ភ្នំពេញ: ក្រសួងពាណិជ្ជកម្មបើកផ្លូវឲ្យក្រុមហ៊ុន K.C.C.V Plantation Co., Ltd ដែលជាក្រុមហ៊ុនឯកជនដែលបានបង្កើតផ្សារអាហារសុវត្ថិភាពក្នុងខណ្ឌជ្រោយចង្វារ ចូលរួមអភិវឌ្ឍខ្សែចង្វាក់តម្លៃផលិតផលកសិពាណិជ្ជកម្ម បន្ថែមសុវត្ថិភាពដែលក្រសួងកំពុងអនុវត្តក្រោមកម្ចីពីមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD)។
ថ្នាក់ដឹកនាំក្រសួងពាណិជ្ជកម្ម និង តំណាងក្រុមហ៊ុនបានចុះអនុស្សរណៈយោគយល់គ្នាកាលពីថ្ងៃអង្គារដោយភាគីទាំង ២ សុទ្ធតែអះអាងថា តាមរយៈអនុស្សរណៈនេះភាគីទាំង ២ នឹងមានលទ្ធភាពធ្វើការងារកាន់តែទូលំទូលាយ និងកាន់តែស៊ីជម្រៅលើការអភិវឌ្ឍទីផ្សារកសិកម្មខ្នាតតូចនេះ។
លោក ប៉ាវ ហេងតារា រដ្ឋលេខាធិការនៃក្រសួងពាណិជ្ជកម្មបានអះអាងថា ការចុះហត្ថលេខាជាមួយក្រុមហ៊ុននេះ ដើម្បីរួមចំណែកដោះស្រាយបញ្ហាប្រឈមទីផ្សារបន្លែនៅកម្ពុជា។
លោកថ្លែងថា៖ «អនុស្សរណៈយោគយល់គ្នានឹងបង្កើនកិច្ចសហការគ្នាកាន់តែស៊ីជម្រៅរវាងគម្រោងជំរុញទីផ្សារសម្រាប់កសិកម្មខ្នាតតូច និងផ្សារទំនើប ហើយវានឹងធ្វើឱ្យប្រសើរឡើងនូវខ្សែចង្វាក់តម្លៃផលិតផលកសិពាណិជ្ជកម្មបន្លែសុវត្ថិភាពជាពិសេសជួយសម្របសម្រួលដល់ក្រុមផលិតបន្លែសុវត្ថិភាពដោយគាំទ្រផែនការផលិតបន្លែ និង តភ្ជាប់ទីផ្សារ»។
លោកបន្តថា អនុស្សរណៈនឹងផ្តោតលើគម្រោងជំរុញទីផ្សារសម្រាប់កសិកម្មខ្នាតតូច (AIMS) ដែលជាគម្រោងរួមគ្នារវាងរដ្ឋាភិបាលកម្ពុជាជាមួយនឹងមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD)។ ក្រសួងពាណិជ្ជកម្មដែលជាអ្នកដឹកនាំប្រតិបត្តិគម្រោងនេះបានចងក្រងបណ្តាញកសិករផលិតបន្លែសុវត្ថិភាពនៅតាមបណ្តាខេត្តគោលដៅចំនួន ១៨ ដើម្បីតភ្ជាប់ទីផ្សារ និងសម្របសម្រួលភាពជាដៃគូជាមួយវិស័យ ឯកជនក្នុងការលើកកម្ពស់ផលិតភាព និងផលចំណេញលើវិស័យបន្លែ។
លោកនិយាយថា៖ «គម្រោងនេះនឹងផ្តោតការលើកកម្ពស់ខ្សែចង្វាក់តម្លៃទំនិញពាណិជ្ជចំនួន ៥ មុខដូចជា បន្លែ មាន់ អង្ករក្រអូប ដំឡូងមី និងសូត្រ។ លើសពីនេះគម្រោងសម្របសម្រួលវេទិកាពហុភាគីពាក់ព័ន្ធជាមួយតួអង្គខ្សែចង្វាក់តម្លៃបន្លែដើម្បីដោះស្រាយបញ្ហាប្រឈមក្នុងវិស័យនេះ ដូចជា បច្ចេកទេសដាំដុះការធ្វើផែនការ ហិរញ្ញវត្ថុ និងអាជីវកម្ម ប្រព័ន្ធស្រោចស្រពឥណទាន និងទីផ្សារ»។
លោក នេត អង្គារ អ្នកគ្រប់គ្រងទូទៅរបស់ក្រុមហ៊ុន K.C.C.V Plantation Co., Ltd បានប្រាប់ភ្នំពេញប៉ុស្តិ៍ថា ការចុះហត្ថលេខានេះនឹងផ្តល់សិទ្ធិឲ្យក្រុមហ៊ុនរបស់លោកទទួលទិញកសិផល ត្រី សាច់ ពីកសិករក្នុងគម្រោងដើម្បីដាក់តាំងលក់នៅក្នុងផ្សាររបស់ក្រុមហ៊ុនឈ្មោះថា ផ្សារអាហារសុវត្ថិភាព។
លោកបន្តថា ផ្សារនេះគ្រោងនឹងបើកលក់ជាផ្លូវការនៅថ្ងៃ ១១ ខែមិថុនា ខាងមុខនេះដែលសាងសង់លើផ្ទៃដីទំហំ ៣ ៧០០ ម៉ែត្រការ៉េស្ថិតនៅក្នុងខណ្ឌជ្រោយចង្វារ រាជធានីភ្នំពេញ។
លោកថ្លែងថា៖ «យើងនឹងទទួលទិញបន្លែ ត្រីសាច់ ពីកសិករនៃគម្រោងនេះសម្រាប់មកដាក់លក់នៅផ្សាររបស់យើង។ យើងនឹងទិញបន្លែ ១ មុខចំនួន ២០ គីឡូពីកសិករជាជំហានសាកល្បង ហើយសាច់យើងកំពុងចរចាគ្នាថាតើគួរទិញប៉ុន្មានគីឡូ»។
គម្រោង AIMS មានរយៈពេលអនុវត្ត ៦ ឆ្នាំចាប់ពីឆ្នាំ ២០១៧ ដល់ឆ្នាំ ២០២៣ ក្នុងទំហំទឹកប្រាក់សរុប ៤៥ លានដុល្លារក្នុងនោះ IFAD បានផ្តល់មូលនិធិចំនួន ៣៦,២៥ លានដុល្លារ និង ៨,៦៨ លានដុល្លារបានពីរដ្ឋាភិបាលកម្ពុជា៕