.jpg)
ផលិតផលកែច្នៃពីទឹកមាត់ត្រចៀកកាំ ក្នុងពិព័រណ៍នៅកោះពេជ្រ។ ហេង ជីវ័ន
ភ្នំពេញ: ក្រសួងពាណិជ្ជកម្មនឹងបន្តរៀបចំពិព័រណ៍ផលិតផលខ្មែរនៃយុទ្ធនាការទិញផលិតផលខ្មែររដូវកាលទី ៥ ដើម្បីរួមចំណែកស្តារសេដ្ឋកិច្ចជាតិដែលទទួលរងផលប៉ះពាល់ដោយសារវិបត្តិជំងឺកូវីដ១៩។
កម្មវិធីតាំងពិព័រណ៍ផលិតផលខ្មែរនឹងត្រូវរៀបចំនៅថ្ងៃទី ២៤ ដល់ថ្ងៃទី ២៧ ខែធ្នូ ឆ្នាំ ២០២០ នៅទីក្រុងសិរីសោភ័ណ ខេត្តបន្ទាយមានជ័យ។
សេចក្តីជូនដំណឹងរបស់ក្រសួងពាណិជ្ជកម្មចេញផ្សាយកាលពីថ្ងៃសៅរ៍បានឱ្យដឹងថា ការរៀបចំព្រឹត្តិការណ៍នេះធ្វើឡើងក្នុងគោលបំណងតភ្ជាប់ទំនាក់ទំនងសេដ្ឋកិច្ចគ្រប់ប្រព័ន្ធរវាងរាជធានី-ភ្នំពេញជាមួយនឹងបណ្តាខេត្តទូទាំងប្រទេស។ ការរៀបចំពិព័រណ៍នេះក៏នឹងចូលរួមចំណែកដល់ដំណើរការអភិវឌ្ឍសេដ្ឋកិច្ចជាតិឡើងវិញ។
សេចក្តីជូនដំណឹងនេះបន្តថា ក្រសួងពាណិជ្ជកម្មនឹងប្រមូលកៀរគរផលិតផលខ្មែរដែលមានគុណភាពខ្ពស់ សុវត្ថិភាពសម្រាប់អ្នកប្រើប្រាស់ និងមានការវេចខ្ចប់បានល្អត្រឹមត្រូវអនុលោមតាមស្ទង់ដាផលិតកម្មមកដាក់តាំងបង្ហាញ និងស្វែងរកដៃគូទៅលក់បន្ត។
សេចក្តីជូនដំណឹងបញ្ជាក់ថា៖ «លោក-លោកស្រីដែលមានបំណងចូលរួមតាំងបង្ហាញផលិតផលខ្មែរក្នុងព្រឹត្តិការណ៍នេះសូមប្រញាប់រួសរាន់មកដាក់ពាក្យចូលរួម ព្រោះចំនួនមានកំណត់»។
លោក ស៊ាង ថៃ អ្នកនាំពាក្យក្រសួងពាណិជ្ជកម្មប្រាប់ភ្នំពេញប៉ុស្តិ៍ថា ការរៀបចំពិព័រណ៍ផលិតផលខ្មែរក្នុងយុទ្ធនាការទិញផលិតផលខ្មែរគឺធ្វើឡើងដើម្បីពញ្ញាក់ស្មារតីប្រជាជនកម្ពុជាឱ្យងាកមកប្រើប្រាស់ផលិតផលខ្មែរដែលកំពុងមានការលូតលាស់ក្នុងក្របខ័ណ្ឌទូទាំងប្រទេស។
លោកបន្តថា ដោយសារការរាតត្បាតកូវីដ១៩ ក្រសួងបានកម្រិតចំនួនស្តង់សមល្មមដែលអាចគ្រប់គ្រងភ្ញៀវចូលទស្សនាដើម្បីរក្សានូវគម្លាតសុវត្ថិភាពតាមសេចក្តីណែនាំរបស់ក្រសួងសុខាភិបាលដែលបានដាក់ចេញ។
