.jpg)
ក្រសួងពាណិជ្ជកម្មចុះ MoU ជំរុញខ្សែចង្វាក់តម្លៃសូត្រខ្មែរ ជាមួយក្រុមហ៊ុន GSD Pheach Co., Ltd ដែលជាក្រុមហ៊ុនផលិតសូត្រខ្មែរក្នុងស្រុក។ ហេង ជីវ័ន
ភ្នំពេញ: ក្រសួងពាណិជ្ជកម្មបានចុះអនុស្សរណៈយោគយល់គ្នាជាមួយក្រុមហ៊ុន GSD Pheach Co., Ltd ដែលជាក្រុមហ៊ុនផលិតសូត្រខ្មែរក្នុងស្រុក ក្នុងគោលបំណងដើម្បីជំរុញចង្វាក់តម្លៃសូត្រខ្មែរឲ្យកាន់តែរស់រវើកឡើងវិញ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានថ្លែងក្នុងពិធីចុះហត្ថលេខាកាលពីថ្ងៃសៅរ៍នៅខេត្តសៀមរាបថា ការចុះអនុស្សរណៈនេះធ្វើឡើងក្នុងបំណងដើម្បីជំរុញខ្សែចង្វាក់តម្លៃផលិតផល កសិពាណិជ្ជកម្មសូត្រខ្មែរនៃគម្រោងជំរុញទីផ្សារសម្រាប់កសិកម្មខ្នាតតូច (AIMS) ដែលជាគម្រោងរួមគ្នារវាងរដ្ឋាភិបាលកម្ពុជាជាមួយមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) ដោយមានទឹកប្រាក់ ៤៥ លានដុល្លារ ក្នុងនោះ ៨,៦៨ លានដុល្លារបានពីរដ្ឋាភិបាលកម្ពុជា។
លោកបន្តថា គម្រោងជំរុញទីផ្សារសម្រាប់កសិកម្មខ្នាតតូចគឺជាចំណុចចាប់ផ្ដើមដំបូងនៃភាពជាដៃគូរវាងវិស័យឯកជន និងរដ្ឋាភិបាលដើម្បីលើកកម្ពស់ និងអភិវឌ្ឍវិស័យសូត្រខ្មែរ។ តាមរយៈគម្រោងនេះ កសិករនឹងចុះកិច្ចសន្យាជាមួយក្រុមហ៊ុន ដើម្បីផលិតសូត្រឆៅផ្គត់ផ្គង់ដល់ក្រុមហ៊ុន។
លោកថ្លែងថា៖ «ភាពជាដៃគូរវាងវិស័យឯកជននេះក៏មានការរៀបចំការផ្គត់ផ្គង់សម្បុកកូននាង ដែលមានគុណភាពល្អប្រសើរជាងមុន និងជំរុញការដាំដុះដើមមន ដែលមានគុណភាព ហើយកសិករនឹងទទួលបានកំណើនប្រាក់ចំណេញ»។
លោកបន្ថែមថា គម្រោងនេះជាវេទិកាសម្របសម្រួលពហុភាគីនៅក្នុងការជំរុញខ្សែចង្វាក់តម្លៃសូត្រតាមរយៈការរកដំណោះស្រាយលើបញ្ហាបច្ចេកទេស ប្រព័ន្ធស្រោចស្រព ឥណទាន និងការធ្វើពិពិធកម្មទីផ្សារ ព្រមទាំងការប្រមូលផ្តុំក្រុមកសិករផលិតដែលមានស្រាប់ និងចងក្រងបង្កើតក្រុមកសិករផលិតថ្មីៗបន្ថែមទៀតក្នុងគោលបំណងដើម្បីពង្រីក និងកែលម្អផលិកម្មឲ្យស្របតាមបទដ្ឋានសូត្រខ្មែរតាមរយៈបច្ចេកទេសថ្មីៗដើម្បីឆ្លើយតបតម្រូវការទីផ្សារ។
លោកថ្លែងថា៖ «ក្រសួងបានសហការជាមួយវិស័យឯកជន និងដៃគូអភិវឌ្ឍខ្សែចង្វាក់តម្លៃសូត្រ ដើម្បីដោះស្រាយកង្វល់ជាអាទិភាព និងពង្រីកវិស័យសូត្រសម្រាប់សេដ្ឋកិច្ចជាតិដោយផ្អែកលើតម្រូវការផលិតផលសូត្រនៅក្នុងស្រុក និងទីផ្សារអន្ដរជាតិ»។
លោកស្រី អ៊ុំ សោភា នាយិកាប្រតិបត្តិក្រុមហ៊ុន GSP Pheach Co., Ltd ដែលជាក្រុមហ៊ុនផលិតសូត្រខ្មែរក្នុងស្រុកមានមូលដ្ឋាននៅខេត្តសៀមរាប ប្រាប់ភ្នំពេញប៉ុស្តិ៍កាលពីថ្ងៃអាទិត្យថា ការចុះអនុស្សរណៈនេះគឺជា រួមចំណែករបស់វិស័យឯកជនក្នុងជួយជំរុញទីផ្សារសូត្រខ្មែរ និងបង្កើតការងារឲ្យកសិករ។
ជាមួយគ្នានេះទាំងរដ្ឋាភិបាល និងវិស័យឯកជនកំពុងខិតខំប្រឹងប្រែងជំរុញឲ្យការផលិតសូត្រមានតម្លៃដើមទាប ដើម្បីរក្សាភាពប្រកួតប្រជែងក្នុងទីផ្សារ។ លោកស្រីថ្លែងថា៖ «នេះជាការចូលរួមអភិវឌ្ឍន៍វិស័យសូត្រខ្មែររបស់យើង។ នៅពេលអនាគតយើងចង់ជំរុញឲ្យកសិករដាំដុះដើមមនឲ្យបានគ្រប់គ្រាន់ ហើយក្រុមហ៊ុននឹងជួយផ្តល់បច្ចេកទេសដាំដុះដល់ពួកគាត់»។
ដើម្បីធ្វើឱ្យវិស័យសូត្រខ្មែរមានភាពរស់រវើកឡើងវិញ រដ្ឋាភិបាលបានរៀបចំយុទ្ធសាស្ត្រសូត្រជាតិ ២០១៦-២០២០ ក្នុងបំណងធ្វើឲ្យការចិញ្ចឹមកូនដង្កូវនាងសម្រាប់ផលិតសរសៃសូត្រមានភាពទំនើបទាន់ និងប្រកបដោយចីរភាព។ នេះបើយោងតាមលោក សូរស័ក្តិ។
អ្នកស្រី ចេង សុភាព ស្ថាបនិក និងជាប្រធានសមាគមកីតម្បាញខ្មែរបាននិយាយថា អាជីវកម្មផលិតផលពីតម្បាញខ្មែរកំពុងខ្វះទីផ្សារយ៉ាងខ្លាំងដោយការរាតត្បាតនៃជំងឺកូវីដ ១៩។ អ្នកស្រីបន្តថា ដើម្បីរក្សាភាពប្រកួតប្រជែង និងរកទីផ្សារសូត្រខ្មែរឲ្យមានភាពរស់រវើកឡើងវិញ រដ្ឋាភិបាលត្រូវទប់ស្កាត់កុំឲ្យមានការនាំចូលផលិតផលពីសូត្រក្លែងក្លាយ៕ LA
