.jpg)
សកម្មភាពអាជីវកម្មខ្មែរដឹកទំនិញពីប្រទេស ថៃ ចូលមកកម្ពុជាតាមច្រកព្រំដែន អូរស្មាច់ នាពេលកន្លងមក។ ហេង ជីវ័ន
ភ្នំពេញៈ ក្រសួងពាណិជ្ជកម្មកម្ពុជា រកបានប្រាក់ចំណូលជាង ៨២ លានដុល្លារក្នុងឆ្នាំ ២០១៨ ដែលទទួលបានពីពន្ធគយ និងសេវាសាធារណៈ។ នេះបើតាមរបាយការណ៍ប្រចាំឆ្នាំរបស់ក្រសួងពាណិជ្ជកម្ម។
របាយការណ៍បង្ហាញថា អគ្គនាយកដ្ឋានកាំកុងត្រូល ដែលជាសេនាធិការបស់ក្រសួង ពាណិជ្ជកម្ម រកបានចំណូល ២៨,៧៥ លានដុល្លារពីសេវាត្រួតពិនិត្យគុណភាពទំនិញ កើនឡើង ១២,៩២ ភាគរយធៀបនឹងឆ្នាំមុន។ ក្រសួងក៏រកបានប្រាក់ចំណូលប្រហែល ៥២,៧៨ លានដុល្លារពីសេវាសាធារណៈផងដែរ។ របាយការណ៍នេះក៏បានបង្ហាញផងដែរពីការចំណាយរបស់ក្រសួងដែលមានចំនួន ២៧,១១ លានដុល្លារ។
របាយការណ៍បានបង្ហាញថា ក្រុមហ៊ុន Green Trade ដែលគ្រប់គ្រងដោយរដ្ឋរកប្រាក់ចំណូលបាន ២,៨៩ លានដុល្លារ ខណៈការចំណាយទៅវិញរបស់ក្រុមហ៊ុននេះមានចំនួន ២,៧៥ លានដុល្លារ ដែលធ្វើឲ្យប្រាក់ចំណេញបានពីក្រុមហ៊ុនរដ្ឋមួយនេះក្នុងឆ្នាំ ២០១៨ មានចំនួន ១៣៧ ០០០ ដុល្លារប៉ុណ្ណោះ។
ក្រុមហ៊ុននេះបានធ្វើពាណិជ្ជកម្មជាមួយក្រុមហ៊ុន COFCO មកពីប្រទេស ចិន ដែលបាននាំចេញអង្ករ ១ ០០០ តោនទៅចិន និងបានលក់ឲ្យ WFP ៣ ៧០០ តោន ក្នុងឆ្នាំ ២០១៨។
លោក លឹម ហេង អនុប្រធានសភាពាណិជ្ជកម្មកម្ពុជា បានឲ្យដឹងថា ចំណូលនេះគឺជា ប្រភពដ៏សំខាន់ក្នុងការជំរុញសេដ្ឋកិច្ចជាតិ ដែលជាផ្នែកមួយនៃចំណូលពន្ធ។ លោកថ្លែងថា៖ «វាផ្ដល់ប្រយោជន៍កាន់តែច្រើនដល់សេដ្ឋកិច្ចរបស់យើង ក្រសួងពាណិជ្ជកម្មគឺជាអ្នកដើរតួនាទីដ៏សំខាន់ ក្នុងការទាក់ទាញក្រុមវិនិយោគិន និងជំរុញលំហូរចូលពាណិ ជ្ជកម្ម និងពាណិជ្ជកម្ម នៅក្នុងប្រទេស»។
លោកបានបន្តថា៖ «ប្រាក់ចំណូលបានពីសេវាសាធារណៈ មានន័យថា លំហូរចូលក្រុមហ៊ុនចុះបញ្ជីបានកើនឡើង ដូច្នេះនិន្នាការសេដ្ឋកិច្ចរបស់យើងបានរក្សាកាន់តែ ប្រសើរឡើងៗ ដោយសារប្រតិបត្ដិករនៅក្នុងវិស័យនេះ គោរពតាមច្បាប់»។
លោក តែ តាំងប៉ ប្រធានសម្ព័ន្ធសមគមសហគ្រាសធុនតូច និងមធ្យមកម្ពុជា បានឲ្យដឹងថា ចំនួនប្រាក់ចំណូលគឺជាសញ្ញាល្អសម្រាប់ប្រទេសនេះ ប៉ុន្តែក្រសួងគួរតែជំរុញសេវាសាធារណៈឲ្យកាន់តែមានប្រសិទ្ធភាពបន្ថែមទៀត ដើម្បីបង្កើនទំនុកចិត្តសម្រាប់សាធារណជន។
លោកបានលើកឡើងថា៖ «ប្រាក់ចំណូលកាន់តែច្រើនដែលក្រសួងពាណិជ្ជកម្មរកបានពីសេវាសាធារណៈ ក្រសួងគួរតែធ្វើការងារឲ្យមានប្រសិទ្ធភាពបន្ថែមទៀត ដើម្បីជំរុញសេវាសាធារណៈ បន្ទាប់មកប្រជាជននឹងសប្បាយចិត្ត ក្នុងការគោរពតាមច្បាប់»។ លោកបន្តថា៖ «ក្រសួងពាណិជ្ជកម្ម មិនគួរពឹងផ្អែកខ្លាំងលើកម្រៃ បានពីពិព័រណ៍អន្តរជាតិ ដែលមានផលប៉ះពាល់លើផលិតផលក្នុងស្រុក»៕LA
