.jpg)
រូបតំណាងៈ ការធ្វើអាជីវកម្មរ៉ែធ្យូងថ្មនៅសហរដ្ឋអាមេរិក។ រូបថត AFP
ភ្នំពេញ: ក្រសួងរ៉ែ និងថាមពលបានប្រកាសបើកតំបន់សម្បទានរុករករ៉ែ ធ្យូងថ្មទំហំ ២០០ គីឡូម៉ែត្រក្រឡា នៅខេត្តឧត្តរមានជ័យស្ថិតនៅភាគឧត្តរប្រទេសកម្ពុជាដែលជាការបើកផ្លូវឲ្យក្រុមហ៊ុនឯកជនក្នុងវិស័យរ៉ែដាក់ពាក្យសុំអាជ្ញាប័ណ្ណ។
សេចក្តីប្រកាសព័ត៌មានដែលចេញផ្សាយនៅថ្ងៃទី ២៩ ខែមេសា បានឲ្យដឹងថា ក្រុមហ៊ុនដែលប្រកបអាជីវកម្មក្នុងវិស័យរ៉ែអាចដាក់ពាក្យប្រកួតប្រជែងសុំអាជ្ញាប័ណ្ណសម្រាប់ការស្វែងរករ៉ែធ្យូងថ្មក្នុងតំបន់សម្បទានដែលមានទំហំ ២០០ គីឡូម៉ែត្រក្រឡា នៅស្រុកត្រពាំងប្រាសាទ ខេត្តឧត្តរមានជ័យ។
សេចក្តីប្រកាសព័ត៌មានលើកឡើង៖ «បណ្តាក្រុមហ៊ុនជាតិ និងអន្តរជាតិដែលចាប់អារម្មណ៍អាចស្នើសុំពាក្យសុំអាជ្ញាប័ណ្ណស្វែងរករ៉ែនៅនាយកដ្ឋានឧស្សាហកម្មអាជីវកម្មធនធានរ៉ែ»។
ក្រសួងរ៉ែ និងថាមពលបានឲ្យដឹងថាក្រសួងនឹងប្រកាសផ្សាយជាសាធារណៈចំពោះក្រុមហ៊ុនដែលទទួលជោគជ័យក្នុងការដាក់ពាក្យស្នើសុំ និងការផ្តល់អាជ្ញាប័ណ្ណស្វែងរករ៉ែ បន្ទាប់ពីក្រសួងបានអនុវត្តតាមនីតិវិធីចប់សព្វគ្រប់។
លោក យស មុនីរ៉ាត់ អគ្គនាយកនៃអគ្គនាយកដ្ឋានរ៉ែនៃក្រសួងរ៉ែ និងថាមពល បានប្រាប់ភ្នំពេញ ប៉ុស្តិ៍កាលពីថ្ងៃចន្ទថា ដោយមើលឃើញពីសក្តានុពលធនធានរ៉ែនៅតំបន់ខាងលើដែលអាចធ្វើអាជីវកម្មបានទើបក្រសួងបើកតំបន់សម្បទានរុករករ៉ែធ្យូងថ្មនេះដើម្បីសិក្សាស្វែងរក។
លោកថ្លែងថា៖ «តំបន់នេះយើងបានរកឃើញមានរ៉ែធ្យូងថ្ម ដូច្នេះបើក្រុមហ៊ុនចាប់អារម្មណ៍អាចដាក់ពាក្យស្នើសុំអាជ្ញាប័ណ្ណនេះ»។
លោកបានឲ្យដឹងថា ក្រសួងធ្លាប់ផ្តល់អាជ្ញាប័ណ្ណស្វែងរុករករ៉ែដល់ក្រុមហ៊ុនឯកជនមួយម្តងរួចហើយនៅតំបន់នេះ ប៉ុន្តែកាលនោះក្រុមហ៊ុនមិនបានរកឃើញសក្តានុពលធនធានរ៉ែ ក្រសួងក៏សម្រេចដកអាជ្ញាប័ណ្ណវិញ។
