.jpg)
ភ្ញៀវទេសចរជាតិ-អន្តរជាតិ មកទស្សនាប្រាសាទអង្គរវត្ត នាពេលកន្លងមក។ ហុង មិនា
ភ្នំពេញ៖ ក្រសួងទេសចរណ៍នឹងធ្វើការសហការជាមួយក្រសួងសុខាភិបាលសិក្សាអំពីលទ្ធភាពទទួលភ្ញៀវទេសចរអន្តរជាតិដែលបានចាក់វ៉ាក់សាំងបង្ការជំងឺកូវីដ ១៩ រួចហើយ ដែលមកពីទីផ្សារណាមានហានិភ័យទាប ដើម្បីស្រោចស្រង់ឧស្សាហកម្មនេះ ដែលបានកំពុងរងផលប៉ះពាល់យ៉ាងធ្ងន់ពីការរីករាលដាលជំងឺកូវីដ ១៩ ជាងមួយឆ្នាំកន្លងមកនេះ ដែលក្រសួងរំពឹងថា នឹងចាប់ផ្តើមនៅក្នុងត្រីមាសទី៤ ខាងមុខនេះ។
លោក ថោង ខុន រដ្ឋមន្ត្រីក្រសួងទេសចរណ៍ បានថ្លែងក្នុងកិច្ចប្រជុំមួយកាលពីថ្ងៃអង្គារ ទី ២៧ ខែមេសា កន្លងមកនេះថា ចំពោះផែនការបើកដំណើរការទទួលភ្ញៀវទេសចរអន្តរជាតិឡើងវិញនេះ ក្នុងជំហានដំបូង ក្រសួងទេសចរណ៍នឹងធ្វើការជាមួយក្រសួងសុខាភិបាលអំពីលក្ខខណ្ឌឲ្យប្រាកដថា តើនឹងតម្រូវឲ្យភ្ញៀវទេសចរអន្តរជាតិដែលបានចាក់វ៉ាក់សាំងបង្ការជំងឺកូវីដ ១៩ រួចរាល់ហើយ ចូលមកប្រទេសកម្ពុជា នោះ ត្រូវធ្វើចត្តាឡីស័កក្នុងកម្រិតណា ឬមិនចាំបាច់ធ្វើចត្តាឡីស័ក បន្ទាប់មកក្រសួងនឹងស្នើសុំគោលការណ៍អនុញ្ញាតពីរាជរដ្ឋាភិបាល ដើម្បីអនុវត្តកិច្ចការងារនេះ។
លោករដ្ឋមន្ត្រីបានថ្លែងបន្តថា៖ «ទន្ទឹមនឹងអ្វីដែលយើងបានសិក្សាលើទីផ្សារនេះ ក្រសួងទេសចរណ៍ក៏នឹងធ្វើការជាមួយអាជ្ញាធរខេត្ត និងជាមួយគណៈកម្មការចំពោះកិច្ចចាក់វ៉ាក់សាំងផងដែរ ក្នុងការស្វែងរកការគាំទ្រក្នុងការជំរុញការចាក់វ៉ាក់សាំងជូនប្រជាពលរដ្ឋ និងអ្នកផ្តល់សេវាកម្មទេសចរណ៍នៅតាមគោលដៅនានា ដើម្បីធានាថា គោលដៅទេសចរណ៍របស់យើងមានសុវត្ថិភាព និងទំនុកចិត្ត ដែលអាចទទួលយកភ្ញៀវទេសចរដែលបានទទួលវ៉ាក់សាំងនេះបានមុន»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាបានប្រាប់ថា ដើម្បីធានាបានទំនុកចិត្តពីគ្រប់ភាគីពាក់ព័ន្ធ គេត្រូវតែកំណត់ពីលក្ខខណ្ឌមួយចំនួនឱ្យច្បាស់លាស់ ដើម្បីធានាថា នឹងមិនមានការឆ្លងរាលដាលជំងឺកូវីដ ១៩ ក្នុងចំណោមភ្ញៀវទេសចរ និងអ្នកពាក់ព័ន្ធ។
លោកបានបន្តថា ការកំណត់នោះអាចមានការកំណត់ពីលក្ខខណ្ឌការចាក់វ៉ាក់សាំង (ប្រភេទ និងរយៈពេលចាក់វ៉ាក់សាំង) ការកាត់បន្ថយពេលធ្វើចត្តាឡីស័ក និងការកំណត់ពីកាតព្វកិច្ចមួយចំនួនដែលភ្ញៀវ និងអ្នកពាក់ព័ន្ធត្រូវធ្វើ។
លោកនិយាយថា៖ «ដើម្បីឱ្យដំណើរការនេះ អាចដំណើរទៅដោយជោគជ័យ និងទទួលបាននូវទំនុកចិត្តពីគ្រប់ភាគីពាក់ព័ន្ធ គឺទាមទារឱ្យក្រសួងទេសចរណ៍ត្រូវធ្វើការងារជាមួយក្រសួងសុខាភិបាល ដើម្បីរៀបចំឱ្យមាន Code of conduct សម្រាប់ភ្ញៀវទេសចរ»។
