.jpg)
កសិករបេះផ្លែក្រូចក្នុងចម្ការនៅខេត្តបាត់ដំបង។ បាត់ដំបងក៏មានសិទ្ធិចេញ CO ដែរ។ ហេង ជីវ័ន
ភ្នំពេញៈ ខេត្តចំនួន ២ បន្ថែមទៀតនៅពេលនេះត្រូវបានផ្តល់អំណាចឲ្យចេញវិញ្ញាបនបត្របញ្ជាក់ប្រភពដើម (CO) ទម្រង់ D ដើម្បីជួយសម្រួលដល់ក្រុមហ៊ុននាំចេញឲ្យទទួលបានភាពកាន់តែងាយស្រួលក្នុងការដាក់ពាក្យសុំនៅតាមទីតាំងរបស់ពួកគេ ខណៈរដ្ឋាភិបាលគ្រោងផ្តល់អំណាចសម្រាប់ការចេញ CO ដល់មន្ទីរពាណិជ្ជកម្មនៅតាមខេត្តនីមួយៗនៅឆ្នាំខាងមុខ។
ខេត្តព្រះវិហារ និងខេត្តពោធិ៍សាត់អាចចេញ CO ទម្រង់ D ដល់ក្រុមហ៊ុននាំចេញនៅក្នុងខេត្តទាំងនេះបានចាប់ពីថ្ងៃទី ៩ ខែធ្នូ ឆ្នាំនេះទៅ។ នេះបើតាមសេចក្ដីប្រកាសព័ត៌មានរបស់ក្រសួងពាណិជ្ជកម្មដែលចេញផ្សាយនៅថ្ងៃសុក្រមុន។
សេចក្ដីប្រកាសព័ត៌មាននេះបានឲ្យដឹងថា៖ «ពាណិជ្ជករ និងក្រុមហ៊ុនផលិតកម្មនៃផលិតផលកសិកម្មក្នុងខេត្តភាគឦសានទាំង ២ នេះអាចដាក់ពាក្យសុំទម្រង់នេះតាមរយៈអនឡាញដោយផ្ទាល់ ហើយពួកគេអាចទទួលបាន CO ទម្រង់ D នៅមន្ទីរពាណិជ្ជកម្មខេត្តរបស់ពួកគេរៀងៗខ្លួន»។
CO ទម្រង់ D ត្រូវបានតម្រូវឲ្យមានដោយប្រទេសនាំចូលនៅក្នុងប្លុកអាស៊ាន ដែលនាំចូលផលិតផលកសិកម្មពីប្រទេសកម្ពុជា។
ក្រសួងពាណិជ្ជកម្មបានសម្រេចចិត្តធ្វើប្រតិភូកម្មដល់មន្ទីរពាណិជ្ជកម្មខេត្ត ក្នុងការចេញ CO ទម្រង់ D ក្នុងគោលបំណងជួយសម្រួលដល់ពាណិជ្ជករក្នុងការដាក់ពាក្យសុំទម្រង់នេះដែលមុនឆ្នាំ ២០១៧ ពាណិជ្ជករជាពិសេសក្រុមហ៊ុននាំចេញនៅតាមខេត្តត្រូវតែដាក់ពាក្យសុំទម្រង់នេះដោយផ្ទាល់នៅក្រសួងដែលត្រូវបានគេមើលឃើញថា ខាតពេលវេលាសម្រាប់ពាណិជ្ជករ។
ថ្មីៗនេះក្រសួងបានធ្វើប្រតិភូកម្មសម្រាប់ការចេញទម្រង់ D នេះទៅដល់មន្ទីរពាណិជ្ជកម្មខេត្តមួយចំនួនក្នុងប្រទេស ដើម្បីជួយសម្រួលដល់សកម្មភាពអាជីវកម្ម និងការនាំចេញ។
សេចក្ដីប្រកាសព័ត៌មានបានឲ្យដឹងថា៖ «ក្រសួងពាណិជ្ជកម្មនឹងបន្តធ្វើប្រតិភូកម្មដល់ការចេញ CO ទម្រង់ D សម្រាប់ការនាំចេញផលិតផលកសិកម្មដល់មន្ទីរពាណិជ្ជកម្មខេត្តទាំងអស់នៅពេលខាងមុខក្នុងពេលឆាប់ៗនេះ»។
លោក ផាន សំអាង ប្រធានមន្ទីរពាណិជ្ជកម្មខេត្តព្រះវិហារបានឲ្យដឹងថា ការអនុញ្ញាតពីក្រសួងគឺជាជំហានវិជ្ជមានមួយ ដើម្បីអនុញ្ញាតឲ្យខេត្តអាចចេញ CO ទម្រង់ D សម្រាប់ក្រុមហ៊ុននាំចេញ ដោយសារតែវានឹងមានភាពកាន់តែងាយស្រួល កាត់បន្ថយការចំណាយប្រាក់ និងពេលវេលាសម្រាប់ពួកគេ។
