.jpg)
កសិករកំពុងបាញ់ទឹកស្រោចបន្លែ ក្នុងកសិដ្ឋានមួយនៃខេត្តកណ្តាល។ ភ្នំពេញប៉ុស្តិ៍
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទនឹងស្វែងរកហិរញ្ញប្បទានប្រហែល ៨០ លានអឺរ៉ូ (៩៥ លានដុល្លារ) ពីទីភ្នាក់ងារបារាំងសម្រាប់អភិវឌ្ឍន៍ (AFD) សម្រាប់គម្រោងចំនួន ២ ដើម្បីជំរុញខ្សែច្រវាក់តម្លៃផលិតកម្មកសិកម្មនៅកម្ពុជា។
ការបង្ហាញពីផែនការនេះបានធ្វើឡើងក្នុងជំនួបរវាងលោក វេង សាខុន ក្រសួងកសិកម្ម រុក្ខាប្រមាញ់ និងនេសាទជាមួយនឹងលោកស្រី Ophelie Bourhis នាយិកា AFD កាលពីថ្ងៃទី ៧ ខែមេសា នៅទីស្តីការក្រសួង។
លោក សាខុន ឱ្យដឹងថា គម្រោងទាំង ២ នេះ AFD កំពុងវាយតម្លៃដោយរំពឹងថា ហិរញ្ញប្បទាននេះនឹងទទួលបានក្នុងឆ្នាំ ២០២១ នេះ។
លោករដ្ឋមន្ត្រីបានបន្ថែមថា គម្រោងទាំង ២ នេះរួមមានគម្រោងស្តីពី «ការអភិវឌ្ឍបច្ចេកវិទ្យាកសិកម្មដោយពឹងលើទឹកភ្លៀងលើដំណាំកៅស៊ូ ដំណាំសម្រាប់ចំណីសត្វ និងបន្លែ» ដែលមានហិរញ្ញប្បទានចំនួន ៥០ លានអឺរ៉ូ និងគម្រោង ១ ទៀត «ការគ្រប់គ្រងជលផលនៅតំបន់ឆ្នេរ និងសមុទ្រប្រកបដោយនិរន្តរភាព» ដែលមានហិរញ្ញប្បទាន ៣០ លានអឺរ៉ូដែលជាសហហិរញ្ញប្បទានជាមួយធនាគារអភិវឌ្ឍន៍អាស៊ី (ADB)។
លោកថ្លែងថា៖ «យើងសូមឱ្យ AFD ធ្វើការអនុម័តឱ្យបានឆាប់តាមដែលអាចធ្វើបានដើម្បីអនុវត្តឱ្យស្របតាមស្ថានភាពបច្ចុប្បន្ននៃផលិតកម្មសត្វ និងបន្លែ ដែលកំពុងចូលរួមយ៉ាងសកម្មក្នុងការជួយទ្រទ្រង់សេដ្ឋកិច្ចគ្រួសារ ឱកាសការងារ និងសន្តិសុខស្បៀង»។
លោកស្រី Ophelie Bourhis នាយិកា AFD បានរាយការណ៍ពីការវិវឌ្ឍបឋមនៃគម្រោងទាំង ២ ខាងលើថា AFD បាននិងកំពុងដំណើរការទៅដោយរលូនគួរឱ្យកត់សម្គាល់។
លោកស្រីបានអះអាងថា៖ «១ គម្រោងនឹងអនុវត្តក្នុងឆ្នាំនេះ និង ១ ទៀតកំពុងពិនិត្យ និងវាយតម្លៃដែលអាចនឹងអនុម័តក្នុងឆ្នាំនេះដែរ ដោយយើងសង្ឃឹមថា គម្រោងទាំង ២ នឹងរួមចំណែកធ្វើឱ្យខ្សែចង្វាក់តម្លៃផលិតកម្មកសិកម្មក៏ដូចជា ផលិតកម្មសត្វ និងបន្លែកាន់តែល្អប្រសើរ និងមានការប្រកួតប្រជែងទាំងបរិមាណ គុណភាព និងសុវត្ថិភាពតាមរយ:ការអនុវត្តបច្ចេកវិទ្យាកសិកម្មទំនើបសមស្របធន់នឹងការប្រែប្រួលអាកាសធាតុ បរិយាប័ន្ន និងនវានុវត្តន៍»។
បើតាមលោក វេង សាខុន ក្នុងរយៈ ៣ ឆ្នាំចុងក្រោយនេះ AFD និងដៃគូអភិវឌ្ឍន៍របស់ខ្លួនបានផ្តល់សហហិរញ្ញប្បទានដល់ក្រសួងកសិកម្មលើគម្រោងចំនួន ៥ ដែលមានទឹកប្រាក់សរុប ១៤១,៥ លានអឺរ៉ូ (រួមទាំងគម្រោងទាំង ២ ខាងលើ)។
លោករដ្ឋមន្ត្រីបន្តថា ក្នុងចំណោមនោះមានគម្រោងចំនួន ៣ ក្រសួងកំពុងអនុវត្ត គឺគម្រោង «ការជំរុញកំណើនវិស័យកសិកម្មនៅកម្ពុជាដោយចីរភាព (CaPFish Aquaculture)» ដោយផ្តល់ហិរញ្ញប្បទាន ២៥ លានអឺរ៉ូដែលជាសហហិរញ្ញប្បទានជាមួយសហភាពអឺរ៉ុប។ គម្រោងនេះផ្តោតទៅលើការធ្វើឱ្យប្រសើរឡើងនូវវិស័យវារីវប្បកម្មប្រកបដោយនិរន្តរភាព ធន់នឹងការប្រែប្រួលអាកាសធាតុ។
ចំណែកគម្រោងទី២ គឺថ្នាក់តំបន់ស្តីពីការអភិវឌ្ឍកសិទេសចរណ៍ និងប្រព័ន្ធសុវត្ថិភាពចំណីអាហារ ដែលមានទឹកប្រាក់សរុប ១១,៥ លានអឺរ៉ូ និងគម្រោងទី ៣ «ខ្សែចង្វាក់តម្លៃផលិតកម្មកសិកម្ម និងការលើកកម្ពស់សុវត្ថិភាពកសិផលដែលបានធ្វើសហការហិរញ្ញប្បទានជាមួយធនាគារអភិវឌ្ឍន៍អាស៊ីក្នុងតម្លៃទឹកប្រាក់ ២៥ លានអឺរ៉ូ។
លោកនិយាយថា៖ «ខ្ញុំសូមវាយតម្លៃខ្ពស់លើលទ្ធផលនៃការអនុវត្តគម្រោងទាំង ៣ ព្រោះវាបាននិងកំពុងចូលរួមចំណែកយ៉ាងសកម្មនៅក្នុងការអភិវឌ្ឍវិស័យជលផលចំទិសដៅ សមស្របតាមសភាពការណ៍មានប្រសិទ្ធភាព និងទទួលបានប្រសិទ្ធផលខ្ពស់ស្របតាមផែនការយុទ្ធសាស្ត្រដែលបានគ្រោងទុក គឺការអភិវឌ្ឍវិស័យជលផលប្រកបដោយចីរភាព និរន្តរភាព បរិយាប័ន្ន និងការប្រែប្រួលអាកាសធាតុ»៕ LA
