.jpg)
ស្លាកសញ្ញារបស់យូធូប។ រូបថត YouTube
ភ្នំពេញៈ ក្រសួងប្រៃសណីយ៍ និងទូរគមនាគមន៍នឹងស្វែងរកដំណោះស្រាយឱ្យបានឆាប់ ជុំវិញបណ្តាញសង្គម YouTube ដែលប្រតិបតិ្តការជាក្រុមហ៊ុនបុត្រសម្ព័ន្ធរបស់ Google ដែលបានសម្រេចផ្អាកការផ្សាយពាណិជ្ជកម្មលើថ្នាលវីដេអូនៅប្រទេសកម្ពុជា រួមជាមួយប្រទេសជាង ៩០ ទៀតជុំវិញពិភពលោកកាលពីថ្មីៗនេះ។
សេចក្តីប្រកាសព័ត៌មានរបស់ក្រសួងប្រៃសណីយ៍ និងទូរគមនាគមន៍ឱ្យដឹងថា YouTube បានផ្អាកការផ្សាយពាណិជ្ជកម្មលើថ្នាលវីដេអូនៅប្រទេសជាង ៩០ រួមទាំងកម្ពុជា ដោយហេតុថា ក្រុមហ៊ុនកំពុងកែសម្រួលគោលការណ៍ផ្សាយពាណិជ្ជកម្ម ដើម្បីធ្វើឱ្យមាតិកាវីដេអូកាន់តែល្អប្រសើរ និងតម្រូវឱ្យអ្នកផលិតមាតិកាវីដេអូបំពេញតាមលក្ខខណ្ឌ «កម្មវិធីភាពជាដៃគូ» (YouTube Partner Program) ក្នុងប្រទេសដែលជាដៃគូទើបអាចរកចំណូលពីការផ្សាយពាណិជ្ជកម្មបាន។
សេចក្តីប្រកាសព័ត៌មានឱ្យដឹងថា ក្នុងចំណោមប្រទេសទាំងជាង ៩០ ការផ្សាយពាណិជ្ជកម្មលើថ្នាលវីដេអូ YouTube នឹងត្រូវផ្តល់ជូនជាបន្តបន្ទាប់ តាមរយៈការទទួលបាន «កម្មវិធីភាពជាដៃគូ»។
សេចក្តីប្រកាសព័ត៌មានបានបញ្ជាក់ថា៖ «តាមការពិនិត្យជាបឋមរបស់អ្នកតំណាង YouTube ទីផ្សារកម្ពុជាមានលក្ខណសម្បត្តិល្អៗជាច្រើននៅក្នុងការទទួលបាន «កម្មវិធីភាពជាដៃគូ» ពី YouTube ដែលការសម្រេចនេះត្រូវការពេលវេលាក្នុងការរៀបចំ និងចូលរួមសហការពីអ្នកផលិតមាតិកា ស្របតាមគោលការណ៍ និងលក្ខខណ្ឌកំណត់ដោយ YouTube ផងដែរ»។
លោក លីវ សុផាណារិទ្ធិ អ្នកនាំពាក្យក្រសួងប្រៃសណីយ៍ និងទូរគមនាគមន៍ ប្រាប់ ភ្នំពេញ ប៉ុស្តិ៍ថា ចាប់តាំងពីការផ្អាកផ្សាយពាណិជ្ជកម្មលើយូធូបក្នុងទីផ្សារកម្ពុជា ក្រសួងបានចាត់តាំងក្រុមការងារឱ្យធ្វើការដោយផ្ទាល់ជាមួយនឹងតំណាងយូធូបលើកិច្ចការនេះ។ សព្វថ្ងៃក្រសួងកំពុងជំរុញបន្ថែមទៀតក្នុងការបំពេញលក្ខខណ្ឌតាមតម្រូវការរបស់ភាគីយូធូប។
លោកថ្លែងថា៖ «យើងព្យាយាមជំរុញឱ្យបានឆាប់រហ័សនូវលក្ខខណ្ឌដើម្បីយើងអាចជូនព័ត៌មានឆ្លើយតបទៅបងប្អូនអ្នកផលិតមាតិកានៅប្រទេសកម្ពុជា»។
លោកបន្ថែមថា ភាគីយូធូបនឹងយកករណីកម្ពុជាដាក់ទៅក្នុងកិច្ចពិភាក្សាផ្ទៃក្នុងរបស់ខ្លួនក្នុងពេលឆាប់ៗនេះ ដោយរំពឹងថា កម្ពុជានឹងត្រូវបានអនុម័តឱ្យផ្សាយពាណិជ្ជកម្មឡើងវិញ។
