ភ្នំពេញៈ ក្រសួងទេសចរណ៍បានប្រកាសថា ប្រតិបត្តិករអាជីវកម្មលើមូលដ្ឋានទេសចរណ៍ទាំងអស់ត្រូវស្នើសុំកម្រៃសេវាបូកបន្ថែមលើការចំណាយរបស់អតិថិជននេះ (Service Charge) ពីក្រសួងជាមុន ខណៈក្រសួងបានកត់សម្គាល់ឃើញថា មានប្រតិបត្តិការដែលមិនមានលក្ខណសម្បត្តិគ្រប់គ្រាន់មួយចំនួនកំពុងគិតសេវានេះពីអតិថិជន។ នេះបើយោងតាមមន្ត្រីក្រសួងទេសចរណ៍។
លោក គីម សេរីរ័ត្ន ប្រធាននាយកដ្ឋានសេវាកម្មស្នាក់នៅទេសចរណ៍ និងការគ្រប់គ្រង អាហារ និងភេសជ្ជៈ នៅក្រសួងទេសចរណ៍បានប្រាប់ភ្នំពេញប៉ុសិ៍្តកាលពីម្សិលមិញថា គោលបំណងនៃការគ្រប់គ្រងលើការគិតថ្លៃសេវាបន្ថែមនេះគឺដើម្បីពង្រឹងគុណភាពសេវាក្នុងឧស្សាហកម្មទេសចរណ៍។
លោកថ្លែងថាក្រសួងកត់សម្គាល់ថា ប្រតិបត្តិករមួយចំនួនកំពុងដាក់សេវាគិតប្រាក់បន្ថែមនេះដល់អតិថិជនដោយមិនបានអនុលោមតាមនីតិវិធីរបស់ក្រសួងនោះទេ។ លោកថ្លែងថា៖ «យើងបានកត់សម្គាល់ថា ភោជនីយដ្ឋាន និងសេវាកម្មស្នាក់នៅមួយចំនួនកំពុងអនុវត្តការគិតថ្លៃសេវាបន្ថែមនេះ ខណៈពួកគេមិនបានអនុលោមតាម ឬទទួលបានការបញ្ជាក់សេវាមានគុណភាពដោយក្រសួង»។ លោកបន្ថែមថាការគិតថ្លៃសេវានេះត្រូវបានកំណត់ដោយក្រសួងដោយមិនលើសពី ១០ ភាគរយនោះទេ។
កម្រៃសេវាបូកបន្ថែមលើការចំណាយរបស់អតិថិជននេះគឺដើម្បីពង្រឹងគុណភាពសេវាកម្មជូនអតិថិជនតាមរយៈការផ្តល់ឱកាសដល់ការបណ្តុះបណ្តាលជំនាញវិជ្ជាជីវៈ និងបដិសណ្ឋារកិច្ចដល់បុគ្គលិកនៅតាមមូលដ្ឋានអាជីវកម្មទេសចរណ៍។
ដើម្បីទទួលបានកម្រៃសេវាបូកបន្ថែមលើការចំណាយរបស់អតិថិជននេះប្រតិបត្តិករត្រូវតែមានអាជ្ញាប័ណ្ណទេសចរណ៍មានសុពលភាព និងមានវិញ្ញាបនបត្របញ្ជាក់លើគុណភាពសេវាចេញដោយក្រសួងទេសចរណ៍។ នេះបើយោងតាមសេចក្ដីប្រកាស។
ក្នុងការបង្ហាញតម្លាភាពគុណភាពសេវាប្រតិបត្តិករអាជីវកម្មទាំងអស់ ត្រូវបិទស្ទិកគ័រនៃកម្រៃសេវាបូកបន្ថែមលើការចំណាយរបស់អតិថិជននេះនៅច្រកចូលកន្លែងផ្ដល់សេវារបស់ពួកគេ។ លោកថ្លែងថា៖ «យើងចង់ធានាពីគុណភាពសេវាសម្រាប់សាធារណជន ហើយម្ចាស់អាជីវកម្មត្រូវតែផ្ដល់ឱកាសសម្រាប់អតិថិជនក្នុងការផ្ដល់យោបល់អំពីសេវានេះ»។
ប្រតិបត្តិករនឹងត្រូវបានផាកពិន័យរហូតដល់ ៣០០ ០០០ រៀល ឬ ៧៥ ដុល្លារប្រសិនបើរកឃើញថារំលោភលើបទបញ្ជានេះ។ នេះបើតាមសេចក្ដីប្រកាស។ ការអនុវត្តចូលធរមានចាប់ពីពេលចេញសេចក្តីជូនដំណឹងនេះទៅ។ លោកថ្លែងថា៖ «យើងនឹងចុះទៅត្រួតពិនិត្យភោជនីយដ្ឋាន និងសេវាកម្មស្នាក់នៅ ប្រសិនបើនរណាម្នាក់រំលោភលើបទបញ្ជានេះយើងនឹងផាកពិន័យដោយផ្អែកតាមសេចក្ដីប្រកាសនេះ»។
របាយការណ៍ប្រចាំឆ្នាំ ២០១៧ បានបង្ហាញថាក្រសួងទេសចរណ៍បានចេញអាជ្ញាប័ណ្ណដល់ភោជនីយដ្ឋានចំនួន ៣៣ ៧២៧ សណ្ឋាគារចំនួន ៧៨១ និងផ្ទះសំណាក់ ២ ២៥៥។
លោក ធួន ស៊ីណាន ប្រធានសហព័ន្ធទេសចរណ៍កម្ពុជាបានស្វាគមន៍ចំពោះវិធានការនេះ។
លោកថ្លែងថា៖ «វាជាវិធានការដ៏ល្អរបស់ក្រសួងការគិតថ្លៃសេវានេះត្រូវបានធ្វើឡើង លុះត្រាតែអតិថិជនពេញចិត្តលើសេវានេះ ប្រតិបត្តិករមិនអាចគិតថ្លៃបន្ថែមលើវិក្កយបត្រមុនពេលគុណភាពរបស់ពួកគេមិនត្រូវបានបញ្ជាក់នោះទេ»៕LA