.jpg)
ក្នុងកិច្ចប្រជុំអន្តរក្រសួង-ស្ថាប័នមួយ ដែលធ្វើឡើងនៅទីស្ដីការក្រសួងទេសចរណ៍ កាលពីម្សិលមិញ។ ក្រសួងទេសចរណ៍
ភ្នំពេញៈ ក្រសួងពាក់ព័ន្ធនឹងតម្រូវឲ្យអ្នកប្រកបអាជីវកម្មកាណូតទេសចរណ៍ទាំងអស់ត្រូវបង់ពន្ធលើការនាំចូលកាណូតទេសចរណ៍ ដូចយានយន្តផ្សេងទៀតដែរ។ នេះបើយោងតាមកិច្ចប្រជុំអន្តរក្រសួងកាលពីថ្ងៃម្សិលមិញ។
លទ្ធផលនៃកិច្ចប្រជុំអន្តរក្រសួង និងស្ថាប័ន ដែលរួមមាន ក្រសួងទេសចរណ៍ ក្រសួងសាធារណការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានពន្ធដារ អគ្គស្នងការនគរបាលជាតិ អគ្គនាយកដ្ឋានគយ និងរដ្ឋាករ និងមន្ទីរអង្គភាពពាក់ព័ន្ធមួយចំនួនទៀត នឹងស្នើទៅរដ្ឋាភិបាលក្នុងការបង្កើតគណៈកម្មការអន្តរក្រសួងមួយឲ្យបានឆាប់នាពេលខាងមុខ ដើម្បីចុះដោះស្រាយបញ្ហាពន្ធ និងបញ្ហាប្រឈមមួយចំនួន។
កិច្ចប្រជុំនេះត្រូវបានដឹកនាំដោយក្រសួងទេសចរណ៍ ក្រោមអធិបតីភាព លោក ជា បូរ៉ា រដ្ឋលេខាធិការក្រសួងទេសចរណ៍។
កិច្ចប្រជុំបានលើកឡើងពីបញ្ហាប្រឈមមួយចំនួនរួមមានកាណូតទេសចរណ៍ដែលប្រកបអាជីវកម្មគ្មានពន្ធនាំចូល និងលិខិតស្នាមត្រឹមត្រូវ កាណូតទេសចរណ៍ដែលប្រកបអាជីវកម្មគ្មានសៀវភៅត្រួតពិនិត្យបច្ចេកទេស ចេញដោយក្រសួង ឬមន្ទីរសាធារណការ និងដឹកជញ្ជូន ខណៈ កាណូតទេសចរណ៍មួយចំនួនមិនគោរពតាមច្បាប់ចរាចរណ៍ផ្លូវទឹក និងដឹកលើសកម្រិត ព្រមទាំងគ្មានអាជ្ញាបណ្ណ។ អាជីវកម្មកាណូតទេសចរណ៍ទាំងនេះភាគច្រើននៅរាជធានីភ្នំពេញ និងខេត្តព្រះសីហនុ។
យោងតាមក្រសួងទេសចរណ៍ បច្ចុប្បន្នមានកាណូតទេសចរណ៍នៅទូទាំងប្រទេស ១២៤ គ្រឿង (រាជធានីភ្នំពេញ និងខេត្តព្រះសីហនុ) ក្នុងនោះគ្មានអាជ្ញាប័ណ្ណប្រកបអាជីវកម្ម ១៦ គ្រឿង និងមានអាជ្ញាប័ណ្ណបណ្ដោះអាសន្នចំនួន ៣៥ គ្រឿង ខណៈដែលកាណូតទេសចរណ៍ទាំងនោះ សុទ្ធតែមិនទាន់បានបង់ពន្ធ។
លោក ជា បូរ៉ា រដ្ឋលេខាធិការក្រសួងទេសចរណ៍ថ្លែងថា៖ «លើកនេះនឹងមានការរឹតបន្ដឹងធ្វើយ៉ាងណាឲ្យអាជីវករទាំងនោះត្រូវតែមកបង់ពន្ធនាំចូលយានយន្តរបស់ខ្លួន ពីព្រោះកន្លងមកមានការសម្របសម្រួលទន់ភ្លន់ច្រើនលើកហើយ តែអាជីវករនៅតែមិនព្រមអនុវត្តតាមច្បាប់»។
លោក ជា បូរ៉ា បានបន្តទៀតថា ចំពោះអាជីវកម្មកាណូតទេសចរណ៍ដែលចង់បង្កើតថ្មី ឬអាជីវករចាស់ដែលចង់ពង្រីកអាជីវកម្មរបស់ខ្លួន ត្រូវតែមានឯកសារបង់ពន្ធត្រឹមត្រូវពីស្ថាប័នគយ និងពន្ធដារ និងត្រូវមានលិខិតត្រួតពិនិត្យបច្ចេកទេសយានយន្តពីក្រសួងសាធារណការ ទើបក្រសួងទេសចរណ៍ចេញអាជ្ញាប័ណ្ណអាជីវកម្មទេសចរណ៍៕LA