លោកនិយាយថា៖ «សព្វថ្ងៃកម្ពុជាមានមាតិកាល្អៗច្រើនដែលជាចំណុចវិជ្ជមានមួយនឹងទទួលបានការគាំទ្រពីយូធូប ហើយយើងមានលក្ខខណ្ឌមួយចំនួនដែលកម្ពុជាអាចមានភាពងាយស្រួលក្នុងការឱ្យគាត់អនុម័តឱ្យយើងផ្សាយពាណិជ្ជកម្មឡើងវិញ»។
លោកបន្តថា៖ «ខ្ញុំសូមបញ្ជាក់ថា ការបានចូលទៅក្នុងកម្មវិធីភាពជាដៃគូបាន ឬមិនបាន គឺសំខាន់លើអ្នកផលិតមាតិកាខ្លួនឯងផ្ទាល់ដែលផលិតមាតិកាប្រកបដោយគុណភាព មានវិជ្ជាជីវៈ គោរពកម្មសិទ្ធិបញ្ញាអ្នកដទៃ មិនមានការចម្លងដែលជាកិច្ចសំខាន់អ្នកផលិតមាតិកាត្រូវគោរពតាមលក្ខខណ្ឌយូធូប»។
លោក ស្រៀង អង្គារ័ត្ន ប្រធានផ្សព្វផ្សាយបណ្ដាញសង្គមនៃអង្គការ ប៊ីប៊ីស៊ី មេឌា អេកសិន កត់សម្គាល់ថា ការផ្អាកនេះ បន្ទាប់ពីមាតិកាមួយចំនួននៅលើបណ្តាញសង្គមយូធូប និង Tik Tok នៅកម្ពុជាត្រូវបានគេរិះគន់ថាគ្មានសណ្ដាប់ធ្នាប់ និងក្រមសីលធម៌វិជ្ជាជីវៈ។
លោកនិយាយថា៖ «សម្រាប់យូធូបត្រូវបានគេបិទការរកលុយតាមយូធូប (monetize) តាមរយៈការផ្សាយពាណិជ្ជកម្ម ហើយការប្រើប្រាស់ Tik Tok នៅកម្ពុជាមិនទូលំទូលាយដូចប្រទេសដទៃទៀតឡើយ»។
លោក ង៉ែត ម៉ូសេ ទីប្រឹក្សាឯករាជ្យផ្នែកសន្តិសុខបច្ចេកវិទ្យា បានឱ្យដឹងថា អ្នកបង្កើតមាតិកាដើម (Original content creator) មានការព្រួយបារម្ភថា ការសម្រេចផ្អាករបស់យូធូបនឹងធ្វើឱ្យប៉ះពាល់ដល់ប្រាក់ចំណូលចម្បងរបស់ពួកគេពីការបង្កើតមាតិកាតាមរយៈការទទួលពាណិជ្ជកម្មពីក្រុមហ៊ុនក្នុងស្រុក។
លោកប្រាប់ថា៖ «ខ្ញុំយល់ថា ការសម្រេចចិត្តដកចេញពាណិជ្ជកម្មនៅលើយូធូបនឹងប៉ះពាល់ដល់អ្នកបង្កើតមាតិកា។ វាបានបង្អាក់ទឹកចិត្តអ្នកដែលចង់បង្កើតមាតិកាដើម និងអ្នកដែលមានមាតិកា ដើមកំពុងតែដាក់នៅយូធូប»។
សេចក្តីប្រកាសព័ត៌មានបន្ថែមថា ការផ្អាកផ្សាយពាណិជ្ជកម្មនេះបានធ្វើឱ្យអ្នកទស្សនាវីដេអូសប្បាយចិត្ត ព្រោះមិនមានការរំខានពីការផ្សាយពាណិជ្ជកម្ម ប៉ុន្តែអ្នកផលិតមាតិកាក្នុង YouTube មិនអាចរកចំណូលបានទៀតទេ។
សេចក្តីប្រកាសព័ត៌មានបញ្ជាក់ថា៖ «ក្រសួងសូមលើកទឹកចិត្តឱ្យមានការផលិតមាតិកាល្អៗ ដោយគោរពតាមគោលការណ៍កម្មសិទ្ធិបញ្ញា ប្រកបដោយគុណភាព គំនិតច្នៃប្រឌិត និងវិជ្ជាជីវៈ ដើម្បីផ្តល់អត្ថប្រយោជន៍ និងពុទ្ធិដល់សាធារណជន។ ក្រសួងនឹងបន្តពិភាក្សាជាមួយ YouTube ក្នុងការដោះស្រាយកិច្ចការនេះឱ្យបានឆាប់រហ័ស»៕LA
វីដេអូ៖
