ភ្នំពេញៈ ក្រសួងពាណិជ្ជកម្មបានជូនដំណឹងដល់អ្នកប្រកបអាជីវកម្មតាមប្រព័ន្ធអេឡិចត្រូនិកឱ្យមកស្នើសុំលិខិតអនុញ្ញាតសុំអាជ្ញាប័ណ្ណ ដើម្បីប្រតិបត្តិការស្របច្បាប់នៅកម្ពុជា។
សេចក្តីជូនដំណឹងចុះថ្ងៃទី ២៦ ខែឧសភា បានឱ្យដឹងថា អ្នកធ្វើពាណិជ្ជកម្មតាមប្រព័ន្ធអេឡិចត្រូនិកត្រូវស្នើសុំលិខិតអនុញ្ញាត ឬអាជ្ញាប័ណ្ណពាណិជ្ជកម្មតាមប្រព័ន្ធអេឡិចត្រូនិក នៅនាយកដ្ឋានចុះបញ្ជីពាណិជ្ជកម្មនៃអគ្គនាយកដ្ឋានសេវាពាណិជ្ជកម្មរបស់ក្រសួងពាណិជ្ជកម្ម។
ក្រសួងពាណិជ្ជកម្មបានព្រមានថា ក្នុងករណីសហគ្រាសឯកបុគ្គល នីតិបុគ្គល និងសាខាក្រុមហ៊ុនបរទេសដែលធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកដោយគ្មានលិខិតអនុញ្ញាត ឬអាជ្ញាប័ណ្ណនឹងត្រូវបញ្ឈប់សកម្មភាព និងរងពិន័យជាប្រាក់ដូចមានចែងក្នុងលិខិតបទដ្ឋានច្បាប់ជាធរមាន។
សេចក្តីជូនដំណឹងបញ្ជាក់ថា ពាក្យស្នើសុំ បែបបទ លក្ខខណ្ឌ និងឯកសារតម្រូវផ្សេងៗសហគ្រាសទាំងអស់បុគ្គលស្នើសុំអាចដាក់ពាក្យស្នើសុំដោយផ្ទាល់នៅនាយកដ្ឋានចុះបញ្ជីពាណិជ្ជកម្ម អគ្គនាយកដ្ឋានសេវាពាណិជ្ជកម្មនៃក្រសួងពាណិជ្ជកម្ម ឬតាមរយៈគេហទំព័រ www.ecommercelicensing.moc.gov.kh ។
កាលពីថ្ងៃទី ៩ ខែតុលា ឆ្នាំ ២០២០ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានចេញប្រកាសតម្រូវឱ្យអ្នកមានអាជីវកម្មតាមប្រព័ន្ធអេឡិចត្រូនិកទៅដាក់ពាក្យស្នើសុំលិខិតអនុញ្ញាត និងអាជ្ញាប័ណ្ណដើម្បីអាចប្រតិបតិ្តការស្របច្បាប់នៅកម្ពុជា ស្របពេលដែលអាជីវកម្មតាមអេឡិចត្រូនិកកំពុងរីកចម្រើនយ៉ាងខ្លាំងជាពិសេស បន្ទាប់ពីការរីករាលដាលនៃជំងឺកូវីដ-១៩។
ច្បាប់ពាណិជ្ជកម្មតាមប្រព័ន្ធអេឡិចត្រូនិករបស់កម្ពុជាត្រូវបានចូលជាធរមានកាលពីខែវិច្ឆិកា ឆ្នាំ ២០១៩ ដែលមានគោលបំណងគ្រប់គ្រងពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។
ស្ថាបនិកក្រុមហ៊ុន ស៊ូភើអេប តិចណូឡូជី ភីអិលស៊ី លោក ប៉ាត់ ចំណាន បានគាំទ្រចំណាត់ការនេះ ដោយតម្រូវឱ្យគ្រប់ម្ចាស់អាជីវកម្មតាមប្រព័ន្ធអេឡិចត្រូនិកត្រូវមានលិខិតអនុញ្ញាត ឬ អាជ្ញាប័ណ្ណត្រឹមត្រូវ។
លោកនិយាយថា៖ «ខ្ញុំយល់ថា នេះគឺជារឿងល្អប្រសើរមួយដែលគ្រប់ក្រុមហ៊ុនត្រូវមានលិខិតអនុញ្ញាត ឬអាជ្ញាប័ណ្ណដែលនឹងជួយការពារ និងទប់ស្កាត់ការលក់ទំនិញក្លែងក្លាយ ទំនិញផុតសុពលភាព និងទំនិញ ខុសច្បាប់នៅលើទីផ្សារ»។
លោកបានបន្តថា ឧស្សាហកម្ម ៤.០ បាននិងកំពុងដើរតួនាទីយ៉ាងសំខាន់ក្នុងការរួមចំណែកជំរុញកំណើនសេដ្ឋកិច្ចជាតិឱ្យកាន់តែរីកចម្រើន៖ «ទៅអនាគតសហគ្រាសដែលធ្វើពាណិជ្ជកម្មតាមប្រព័ន្ធអេឡិចត្រូនិកនឹងចូលរួមចំណែកបង្កើតការងារដល់ប្រជាជននៅក្នុងស្រុកកាន់តែច្រើន»៕ LA