.jpg)
ក្រសួងប្រៃសណីយ៍និងទូរគមនាគមន៍ ប្រមូលថវិកាចំនួន ១៣,៥ លានដុល្លារ ពីប្រតិបត្តិករទូរគមនាគមន៍កាលពីឆ្នាំមុនពីមូលនិធិ ២ ដែលមានចំនួន ៧០ ភាគរយ។ មឿន ញាណ
ភ្នំពេញៈ ក្រសួងប្រៃសណីយ៍ និងទូរគមនាគមន៍ (MPTC) រហូតមកដល់ពេលនេះប្រមូលថវិកាបាន ១៣,៥ លានដុល្លារពីក្រុមហ៊ុនទូរគមនាគមន៍ ដែលត្រូវបង់វិភាគទានទៅឲ្យមូល និធិចំនួន ២ សម្រាប់ឆ្នាំ ២០១៧ ដែលទឹកប្រាក់នេះមានត្រឹម ៧០ ភាគរយនៃការរំពឹងទុករបស់ក្រសួងប៉ុណ្ណោះ។
បើទោះជាទឹកប្រាក់ដែលទទួលបានមូលនិធិទាំង ២ នេះនៅមិនទាន់ពេញលេញក្តី ក៏លោក កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ បានបញ្ជាក់ក្នុងសន្និសីទសារព័ត៌មានកាលពីល្ងាចថ្ងៃពុធថា វាជានិន្នាការល្អមួយ ដោយសារការប្រមូលចំណូលសម្រាប់មូលនិធិទាំងនេះស្ថិតនៅឆ្នាំ ដំបូងនៅឡើយ ហើយមន្រ្តីក្រសួងនឹងនៅបន្តប្រមូលប្រាក់ ៣០ ភាគរយទៀតដែលនៅសល់ពីប្រតិបត្តិករដែលមិនទាន់បំពេញកាតព្វកិច្ច។
យោងតាមលោក ច័ន្ទមេត្តា ក្នុងចំណោមប្រាក់ចំណូល ១៣,៥ លានដុល្លារនេះ ប្រាក់ចំណូលដែលទទួលបានពីមូលនិធិនៃការកសាងសមត្ថភាព និងការស្រាវជ្រាវ និងការអភិវឌ្ឍលើវិស័យទូរគមនាគមន៍ (CBRD) មានចំនួន ៤,៥ លានដុល្លារ ខណៈដែលមូលនិធិកាតព្វកិច្ចសេវាសកលទូរគមនាគមន៍ (USO) មានចំនួន ៩ លានដុល្លារ។
លោក ច័ន្ទមេត្តា បានឲ្យដឹងថា មន្ដ្រីបានដឹងតាំងពីដំបូងមកម្ល៉េះថា ការអនុវត្តមូលនិធិនេះសម្រាប់ឆ្នាំដំបូង នឹងពិបាក ហើយប្រឈមបញ្ហាជាច្រើន។ រហូតមកដល់ពេលនេះ មានក្រុមហ៊ុន ២៧ ក្នុងចំណោមក្រុមហ៊ុនទូរគមនាគមន៍ ៣១ បានបង់ប្រាក់រហូតមកដល់ពេលនេះ។ អត្តសញ្ញាណក្រុមហ៊ុនដែលបាន និងមិនបានបង់ប្រាក់មិនត្រូវបានប្រកាសនៅឡើយទេកាលពីថ្ងៃពុធ។
លោកថ្លែងថា៖ «ដោយផ្អែកលើលទ្ធផលឆ្នាំដំបូងនេះ យើងសង្ឃឹមថា ការប្រមូលប្រាក់ចំណូលពីមូលនិធិនេះសម្រាប់ឆ្នាំ ២០១៨ នឹងកាន់តែប្រសើរ និងកាន់តែរលូន»។
លោកបន្ថែមថា ការប្រមូលប្រាក់ចំណូលឆ្នាំ ២០១៨ ពីមូលនិធិនេះ ត្រូវបានប្រកាសចាប់តាំងពីខែសីហា ឆ្នាំនេះមក ហើយប្រតិបត្តិករទូរគមនាគមន៍មួយចំនួនបានបង់ប្រាក់ជាបន្តបន្ទាប់ ទៅតាមកាលបរិច្ឆេទកំណត់ដែលត្រូវនឹងខែមីនាឆ្នាំ ២០១៩។
