The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​នឹង​បង្កើត​ស្ថាប័ន​សិក្សា​ទីផ្សារ​ទេសចរណ៍

ក្រសួង​នឹង​បង្កើត​ស្ថាប័ន​សិក្សា​ទីផ្សារ​ទេសចរណ៍

Content image - Phnom Penh Post
ទិដ្ឋភាព​នៃ​កិច្ចប្រជុំ​នៃ​វេទិកា​សេដ្ឋកិច្ច​ទេសចរណ៍​សកល​នៅ​ទីក្រុង​ម៉ាកាវ​កាលពី​​ថ្ងៃ​អាទិត្យ​​។ រូបថត លាង ផាន់ណារ៉ា

ក្រសួង​នឹង​បង្កើត​ស្ថាប័ន​សិក្សា​ទីផ្សារ​ទេសចរណ៍

ម៉ាកាវៈ ​ក្រសួង​ទេសចរណ៍​កម្ពុជា​គ្រោង​បង្កើត​ក្រុម​ប្រឹក្សា​ភិបាល​សិក្សា​ទីផ្សារ​ និង​ផ្សព្វផ្សាយ​ទេសចរណ៍​ដើម្បី​​បង្កើន​ការ​ទាក់ទាញ​ទេសចរ​បរទេស​ឲ្យ​សម្រេច​តាម​ផែនការ​ទេសចរ​បរទេស​ ៧ លាន​នាក់​ក្នុង​ឆ្នាំ ២០២០។​ នេះ​បើ​តាម​មន្ត្រី​ក្រសួង​ទេសចរណ៍។

លោក​ ទិត្យ ចន្ថា រដ្ឋលេខាធិការ​​ក្រសួង​ទេសចរណ៍​បាន​ប្រាប់​ភ្នំពេញ​ប៉ុស្តិ៍​​ក្រៅ​វេទិកា​សេដ្ឋកិច្ច​ទេសចរណ៍​សកល​នៅ​ទីក្រុង​ម៉ាកាវ​ (GTEF) កាលពី​សប្តាហ៍​មុន​ថា​ក្រុម​ប្រឹក្សា​​នេះ​​នឹង​មាន​សមាជិក​ពី​ភាគី​ពាក់ព័ន្ធ​ទាំងអស់​ក្នុង​វិស័យ​​​ទេសចរណ៍។

លោក​ថ្លែង​​ថា៖ «​[ក្រុម​ប្រឹក្សា​នេះ] នឹង​ធ្វើការ​សិក្សា​ស្រាវជ្រាវ​ដោះស្រាយ​បញ្ហា​ប្រឈម​នានា​រៀបចំ​យុទ្ធសាស្រ្ត​ និង​ជំរុញ​ការ​ផ្សព្វផ្សាយ​ពី​សក្តានុពល​ទេសចរណ៍​​នៅ​កម្ពុជា​ឲ្យ​កាន់​តែ​មាន​ប្រសិទ្ធភាព និង​ទូលំ​ទូលាយ»។

បើ​ទោះបី​ប្រទេស​កម្ពុជា​បាន​​​​ជាប់​ចំណាត់​ថ្នាក់​​ជា​គោលដៅ​​ទេសចរណ៍​ទាក់ទាញ​​របស់​ពិភពលោក​ជា​បន្តបន្ទាប់​ក៏ដោយ​ ក៏​លោក​ ទិត្យ ចន្ថា អះអាង​ថា​កម្ពុជា​មិន​ទាន់​ត្រៀម​ខ្លួន​​រួច​រាល់​សម្រាប់​​ចាប់​យក​អត្ថប្រយោន៍​ពី​កំណើន​វិស័យ​ទេសចរណ៍​ពិភពលោក​ដែល​មាន​កំណើន​ជាង​ ៤ ​ភាគរយ​ក្នុង​មួយ​ឆ្នាំ​នៅ​ឡើយ​ទេ។

លោក​បាន​ថ្លែង​ថា៖ «ដោយសារ​ការ​អភិវឌ្ឍ​វិស័យ​ទេសចរណ៍​ខ្លាំង​ពេក​ភ្ញៀវទេសចរ​មក​ច្រើន​ពេក​យើង​មិន​ទាន់​រួចរាល់​​នៅ​ឡើយ​ដូចជា​ហេដ្ឋារចនាសម្ព័ន្ធ ការ​អភិវឌ្ឍ​ធនធាន​មនុស្ស​​មិន​ទាន់​បាន​ច្រើន​គុណភាព​ទេសចរណ៍​នៅ​​មាន​កម្រិត​ ដូច្នេះ​យើង​ត្រូវ​ត្រៀម​គិតគូរ​រៀបចំ​ដោះស្រាយ​ពី​បញ្ហា​ប្រឈម និង​ប្រែ​ក្លាយ​ឲ្យ​ទៅ​ជា​ឱកាស​»​។

អ្នកស្រី ឆាយ ស៊ីវលីន ប្រធាន​សមាគម​ទី​ភ្នាក់ងារ​ទេសចរណ៍​កម្ពុជា​មាន​ប្រសាសន៍​ថា ក្រុម​ប្រឹក្សា​នេះ​អាច​នឹង​ក្លាយ​ជា​មូលដ្ឋាន​មួយ​សម្រាប់​វិស័យ​ឯកជន និង​រាជ​រដ្ឋាភិបាល​អាច​ធ្វើ​ការ​ពិភាក្សា​គ្នា​ឲ្យ​បាន​កាន់​តែ​ល្អ​ប្រសើរ​លើស​នូវ​អ្វី​ដែល​ភាគី​ទាំង​ពីរ​បាន​សហការ​កន្លង​មក។

