ្ឍខ្លួនទៅចុះបញ្ជី GI ផងដែរ។
រដ្ឋលេខាធិការក្រសួងពាណិជ្ជកម្មលោកស្រី តឹករ៉េត កំរង ធ្លាប់បាននិយាយថា ក្រៅពីផលិតផលសម្គាល់ភូមិសាស្ត្រទាំង ២ ខាងលើ កម្ពុជាក៏គ្រោងនឹងយកផលិតផលចំនួន ៦ មុខទៀតទៅចុះបញ្ជីសម្គាល់ភូមិសាស្ត្រនៅសហភាពអឺរ៉ុប ដូចជា អង្ករថ្មគោល ក្រូចពោធិ៍សាត់ ទុរេនកំពត អំបិលកំពត សូត្រភ្នំស្រុក និងពងទាកូនស្រែននោង (ខេត្តតាកែវ)៕ LA