លោកថ្លែងថា៖ «ក្រសួងតែងតែណែនាំឱ្យផលិតករយកចិត្តទុកដាក់ផលិតនូវទំនិញដែលមានគុណភាព សុវត្ថិភាព សោភណភាព និងតម្លៃសមរម្យអាចប្រកួតប្រជែងជាមួយទំនិញនាំចូលពីក្រៅប្រទេស។ នេះគឺជានយោបាយដ៏សំខាន់មួយជួយផលិតផលខ្មែរទទួលបានការគាំទ្រដោយប្រជាជនខ្មែរ ហើយជំហានបន្ទាប់ក្រសួងពាណិជ្ជកម្មនឹងជំរុញការនាំចេញ»។
អ្នកស្រី កែវ មុំ អគ្គនាយិកាក្រុមហ៊ុន លីលី ហ៊្វូតដាសទ្រី ខូ អិលធីឌី (LY LY Food Industry Co., Ltd) កត់សម្គាល់ថា ក្រសួងពាណិជ្ជកម្មតែងតែគិតគូរអំពីការជំរុញទីផ្សារផលិតផលរបស់ខ្មែរ។
អ្នកស្រីនិយាយថា៖ «ខ្ញុំគិតថាការគាំទ្ររបស់ក្រសួងពាណិជ្ជកម្មក្នុងយុទ្ធនាការនេះបានជួយជំរុញឱ្យផលិតផលខ្មែរមានការទទួលស្គាល់ពីប្រជាជនខ្មែរយើង»។
អ្នកស្រីបានឱ្យដឹងថា ក្រុមហ៊ុននំស្រួយលីលី តែងតែចូលរួមក្នុងយុទ្ធនាការទិញផលិតផលខ្មែរ ហើយក្រុមហ៊ុនកំពុងពិចារណាចូលរួមពិព័រណ៍នេះដែរ។
អ្នកស្រីថ្លែងថា៖ «ខ្ញុំសង្ឃឹមថាក្រសួងពាណិជ្ជកម្មនឹងបន្តធ្វើយុទ្ធនាការជំរុញផលិតផលខ្មែរយើងឱ្យកាន់តែធំជាងមុនដើម្បីឱ្យប្រជាជនងាកមកប្រើប្រាស់ផលិតផលខ្មែរ ដើម្បីជួយទ្រទ្រង់សេដ្ឋកិច្ចជាតិយើង»។
អ្នកស្រី ចេន សុភាព ស្ថាបនិក និងនាយិកាសហគ្រាសកីតម្បាញខ្មែរបានប្រាប់ភ្នំពេញប៉ុស្តិ៍ថា ការរៀបចំព្រឹត្តិការណ៍នេះនឹងជួយលើកកម្ពស់ផលិតផលរបស់កម្ពុជាដើម្បីជំរុញការគាំទ្រផលិតផលខ្មែរពីប្រជាពលរដ្ឋតាមបណ្តាខេត្តទូទាំងប្រទេសកម្ពុជា។
អ្នកស្រីបញ្ជាក់៖ «ខ្ញុំយល់ថាការរៀបចំពិព័រណ៍ជាកម្មវិធីល្អសម្រាប់ជួយផ្សព្វផ្សាយផលិតផលខ្មែរក្នុងស្រុក»។
លោក សុខ ដារិទ្ធិ អនុប្រធាននាយកដ្ឋានលើកកម្ពស់ពាណិជ្ជកម្មនៅក្រសួងពាណិជ្ជកម្មធ្លាប់ប្រាប់ភ្នំពេញ- ប៉ុស្តិ៍ថា ក្រសួងពាណិជ្ជកម្មនឹងបន្តរៀបចំពិព័រណ៍ផលិតផលខ្មែររដូវកាលទី ៥ នៅខេត្តសៀមរាប និងខេត្តព្រះវិហារ បន្ទាប់ពីការតាំងពិព័រណ៍នៅខេត្តបន្ទាយមានជ័យ៕ LA
