.jpg)
សកម្មភាពត្បាញសូត្រនៅមណ្ឌលបណ្តុះបណ្តាលក្នុងខេត្តតាកែវ។ ហេង ជីវ័ន
ភ្នំពេញៈ ក្រសួងពាណិជ្ជកម្មនឹងរៀបចំវេទិកាថ្នាក់ជាតិលើកទី ៧ ស្តីពីការជំរុញការអនុវត្តគោលនយោបាយអភិវឌ្ឍន៍កសិពាណិជ្ជកម្មកម្ពុជាដោយនឹងមានការដាក់តាំងបង្ហាញផលិតផលបន្លែ ផ្លែឈើខ្មែរ អង្ករ សូត្រ និងផលិតផលកែច្នៃជាច្រើនទៀតលើកទី ១២ នាឆ្នាំ ២០១៨ នេះនៅខេត្តសៀមរាប។
កម្មវិធីដែលនឹងប្រព្រឹត្តទៅចាប់ពីថ្ងៃទី ០៨-១១ ខែវិចិ្ឆកា ឆ្នាំ ២០១៨ ខាងមុខនឹងធ្វើនៅទីធ្លាក្បែរព្រះអង្គចេក ព្រះអង្គចម ដោយអាចនឹងមានស្តង់ដាក់តាំងបង្ហាញផលិតផលក្នុងស្រុកប្រមាណ ១០០ ចូលរួម។ នេះបើតាមការប្រាប់ឲ្យដឹងពីមន្ត្រីនៃក្រសួងពាណិជ្ជកម្មកាលពីថ្ងៃម្សិលមិញ។
កម្មវិធីនេះធ្វើឡើងក្នុងគោលបំណងបង្កើនសកម្មភាពពាណិជ្ជកម្មនៅមូលដ្ឋានឲ្យមានភាពទាក់ទាញដល់ប្រតិបត្តិករ អាជីវករ និងមហាជនទូទៅងាកមកគាំទ្រ និងប្រើប្រាស់ផលិតផលក្នុងស្រុកជំនួសឲ្យការនាំចូលពីបរទេសជាជំហានៗ។
ជាមួយគ្នានេះក្រសួងក៏សូមជូនដំណឹងដល់ម្ចាស់កសិដ្ឋាន អ្នកកែច្នៃ សមាគមអាជីវកម្ម និងសហគមន៍ផលិតបន្លែ ផ្លែឈើខ្មែរ និងផលិតផលពីសូត្រ ដែលត្រូវការស្តង់ដាក់តាំងផលិតផលសម្រាប់ស្វែងរកដៃគូបញ្ជាទិញ សូមមកបំពេញបែបបទនៅអគ្គនាយកដ្ឋានជំរុញពាណិជ្ជកម្មឲ្យបានមុនថ្ងៃទី ៣១ ខែតុលា ឆ្នាំ ២០១៨។
កាលពីឆ្នាំ ២០១៧ កន្លងមកកម្មវិធីនេះត្រូវបានរៀបចំធ្វើនៅក្នុងខេត្តព្រះសីហនុ៕