លោកលើកឡើងថា៖ «អ្វីដែលប្រតិបត្តិករកំពុងឃ្លាំមើលលើពួកយើង គឺថា តើយើងនឹងគ្រប់គ្រងមូលនិធិដែលពួកគេបានបង់នេះដូចម្ដេច? តាមគំនិតពួកយើង យើងធានាតម្លាភាព និងគណនេយ្យភាពក្នុងការគ្រប់គ្រងមូលនិធិនេះ»។
ច្បាប់ទូរគមនាគមន៍ឆ្នាំ ២០១៦ និងអនុក្រឹត្យជាបន្តបន្ទាប់បានបង្កើតមូលនិធិទាំង ២ នេះ ពោលគឺមូលនិធិ CBRD និងមូលនិធិ USO ក្នុងគោលបំណងលើកកម្ពស់ការអភិវឌ្ឍហេដ្ឋារចនាសម្ព័ន្ធ និងសេវានៅតាមតំបន់ជនបទ ជាទីដែលក្រុមហ៊ុនជាច្រើនមិនអាចវិនិយោគទៅដល់ ព្រមទាំង ការលើកកម្ពស់ការស្រាវជ្រាវ និងជំរុញទេពកោសល្យថ្មីនៅក្នុងឧស្សាហកម្មនេះ។
ក្រុមហ៊ុនទូរគមនាគមន៍ជាច្រើនត្រូវតម្រូវឲ្យបង់ ១ ភាគរយនៃប្រាក់ចំណូលប្រចាំឆ្នាំរបស់ក្រុមហ៊ុនទៅឲ្យមូលនិធិ CBRD និង ២ ភាគរយនៃប្រាក់ចំណូលប្រចាំឆ្នាំសម្រាប់មូលនិធិ USO ក្នុង ១ ឆ្នាំ។
ខណៈដែលមានប្រតិបត្តិករ ៣១ ត្រូវមានកាតព្វកិច្ចចំពោះមូលនិធិទាំង ២ នេះ ប្រតិបត្តិករទូរគមនាគមន៍ឈានមុខគេ ៣ នៅក្នុងប្រទេស កម្ពុជា គឺក្រុមហ៊ុន Smart ក្រុមហ៊ុន Cellcard និងក្រុមហ៊ុន Metfone និងវិភាគទានពីក្រុមហ៊ុនទាំងនេះគឺជាប្រភពដ៏សំខាន់សម្រាប់ប្រាក់ចំណូលរបស់មូលនិធិនេះ។
ក្នុងសេចក្ដីប្រកាសព័ត៌មានកាលពីម្សិលមិញ ក្រុមហ៊ុន Smart ជាក្រុមហ៊ុនបុត្រសម្ព័ន្ធរបស់ក្រុមហ៊ុនទូរគមនាគមន៍ Axiata Group របស់ប្រទេស ម៉ាឡេស៊ី បានឲ្យដឹងថា ខ្លួនបានបង់ប្រាក់ជាង ៧ លានដុល្លារទៅក្នុងមូលនិធិទាំង២នេះកាលពីឆ្នាំ ២០១៧។
ក្រុមហ៊ុននេះបានអំពាវនាវឲ្យដៃគូប្រកួតប្រជែងរបស់ខ្លួនបង់ចំណែករបស់ពួកគេ ដោយកត់សម្គាល់ថា វាមានសារៈសំខាន់ដែលអ្នកមានអាជ្ញាប័ណ្ណទាំងអស់ត្រូវបង់ឲ្យបានទាន់ពេលវេលាដល់មូលនិធិទាំង ២ ដូចបានតម្រូវដោយច្បាប់សម្រាប់អត្ថប្រយោជន៍របស់មូលនិធិទាំង ២ និងភាគីទាំងអស់នៅក្នុងរយៈពេលវែង។
សេចក្ដីប្រកាសព័ត៌មាននេះបានឲ្យដឹងថា៖ «សម្រាប់ [វិភាគទាន] ឆ្នាំ ២០១៨ យើងបានបង់វិភាគទាន ៣,៩ លានដុល្លារហើយរហូតមកដល់ពេលនេះ ហើយនឹងទូទាត់រាល់ប្រាក់មិនទាន់បង់ដែលពាក់ព័ន្ធទាំងអស់សម្រាប់មូលនិធិ USOF និង CBRDF ដោយសារយើងមានការទទួលខុសត្រូវខ្ពស់ចំពោះជាតិរបស់យើង»។
សេចក្ដីប្រកាសព័ត៌មាននេះបន្តថា៖ «យើងបន្តបញ្ជាក់ពីសារៈសំខាន់នៃភាពស្មើគ្នា របស់ឧស្សាហកម្មនេះ ជាពិសេសទាក់ទងនឹងលក្ខខណ្ឌតម្រូវស្តីពីការបង់ប្រាក់កម្រៃ និងការទូទាត់ពន្ធ»៕ LA