លោកបានថ្លែងថា៖ «យើងដំឡើងប្រព័ន្ធនេះរួចហើយនៅមន្ទីរពាណិជ្ជកម្មខេត្តរបស់យើង ដើម្បីឲ្យពាណិជ្ជករ ឬក្រុមហ៊ុននាំចេញទាំងអស់ដែលចង់ធ្វើការនាំចេញណាមួយនូវផលិតផលរបស់ពួកគេ ពួកគេអាចដាក់ពាក្យសុំនៅទីនេះបាន»។
លោកបន្ថែមថា៖ «នេះគឺជាសញ្ញាវិជ្ជមានមួយជាកិច្ចប្រឹងប្រែងរបស់រដ្ឋាភិបាលក្នុងការជួយសម្រួលដល់ពាណិជ្ជកម្មអាជីវកម្មរបស់យើង»។
ប្រធានមន្ទីររូបនេះបានឲ្យដឹងទៀតថា ភាគច្រើននៃអាជីវកម្មនៅក្នុងខេត្តរបស់លោក ភាគច្រើនគឺការនាំចេញផលិតផលកសិកម្មទៅបណ្ដាប្រទេសជិតខាង ជាពិសេសប្រទេសថៃ។
ទោះយ៉ាងណាលោកមិនមានទិន្នន័យអំពីទំហំនៃការនាំចេញពាណិជ្ជកម្មដែលខេត្តនេះមាននោះទេ។
អ្នកស្រី ឈុន សេរីរ័ត្ន ប្រធានមន្ទីរពាណិជ្ជកម្មខេត្តពោធិ៍សាត់ឲ្យដឹងថា ក្រុមមន្ដ្រីរបស់អ្នកស្រីនឹងផ្សព្វផ្សាយសេចក្ដីប្រកាសនេះដល់ពាណិជ្ជករ និងសហគមន៍អាជីវកម្មទាំងអស់ក្នុងខេត្ត ដើម្បីជូនដំណឹងដល់ពួកគេអំពីការដាក់ពាក្យសុំ CO ពីមន្ទីរ។
អ្នកស្រីថ្លែងថា៖ «ការចាប់ផ្ដើមពីថ្ងៃស្អែក [ថ្ងៃនេះ] ក្រុមមន្ដ្រីរបស់យើងនឹងធ្វើដំណើរដោយផ្ទាល់ទៅដល់សហគមន៍អាជីវកម្មដែលមានសក្ដានុពលជាច្រើន និងជូនដំណឹងដល់ពាណិជ្ជកររបស់យើងថា ចាប់ពីពេលនេះតទៅ ពួកគេអាចដាក់ពាក្យសុំនៅកន្លែងយើងបាន ដូច្នេះពួកគេមិនចាំបាច់ត្រូវទៅទីក្រុងភ្នំពេញដើម្បីដាក់ពាក្យសុំនៅក្រសួងទេ បើពួកគេចង់ធ្វើការនាំចេញណាមួយ»។
អ្នកស្រី សេរីរ័ត្ន ឲ្យដឹងថា ខេត្តរបស់លោកស្រីសម្បូរដោយផលិតផលកសិកម្ម ភាគច្រើនដំឡូង និងក្រូចពោធិ៍សាត់ដែលភាគច្រើននាំចេញទៅប្រទេសវៀតណាម និងថៃ។
ចាប់តាំងពីឆ្នាំ ២០១៧ មក ក្រសួងពាណិជ្ជកម្មបានធ្វើប្រតិភូកម្មដល់ការចេញ CO ទម្រង់ D ដល់ខេត្ត ៩ ដូចជាខេត្តរតនគិរី ត្បូងឃ្មុំ ប៉ៃលិន បាត់ដំបង បន្ទាយមានជ័យ ឧត្តរមានជ័យ ក្រចេះ ស្ទឹងត្រែង និងមណ្ឌលគិរី។
ស្ថិតក្រោមការកែទម្រង់ថ្មីនៃផ្តល់អំណាចចេញ CO ទម្រង់ D នេះ ដំណើរការនៃការដាក់ពាក្យសុំ CO នៅពេលនេះត្រូវការរយៈពេលតែ ១៦ ម៉ោងប៉ុណ្ណោះ ធៀបនឹងពី ១០ ថ្ងៃដល់ ២ សប្ដាហ៍ បើការដាក់ពាក្យសុំត្រូវបានធ្វើឡើងនៅក្រសួងពាណិជ្ជកម្មនៅទីក្រុងភ្នំពេញ៕ LA