យោងតាមលោក ថោង ខុន ក្រសួងទេសចរណ៍ នឹងតម្រូវឲ្យគ្រប់គោលដៅទេសចរណ៍ទាំងអស់ត្រូវគិតអំពីគុណភាពសេវាកម្ម និងតម្លៃឲ្យបានសមរម្យ ជាពិសេសត្រូវអនុវត្តស្តង់ដាថ្មីក្នុងបរិបទកូវីដ ១៩ នេះ ជាមួយវិធានការយ៉ាងម៉ឺងម៉ាត់គឺ ៣ កុំ ៣ ការពារ របស់រាជរដ្ឋាភិបាល។ ជាមួយគ្នានេះ ក៏ត្រូវធ្វើយ៉ាងណាផ្តល់ទំនុកចិត្តខ្ពស់ដល់ភ្ញៀវទេសចរ តាមរយៈតម្រូវឲ្យបុគ្គលិកបម្រើការងាររបស់ខ្លួន ត្រូវពាក់កាតបុគ្គលិក និងកាតចាក់វ៉ាក់សាំងបង្ការជំងឺកូវីដ ១៩ ជាប្រចាំក្នុងអំឡុងពេលបំពេញភារកិច្ចផងដែរ។
លោកបានថ្លែងថា៖ «យើងនឹងពិនិត្យវាយតម្លៃអំពីគុណភាពសេវាកម្មទេសចរណ៍នៅគ្រប់គោលដៅទាំងអស់ ហើយយើងនឹងដាក់ចុះនូវស្តង់ដាសេវាកម្មទេសចរណ៍នៅក្នុងបរិបទកូវីដនេះ ឲ្យបានរហ័ស ដើម្បីបញ្ជាក់អំពីសុវត្ថិភាព និងគុណភាពរបស់គោលដៅទេសចរណ៍នីមួយៗ ជូនភ្ញៀវទេសចរអន្តរជាតិ។ យើងធ្វើកិច្ចការងារនេះបណ្តើរៗ ហើយយើងប្រឹងប្រែងទាំងអស់គ្នា ដើម្បីយើងគិតថា អាចនឹងទទួលទេសចរអន្តរជាតិ ពិសេសទេសចរដែលចាក់វ៉ាក់សាំងហើយ នៅក្នុងត្រីមាសទី៤ ឆ្នាំ ២០២១នេះ»។
លោក ថោង ខុន បានគូសបញ្ជាក់ទៀតថា ក្រសួងទេសរណ៍ក៏បានខិតខំពង្រឹងការគ្រប់គ្រងចលនាភ្ញៀវទេសចរក្នុងស្រុក ក្នុងពេលដែលរាជរដ្ឋាភិបាលបានសម្រេចអនុញ្ញាតឲ្យប្រជាពលរដ្ឋអាចធ្វើដំណើរពីខេត្តមួយទៅខេត្តមួយ ដែលនឹងមានប្រជាពលរដ្ឋទៅកម្សាន្តតាមរមណីយដ្ឋានច្រើន ហើយប្រសិនបើរាជធានីភ្នំពេញ និងទីក្រុងតាខ្មៅបញ្ចប់ការបិទខ្ទប់ទៀត នឹងមានភ្ញៀវទេសចរពីភ្នំពេញ និងខេត្តកណ្តាលចេញដើរកម្សាន្តច្រើនទៅតំបន់សមុទ្រ ខេត្តភូមិភាគឦសាន និងខេត្តសៀមរាបជាដើម។
យោងតាមរបាយការណ៍ក្រសួងទេសចរណ៍បានឲ្យដឹងថា កាលពីឆ្នាំ ២០២០កន្លងទៅនេះ កម្ពុជាទទួលបានភ្ញៀវទេសចរអន្តរជាតិតែ ១,៣១ លាននាក់ប៉ុណ្ណោះ ដោយមានការថយចុះប្រមាណ ៨០% និងទទួលបានភ្ញៀវទេសចរផ្ទៃក្នុងប្រមាណ ៩ លាននាក់ ថយចុះ ២០% បើធៀបនឹងឆ្នាំ ២០១៩ កន្លងទៅ។
ការធ្លាក់ចុះនៃចំនួនភ្ញៀវទេសចរអន្តរជាតិកាលពីឆ្នាំមុន បានធ្វើឲ្យឧស្សាហកម្មទេសចរណ៍កម្ពុជាបាត់បង់ចំណូលជាង ៣ ពាន់លានដុល្លារអាមេរិក ដោយប្រាក់ចំណូលពីទេសចរណ៍អន្តរជាតិទទួលបានក្នុងឆ្នាំ ២០២០ មានត្រឹម ១,០២៣ ពាន់លានដុល្លារ ធ្លាក់ចុះ ៧៩,២ ភាគរយ បើធៀបនឹងឆ្នាំ ២០១៩ ដែលមានចំនួន ៤,៩១៩ ពាន់លានដុល្លារ៕
