ភ្នំពេញ៖ ក្រសួងពាណិជ្ជកម្មធ្វើការបំភ្លឺចំពោះមតិរិះគន់មួយចំនួនថា ការអនុញ្ញាតឲ្យអាជីវករចូលរួមលក់ទំនិញតាមទីតាំងរបស់ក្រសួងពាណិជ្ជកម្មដែលបានបង្កើតក្នុងទ្រង់ទ្រាយតូចៗ គឺផ្ទុយទៅនឹងវិធានការការពាររបស់រាជរដ្ឋាភិបាលដែលហាមការប្រមូលផ្តុំ ដើម្បីទប់ស្កាត់ការរីករាលដាលជំងឺកូវីដ ១៩។
សេចក្តីបំភ្លឺរបស់ក្រសួងពាណិជ្ជកម្មបានផ្សាយនៅថ្ងៃទី ២៧ មេសាថា ការអនុញ្ញាតឲ្យអាជីវករលក់នៅក្នុងទ្រង់ទ្រាយតូចៗនៅតាមទីតាំងរបស់ក្រសួង គឺស្មើគ្នានឹងការអនុញ្ញាតឲ្យបង្កើតផ្សារសាជាថ្មីឡើងវិញ ដែលអាចជាប្រភពនៃការចម្លងខ្ពស់ ឬបង្កើនការរីករាលដាលនៃជំងឺកូវីដ ១៩ កាន់តែខ្លាំងឡើង។
សេចក្តីបំភ្លឺឲ្យដឹងថា ការផ្តល់មតិយោបល់ជាចំហក្នុងន័យស្ថាបនា ក៏ដូចជាការផ្សព្វផ្សាយព័ត៌មានមិនពិត និងមតិវាយប្រហារបន្ទុចបង្អាក់សកម្មភាពរបស់ក្រសួងពាណិជ្ជកម្មក្នុងការសម្របសម្រួលលក់ផ្គត់ផ្គង់ ដឹកជញ្ជូន និងចែកចាយលក់ស្បៀងអាហារ និងគ្រឿងឧបភោគបរិភោគចាំបាច់ជូនប្រជាពលរដ្ឋក្នុងតំបន់ក្រហម។
សេចក្តីបំភ្លឺបញ្ជាក់ថា កិច្ចការរបស់ក្រសួងនេះបានធ្វើឡើងស្របតាមសេចក្ដីណែនាំលេខ ០១ សណន ចុះថ្ងៃទី ១៩ ខែ មេសា ឆ្នាំ ២០២១ របស់រាជរដ្ឋាភិបាល។
សេចក្តីបំភ្លឺឲ្យដឹងថា ដោយហេតុថា ទីផ្សារ និងទីកន្លែងលក់ម្ហូបអាហារ និងគ្រឿងឧបភោគបរិភោគមួយចំនួនត្រូវបានផ្អាកសកម្មភាពជាបណ្តោះអាសន្ន ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ដូច្នេះក្រសួងក៏បានបញ្ចេញស្បៀងឲ្យចរាចរណ៍ក្នុងទីផ្សារតាមរយៈរថយន្តចល័តរបស់ក្រុមហ៊ុន ហ្គ្រីន ត្រេដ។
ក្រសួងបានបញ្ចេញរថយន្តចល័តចំនួន ៨ គ្រឿង និងដំឡើងស្ដង់លក់ទំនិញរបស់ក្រសួងពាណិជ្ជកម្មសរុបមាន ១១ ទីតាំង ដែលមាន ២៥ ស្តង់ ដើម្បីទ្រទ្រង់ស្ថិរភាពថ្លៃទំនិញ ក៏ដូចជាទប់ស្កាត់ការឡើងថ្លៃហួសហេតុដែលបង្កឡើងដោយជនឆក់ឱកាស និងជនខិលខូចមួយចំនួន។
ទន្ទឹមនឹងនេះ ក្រសួងពាណិជ្ជកម្មក៏បានចាត់មន្ត្រីរបស់ខ្លួនឲ្យបន្តចុះត្រួតពិនិត្យ និងតាមដានសន្ទស្សន៍ថ្លៃទំនិញតាមទីផ្សារជាប្រចាំ ដើម្បីទប់ស្កាត់ការបន្លំគុណភាព ការលក់ដូរបំប៉ោងតម្លៃទំនិញ ព្រមទាំងណែនាំដល់អាជីវករទាំងអស់ឲ្យបិទស្លាកថ្លៃនៅលើមុខទំនិញ និងកុំឲ្យមានការផ្លាស់ប្តូរថ្លៃទំនិញតាមអំពើចិត្តលើសពីតម្លៃទំនិញ ដែលបានលក់មុនពេលបិទខ្ទប់។
ក្រសួងបញ្ជាក់ថា ក្នុងករណីមានការលួចបន្លំដំឡើងថ្លៃណាមួយកើតឡើង ប្រជាពលរដ្ឋអាចរាយការណ៍ជាបន្ទាន់មកកាន់អាជ្ញាធរមានសមត្ថកិច្ច និងអង្គភាពពាក់ព័ន្ធរបស់ក្រសួង ឬមន្ត្រីប្រចាំការនៅតាមស្តង់លក់ទំនិញ ដើម្បីចាត់វិធានការឲ្យបានទាន់ពេលវេលា។
ក្រសួងពាណិជ្ជកម្មក៏បានសម្របសម្រួលជាមួយក្រុមហ៊ុនឯកជន និងអាជីវករមួយចំនួន ដើម្បីចូលរួមផ្គត់ផ្គង់ទំនិញចាំបាច់ដទៃទៀតជូនដល់ប្រជាពលរដ្ឋផងដែរ។
តាមរយៈការសម្របសម្រួលនេះ ក្រសួងពាណិជ្ជកម្មបានតម្រូវឲ្យមានការលក់តែទំនិញដែលមានតម្រូវការចាំបាច់បំផុត ដូចជាមាន់ ត្រី សាច់ បន្លែ ផ្លែឈើ អាហារសម្រាប់កុមារ និងម្ហូបក្រៀមផ្សេងៗក្នុងតម្លៃសមស្រប និងតម្រូវឲ្យការលក់មានរបៀបរៀបរយតាមវិធានការការពាររបស់ក្រសួងសុខាភិបាល។
ក្នុងរយៈពេល ៥ ថ្ងៃ គិតពីថ្ងៃទី ២២ ដល់ ២៦ ខែ មេសា ឆ្នាំ ២០២១ ក្រសួងពាណិជ្ជកម្មបានលក់ស្បៀងជូនប្រជាពលរដ្ឋរស់នៅក្នុងតំបន់ក្រហមបានអង្ករ ១ ៤៥២ បេ មី ៤ ២៨៣ កេស ត្រីខ ២ ៨០៣ យួរ ទឹកត្រី ១ ១៦១ យួរ ទឹកស៊ីអ៊ីវ ១ ០៩៧ យួរ ទឹកបរិសុទ្ធ ២៣០ យួរ ឆៃប៉ូវ ៦០២ ថង់ (១ ថង់ ២ គីឡូក្រាម) រួមទាំងបន្លែបង្ការមួយចំនួនទៀត៕