ភ្នំពេញៈ ធនាគារជាតិនៃកម្ពុជា (NBC) និងក្រសួងអប់រំ យុវជន និងកីឡា នឹងដាក់បញ្ចូលមេរៀនផ្នែកហិរញ្ញវត្ថុកម្រិតមូលដ្ឋានទៅក្នុងមុខវិជ្ជាសិក្សាចំណេះទូទៅចាប់ពីឆ្នាំសិក្សា ២០១៩ តទៅដើម្បីបញ្ជ្រាបការយល់ដឹងពីវិស័យនេះដល់ប្រជាជនកម្ពុជាតាំងពីវ័យក្មេង។ នេះបើយោងតាមការបញ្ជាក់ពីតំណាង NBC។
លោកស្រី ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជា (NBC) បានឲ្យដឹងថា ក្រុមការងារកំពុងរៀបចំសៀវភៅពុម្ពស្តីពីមេរៀនចំណេះដឹងហិរញ្ញវត្ថុដើម្បីដាក់ឲ្យប្រើប្រាស់នៅក្នុងឆ្នាំសិក្សា ២០១៩ ដើម្បីជំរុញការយល់ដឹងផ្នែកហិរញ្ញវត្ថុនេះឲ្យកាន់តែទូលំទូលាយ និងមានចីរភាព។
លោកស្រីថ្លែងថា៖ «ចាប់ពីឆ្នាំ ២០១៩ ខាងមុខតទៅ កូនសិស្សពីថ្នាក់ទី ១ ដល់ទី ១២ គាត់នឹងអាចយល់ដឹងអំពីផ្នែកហិរញ្ញវត្ថុនេះបានច្បាស់ជាងមុន ដូចជាការគិតគូរអត្រាការប្រាក់ តើកម្ចីជាអ្វី? ការសន្សំលុយជាអ្វីជាដើម?»។
យោងតាមលោកស្រី សិរី NBC និង ក្រសួងអប់រំបានសហការគ្នាបញ្ចប់ការតាក់តែងមេរៀនរួចហើយ។ មេរៀនផ្នែកហិរញ្ញវត្ថុ នេះនឹងមិនមានមុខវិជ្ជាដាច់ដោយឡែកនោះទេ តែនឹងដាក់បញ្ចូលក្នុងមុខវិជ្ជាសិក្សា ដែលមានស្រាប់មួយចំនួនដូចជាមុខវិជ្ជា គណិតវិទ្យា មុខវិទ្យាគេហកិច្ច សិក្សាសង្គម និង បំណិនជីវិតជាដើម។
ក្រសួងអប់រំកម្ពុជាទើបតែបានអនុម័ត និងដំណើរការជាសាធារណៈនូវមេរៀនថ្មីដែលទើបតាក់តែងនេះ។ ជំហានបន្ទាប់គឺការផ្តល់វគ្គបណ្តុះបណ្តាលដល់គ្រូ។
សៀវភៅនេះត្រូវបានអភិវឌ្ឍដោយមានកិច្ចសហការជាមួយ Good Return ដែលជាអង្គការមិនមែនរដ្ឋាភិបាលមានបេសកកម្មលើកកម្ពស់លទ្ធភាពទទួលបានហិរញ្ញវត្ថុ ស្ថាប័ន World Education Cambodia និង ធនាគារអភិវឌ្ឍន៍អាស៊ី (ADB) ជាដើម។
លោក យន់ សុវណ្ណា នាយកប្រតិបត្តិសមាគមគ្រឹះស្ថានមីក្រូហិរញ្ញវត្ថុកម្ពុជា (CMA) បានលើកឡើងថា គំនិតផ្តួចផ្តើមរបស់ NBC ទាក់ទងនឹងការបញ្ជ្រាបចំណេះដឹងហិរញ្ញវត្ថុដល់ប្រជាជនកម្ពុជាតាំងពីវ័យក្មេងគឺជាដំណើរការល្អ ដែលនឹងរួមចំណែកបង្កើនការយល់ដឹងផ្នែកហិរញ្ញវត្ថុដល់សាធារណជនកម្ពុជា។ លោកបន្តថា និរន្តរភាពនៃការអភិវឌ្ឍវិស័យហិរញ្ញវត្ថុកម្ពុជាត្រូវការការចូលរួមពីក្មេងៗ ដូច្នេះការផ្តល់ការអប់រំដល់ពួកគេពីវិស័យនេះគឺជា ការចាំបាច់។
លោកថ្លែងថា៖ «នៅពេលដែលសិស្សានុសិស្សយល់កាន់តែច្បាស់ពីចំណេះដឹងផ្នែកហិរញ្ញវត្ថុ ពួកគេនឹងចែករំលែកអ្វីដែលបានរៀនទៅឪពុកម្តាយ ឬ ចាស់ៗក្នុងគ្រួសារ ដែលវានឹងជួយបង្កើនការយល់ដឹងផ្នែកហិរញ្ញវត្ថុបានមួយកម្រិត»៕