ភ្នំពេញ: ក្រសួងពាណិជ្ជកម្មបានពង្រីកការធ្វើវិមជ្ឈការទៅឲ្យមន្ទីរពាណិជ្ជកម្មខេត្តជាប់ព្រំដែនក្នុងការចេញវិញ្ញាបនបត្របញ្ជាក់ប្រភពដើមទំនិញ (CO) ដល់ក្រុមហ៊ុននាំចេញដោយផ្ទាល់ដើម្បីជំរុញការនាំចេញផលិតផលកសិកម្មរបស់ប្រទេសកម្ពុជា។
យោងតាមសេចក្តីប្រកាសព័ត៌មាន ក្រសួងពាណិជ្ជកម្មនឹងដាក់ឲ្យដំណើរការសាកល្បងក្នុងការផ្តល់វិញ្ញាបនបត្របញ្ជាក់ប្រភពដើមទំនិញទម្រង់ឌី (CO Form D) នៅខេត្តជាប់ព្រំដែនចំនួន ៣ បន្ថែមទៀតរួមមានខេត្តតាកែវ កោះកុង និងកំពតដែលនឹងចាប់ពីថ្ងៃទី ១ ខែ វិច្ឆិកា ឆ្នាំ ២០១៩ តទៅ។
សេចក្តីប្រកាសព័ត៌មានបានឲ្យដឹងថា ក្រុមហ៊ុន ឬអ្នកនាំចេញកសិផលកសិកម្មត្រូវមកដាក់ពាក្យស្នើសុំវិញ្ញាបនបត្របញ្ជាក់ប្រភពដើមនៅមន្ទីរពាណិជ្ជកម្មខេត្ត។
កាលពីឆ្នាំ ២០១៧ ក្រសួងពាណិជ្ជកម្មបានអនុវត្តរួចមកហើយដោយបានផ្តល់សិទ្ធិឲ្យមន្ទីរពាណិជ្ជកម្មខេត្តបាត់ដំបង និងប៉ៃលិនអាចចេញវិញ្ញាបនបត្របញ្ជាក់ប្រភពដើមដល់អ្នកនាំចេញ។
លោក ស្រី កុម្ភៈ ប្រធានមន្ទីរពាណិជ្ជកម្ម ខេត្តកំពត បានប្រាប់ភ្នំពេញប៉ុស្តិ៍ នៅថ្ងៃអង្គារថា មន្ទីរពាណិជ្ជកម្មនឹងចាប់ផ្តើមផ្តល់វិញ្ញាបនបត្របញ្ជាក់ប្រភពដើមទំនិញនៅដើមខែវិច្ឆិកានេះ។ លោកបន្តថា តាមគោលការណ៍ក្រសួងនឹងផ្តល់សិទ្ធិឲ្យមន្ទីរពាណិជ្ជកម្មអាចចេញវិញ្ញាបនបត្របញ្ជាក់ប្រភពដើមទំនិញនៅទូទាំងប្រទេស ជាពិសេសខេត្តជាប់ព្រំដែនប្រទេសជិតខាងកម្ពុជា។
លោកបានថ្លែងថា៖ «បន្ទាប់ពីដាក់ឲ្យប្រើប្រាស់ជាផ្លូវការវិញ្ញាបនបត្របញ្ជាក់ប្រភពដើមទំនិញ ក្រុមការងាររបស់មន្ទីរនឹងធ្វើការផ្សព្វផ្សាយបានទូលំទូលាយដល់ក្រុមហ៊ុននានា»។
លោកបន្តថា ការផ្តល់វិញ្ញាបនបត្របញ្ជាក់ប្រភពដើមនេះនឹងកាន់តែផ្តល់ភាពងាយស្រួលដល់បណ្តាក្រុមហ៊ុននាំចេញកសិផល ដែលកំពុងប្រតិបត្តិការនៅខេត្តនេះ។ លោកបន្តថា៖ «វានឹងបង្កលក្ខណៈងាយស្រួល និងកាន់តែខិតជិតដល់ក្រុមហ៊ុននាំចេញ»។
លោក កុម្ភៈ បានបន្ថែមថាផលិតផលកសិកម្មក្នុងខេត្តកំពតភាគច្រើនបាននាំចេញទៅប្រទេសវៀតណាម រួមមានស្រូវ ម្រេច និងស្វាយ។ លោកថ្លែងថា៖ «បើគ្មានវិញ្ញាបនបត្របញ្ជាក់ប្រភពដើមទំនិញទម្រង់ឌីនេះ ពេលឈ្មួញនាំកសិផលទៅវៀតណាម គេនឹងយកពន្ធ ជាក់ស្តែងកាលពីឆ្នាំមុន វៀតណាមបានយកពន្ធ ២០ ភាគរយ ពីឈ្មួញលក់ស្រូវម្នាក់»។
បើតាមលោក កុម្ភៈ បច្ចុប្បន្នក្រុមហ៊ុនកែច្នៃ និងនាំចេញម្រេចប្រមាណ ៣៦ ក្រុមហ៊ុនដែលកំពុងប្រតិបត្តិការរបស់ខ្លួន។
តាមរបាយការណ៍ស្តីពីភាពងាយស្រួលក្នុងការធ្វើអាជីវកម្មឆ្នាំ ២០២០ របស់ធនាគារពិភពលោកដែលចេញផ្សាយកាលពីសប្តាហ៍មុនបានបង្ហាញថា ចំណាត់ថ្នាក់របស់កម្ពុជានៅក្នុងសន្ទស្សន៍នៃភាពងាយស្រួលក្នុងការធ្វើអាជីវកម្មបានធ្លាក់ចុះរយៈពេល ៤ ឆ្នាំជាប់ៗគ្នាចាប់តាំងពីឆ្នាំ ២០១៦ ខណៈចំណាត់ថ្នាក់សម្រាប់ឆ្នាំ ២០២០ បានធ្លាក់ចុះ ៦ លេខពីឆ្នាំ ២០១៩។
របាយការណ៍ឲ្យដឹងទៀតថា៖ «ការចាប់ផ្តើមធ្វើអាជីវកម្មនៅកម្ពុជាមានតម្លៃខ្ពស់ ដោយការបង្កើនការចំណាយទាក់ទងនឹងការចុះបញ្ជីអាជីវកម្ម»។
លោក ហ៊ុន ឡាក់ នាយកក្រុមហ៊ុន Longmate Agriculture Co.,Ltd ជាក្រុមហ៊ុនដាំ និងនាំចេញចេកអំបូងលឿងបានឲ្យដឹងថា ការបញ្ជាក់ពីប្រភពដើមទំនិញនេះគឺពិតជាជួយសម្រួលដល់ការនាំចេញរបស់ក្រុមហ៊ុនលោក។ លោកថ្លែងថា៖ «បើគ្មានការបញ្ជាក់វិញ្ញាបនបត្របញ្ជាក់ប្រភពដើមទំនិញនេះក្រុមហ៊ុននឹងមិនអាចធ្វើការនាំចេញបានទេ»។
បើតាមលោក ហ៊ុន ឡាក់ ក្នុងរយៈពេលជាង ៩ ខែនេះ ក្រុមហ៊ុនលោកបាននាំចេញចេកអំបូងលឿងបានជិត ១២ ម៉ឺនតោន ទៅប្រទេស ចិន វៀតណាម និងជប៉ុន៕ LA