អ្នកស្រី​ថ្លែង​តាម​រយៈអ៊ីម៉ែល​កាល​ពី​ម្សិលមិញ​ថា «ខ្ញុំគិត​ថា បញ្ហា​ប្រឈម និង​ការ​រៀបចំ​នានា​នឹង​មាន​ប្រសិទ្ធ​ភាព​ល្អ​ជាង​មុន។ ការ​បង្កើត​នេះ​ពិត​ជា​សាកសម​បំផុត​សម្រាប់​សមាហរណកម្ម​អាស៊ាន»។

អ្នកស្រី​បន្ថែម​ថា ក្រុម​ប្រឹក្សា​នេះ​អាច​នឹង​ផ្តល់​នូវ​អត្ថប្រយោជន៍​ជាច្រើន​ទៅ​ដល់​ការ​អភិវឌ្ឍន៍​ប្រទេស និង​ការ​ច្របាច់​ចូល​នូវ​កម្លាំង​ស្នូល​ពី​គ្រប់​វិស័យ។

កម្ពុជា​ទទួល​បាន​ភ្ញៀវទេសចរ​បរទេស​ ៤,៨ ​លាន​នាក់​កាលពី​ឆ្នាំ ២០១៥ ហើយ​ក្រសួង​នឹង​កំណត់​​ទិសដៅ​ ៧ ​លាន​នាក់​នៅ​​ឆ្នាំ​ ២០២០​ ស្រប​ពេល​ដែល​​ក្រសួង​ទេសចរណ៍​កាល​ពី​​សប្តាហ៍​មុន​បាន​ឲ្យ​ដឹង​ថា​កម្ពុជា​​ត្រូវការ​បុគ្គលិក​វិជ្ជាជីវៈ​ក្នុង​វិស័យ​​ទេសចរណ៍​ ២០ ម៉ឺន​នាក់​នៅ​ឆ្នាំ​ ២០២០ ​ដើម្បី​ឆ្លើយតប​នឹង​ទិសដៅ​កំណើន​នេះ។

ទិន្នន័យ​ពី​អង្គការ​ទេសចរណ៍​​​ពិភព​លោក UNWTO បាន​​ឲ្យ​ដឹង​ថា​កាលពី​ឆ្នាំ ២០១៥ ភ្ញៀវទេសចរ​ជិត ១,២ ពាន់​​លាន​នាក់​បាន​ធ្វើ​ដំណើរ​ទូទាំង​​ពិភពលោក​ខណៈ​ភ្ញៀវទេសចរ​ជនជាតិ​ចិន​មាន​ខ្ទង់​ចំណាយ​ខ្ពស់​ជាង​គេ​ហើយ​ត្រូវ​អង្គការ​នេះ​ព្យាករ​ថា​កំណើន​ទេសចរ​ជនជាតិ​ចិន​នឹង​កើនឡើង​ដល់ ២០០ ​លាន​នាក់​នៅ​​ឆ្នាំ ២០២០។

លោក ទិត ចន្ថា​ និយាយ​ថា ​កម្ពុជា​ក៏​នឹង​ទទួល​បាន​ពី​កំណើន​​ទេសចរ​ចិន​ទៅ​ក្រៅ​ប្រទេស​ផង​ដែរ​។

លោក​ថ្លែង​ថា៖ «​យើង​​​ដឹង​ច្បាស់​ថា​ភ្ញៀវទេសចរ​ជនជាតិ​ចិន​ជា​ឱកាស​ដ៏ធំ​មួយ​សម្រាប់​ពួក​យើង​។ សំខាន់​បំផុត​​ពេល​នេះ​ប្រទេស​ចិន​មាន​​ទេសចរ​ទៅ​ក្រៅ​ប្រទេស​នឹង​​កើន​ដល់​ពីរ​រយ​លាន​នាក់»​។

លោកស្រី Pansy Ho អនុប្រធាន និង​ជា​អគ្គលេខាធិការ​នៃ​​វេទិកា GTEF ដែល​​រៀបចំ​ជា​​រៀងរាល់​ឆ្នាំ​នៅ​ទីក្រុង​ម៉ាកាវ​បាន​ប្រាប់​ភ្នំពេញ ប៉ុស្តិ៍​ថា​កម្ពុជា​នៅ​មាន​ឱកាស​ច្រើន​ដើម្បី​ជំរុញ​វិស័យ​នេះ​។ ប៉ុន្តែ​លោកស្រី​លើក​ឡើង​ថា​ ​​កម្ពុជា​គួរ​តែ​បង្កើន​ភាព​ទាក់ទាញ​លើស​អ្វី​ដែល​ខ្លួន​កំពុង​ធ្វើ។

លោកស្រី​ថ្លែង​ថា៖ «​ជាក់ស្តែង​​ កម្ពុជា​មិន​បាន​ផ្តល់​នូវ​អារម្មណ៍​មួយ​ពិសេស និង​ចម្លែក​​ដល់​ភ្ញៀវទេសចរ​ទេ​អ្នក​បាន​ត្រឹម​ផ្តល់​ឲ្យ​ពួកគេ​ក្នុង​លក្ខណៈ​​ធម្មតា​មួយ​ប៉ុណ្ណោះ​ ខណៈ​ភ្ញៀវ​ទេសចរ​មក​លេង​អង្គរវត្ត​មិន​ត្រឹម​តែ​ចង់​ស្វែងយល់​ពី​វប្បធម៌ និង​សាសនា​ទេ​ពួកគេ​ចង់​បាន​អារម្មណ៍​ដ៏ពិសេស​មួយ​ផ្សេង​​ទៀត»៕

អត្ថបទគួរចាប់អារម្មណ៍