លោកបន្ថែមថា ទោះបីយ៉ាងណាការបើកតំបន់សម្បទានស្វែងរករ៉ែនេះឡើងវិញ ក្រសួងសង្ឃឹមថានឹងមានសក្តានុពលដែលអាចធ្វើអាជីវកម្ម និងទទួលបានផលចំណេញ។
លោកថ្លែងថា៖ «សព្វថ្ងៃយើងបើកតំបន់សម្បទានស្វែងរករ៉ែធ្យូងថ្មនេះឡើងវិញ ដើម្បីឲ្យក្រុមហ៊ុនឯកជនបោះទុនវិនិយោគ និងសិក្សាស្រាវជ្រាវ ព្រោះតំបន់នេះត្រៀមបម្រុងទុកទាញយករ៉ែមកផ្គត់ផ្គង់ឲ្យរោងចក្រផលិតថាមពលអគ្គិសនីដំណើរការដោយធ្យូងថ្មដែលរដ្ឋាភិបាលសម្រេចឲ្យមានការសាងសង់នៅតំបន់នោះ»។
ក្រសួងរ៉ែ និងថាមពលកាលពីចុងខែមីនាឆ្នាំនេះបានប្រកាសឲ្យក្រុមហ៊ុនឯកជនដាក់ពាក្យប្រកួតប្រជែងសុំអាជ្ញាប័ណ្ណស្វែងរករ៉ែក្នុងតំបន់សម្បទានចំនួន ៤ រួមមានៈ សម្បទានស្វែងរករ៉ែដែលមានទំហំ ២០០ គីឡូម៉ែត្រក្រឡាស្ថិតនៅស្រុកត្រពាំងប្រាសាទ ខេត្តឧត្តរមានជ័យ និង ១៩៤ គីឡូម៉ែត្រក្រឡា ជាប់ព្រំប្រទល់រវាងស្រុកត្រពាំងប្រាសាទ ខេត្តឧត្តរមានជ័យ និងស្រុកជាំក្សាន្តខេត្តព្រះវិហារព្រមទាំងតំបន់សម្បទានស្វែងរករ៉ែចំនួន ២ ទៀតមានទំហំ ៤០០ គីឡូម៉ែត្រក្រឡាស្ថិតក្នុងស្រុកពេជ្រាដា ខេត្តមណ្ឌលគិរី។
លោកនិយាយថា៖ «រហូតមកដល់ពេលនេះ ក្រសួងបានទទួលចំនួន ៤ ទៅ ៥ នៃពាក្យស្នើសុំអាជ្ញាប័ណ្ណស្វែងរករ៉ែក្នុងតំបន់សម្បទានទាំង ៤ ខាងលើនេះ ហើយក្រសួងនឹងបើកកិច្ចប្រជុំពិនិត្យមើលលើពាក្យស្នើសុំនេះនៅសប្តាហ៍ក្រោយ»។
បើយោងតាមលោក យស មុនីរ៉ាត់ បច្ចុប្បន្ន ក្រសួងបានផ្តល់អាជ្ញាប័ណ្ណសិក្សាស្វែងរករ៉ែលោហៈចំនួន ៤០ នៅទូទាំងប្រទេស កម្ពុជា។
បច្ចុប្បន្នក្រុមហ៊ុន Emerald Resources NL ដែលជាក្រុមហ៊ុនចុះបញ្ជីនៅផ្សារហ៊ុនប្រទេសអូស្ត្រាលីកំពុងធ្វើការអភិវឌ្ឍគម្រោងរ៉ែមាសនៅអូរខ្វាវ ខេត្តមណ្ឌលគិរី។ ក្រុមហ៊ុនរំពឹងថានឹងទាញយកទិន្នផលមាសជាលើកដំបូងនៅឆ្នាំ ២០២០ នេះ។ គម្រោងនេះបានប៉ាន់ប្រមាណថា អាចនឹងចម្រាញ់មាសក្នុងបរិមាណសរុប ១ លានអោន។ នេះបើយោងតាមលោក មុនីរ៉ាត់៕ LA
