ភ្នំពេញ: ក្រសួងទេសចរណ៍បានដាក់ឲ្យដំណើរការគេហទំព័រថ្មី ១ ហៅថា ទស្សនាកម្ពុជា (Visit Cambodia) ដើម្បីជំរុញកំណើនភ្ញៀវទេសចរបន្ថែមទៀតមកកម្ពុជា។ នេះបើតាមអ្នកនាំពាក្យក្រសួងទេសចរណ៍។
លោក តុប សុភ័ក្ត អ្នកនាំពាក្យក្រសួងទេសចរណ៍បានឲ្យដឹងកាលពីថ្ងៃអង្គារថា គេហទំព័រ Visit Cambodia គឺកម្មវិធីមួយអាចជួយសម្រួលដល់ភ្ញៀវទេសចរក្នុងការស្វែងរកគោលដៅទេសចរណ៍ ការកក់សណ្ឋាគារ និងអាហារដ្ឋាន។
លោកបន្តថា ភាពពេញនិយមក្នុងការប្រើប្រាស់បច្ចេកវិទ្យានឹងផ្តល់ភាពងាយស្រួលដល់អ្នកទេសចរជាតិ និងអន្តរជាតិក្នុងការស្វែងរកគោលដៅទេសចរក្នុងគេហទំព័រនេះ។ លោកថ្លែង៖ «វាមានសារៈសំខាន់ក្នុងការផ្តល់ព័ត៌មានអំពីសក្តានុពលតំបន់ទេសចរណ៍កម្ពុជាដល់ភ្ញៀវទេសចរ»។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងនៅក្នុងសិក្ខាសាលាស្តីពីការដាក់ឲ្យដំណើរការគេហទំព័រ Visit Cambodia កាលពីថ្ងៃចន្ទនៅខេត្តសៀមរាបថា ប្រព័ន្ធផ្សព្វផ្សាយ ឌីជីថល ពិតជាបានដើរតួនាទីសំខាន់ក្នុងការផ្សព្វផ្សាយពីសក្តានុពលទេសចរណ៍នៅកម្ពុជា ។
លោកបន្ថែមថា សេដ្ឋកិច្ច ឌីជីថល កំពុងធ្វើឲ្យផ្លាស់ប្តូររបៀបធ្វើការជាច្រើននៅតាមបណ្តាឧស្សាហកម្ម នានាដូចជា សេវាកម្មហិរញ្ញវត្ថុ សេវាកម្មសុខភាព សេវាកម្មទេសចរណ៍ សេវាកម្មកម្សាន្ត មធ្យោបាយដឹកជញ្ជូន និង បច្ចេកវិទ្យាព័ត៌មាន និងទំនាក់ទំនងជាដើម ។ លោកថ្លែងថា៖ «ការជំរុញផលិតផលទេសចរណ៍តាមរយៈប្រព័ន្ធឌីជីថលនឹងផ្តល់ភាពងាយស្រួលដល់ភ្ញៀវទេសចរក្នុងការស្វែងរកព័ត៌មានអំពីគោលដៅទេសចរណ៍»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានឲ្យដឹងថា គេហទំព័រនេះនឹងជួយទាក់ទាញភ្ញៀវទេសចរជាតិ និងអន្តរជាតិមកទស្សនានៅកម្ពុជាកាន់តែច្រើនថែមទៀត។
លោកស្រីថ្លែងថា៖ «ជាធម្មតាមុននឹងធ្វើដំណើរកម្សាន្តភ្ញៀវទេសចរនឹងស្វែងរកព័ត៌មានអំពីគោលដៅទេសចរណ៍នានា ដូច្នេះវានឹងផ្តល់ជម្រើសច្រើនដល់ពួកគេ»។
បើតាមលោក តុប សុភ័ក្តិ ក្នុងរយៈពេល ៩ ខែ ឆ្នាំ ២០១៩ កម្ពុជាទទួលបានភ្ញៀវទេសចរសរុប ៤,៨ លាននាក់ កើនឡើង ១០ ភាគរយ បើធៀបនឹងរយៈពេលដូចគ្នាកាលពីឆ្នាំមុន៕LA