ភ្នំពេញៈ ក្រសួងអភិវឌ្ឍន៍ជនបទគ្រោងថវិកា ១២០ លានដុល្លារដើម្បីកែលម្អផ្លូវចម្ងាយ ១ ២០០ គីឡូម៉ែត្រពីផ្លូវក្រាលក្រួសក្រហមមកជាផ្លូវក្រាលកៅស៊ូក្នុងខេត្តចំនួន ៩ ក្នុងបំណងលើកកម្ពស់ជីវភាពប្រជាពលរដ្ឋតាមជនបទ និងកាត់បន្ថយការចំណាកស្រុក។ នេះបើតាមមន្ត្រីជាន់ខ្ពស់នៃក្រសួងអភិវឌ្ឍជនបទ។
លោក ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទបានប្រាប់ ភ្នំពេញ ប៉ុស្តិ៍ កាលពីម្សិលមិញថា គម្រោងកែលម្អផ្លូវនេះគឺដើម្បីសម្រួលការធ្វើដំណើររបស់ប្រជាពលរដ្ឋនៅតំបន់ជនបទរួមទាំងឲ្យកសិករអាចដឹកជញ្ជូនកសិផលរបស់ខ្លួនមកកាន់ទីផ្សារបានងាយស្រួលជាងមុន។ លោកបញ្ជាក់ថា គម្រោងនេះនឹងត្រូវចាប់ផ្តើមក្នុងឆ្នាំ ២០១៥ ហើយរំពឹងថា នឹងបញ្ចប់នៅ២០១៧។
លោកថ្លែងដូចនេះ កាលពីម្សិលមិញ ក្រោយពេលត្រូវបានសាកសួរដោយ ប្រធានគណៈកម្មការទី៣ នៃរដ្ឋសភាជាតិ ជាគណៈកម្មការដែលតាមដានការអនុវត្តរបស់រដ្ឋាភិបាលលើការងារផែនការ វិនិយោគ បរិស្ថាន កសិកម្ម អភិវឌ្ឍន៍ជនបទអំពីនិងលទ្ធផលនិងទស្សនវិស័យរបស់ក្រសួងពាក់ព័ន្ធការងារអភិវឌ្ឍជនបទ។
លោក សុផារ៉ាថ្លែងក្រោយពីការសាកសួរត្រូវបានបញ្ចប់ដូច្នេះថា៖ «គណៈកម្មការទី ៣ សាកសួរអំពីលទ្ធផលនិងទស្សនវិស័យរបស់ក្រសួងអំពីការអភិវឌ្ឍផ្លូវជនបទថា គិតគូរយ៉ាងណា ដោយលើកឡើងថាធ្វើម៉េចឲ្យកសិករអាចដឹកជញ្ជូនកសិផលដែលខ្លួនផលិតបានទៅទីផ្សារ ហើយកាត់បន្ថយការចំណាកស្រុក»។
លោកបន្តថា៖ «ការធ្វើផ្លូវគឺបានគិតអំពីបញ្ហាសេដ្ឋកិច្ច សង្គម អំពីបញ្ហាប្រជាសាស្រ្ត និងការនាំយកកសិផលដែលកសិករយើងបានផលិតហើយបានទៅដល់ទីផ្សារ បង្កើនតម្លៃរបស់កសិករនិងកាត់បន្ថយឈ្មួញកណ្តាល។ ក្រសួងនឹងធ្វើជាជំហានៗ។ យើងនឹងធ្វើផ្លូវនេះឲ្យក្លាយពីក្រួសក្រហមទៅជាកៅស៊ូបន្ទាប់ពីយើងបានបញ្ចប់នៅក្នុងឆ្នាំ ២០១៤ បាន ៤០០ គីឡូហើយ ២០១៥ ដល់ ២០១៧ នឹងបន្តធ្វើឲ្យបាន ១២០០ គីឡូម៉ែត្រទៀត»។
លោកសុផារ៉ា បានថ្លែងថា គម្រោងកែលម្អផ្លូវក្រាលកៅស៊ូដែលមានប្រវែង ១២០០ គីឡូម៉ែត្រ នឹងតភ្ជាប់តំបន់ជនបទទៅទីប្រជុំជននៅក្នុងខេត្តចំនួន៩របស់កម្ពុជាដែលធ្វើឲ្យវាកាន់តែមានភាពងាយស្រួលសម្រាប់អ្នកភូមិ និងកសិករក្នុងការធ្វើដំណើរ និងដឹកជញ្ជូនទំនិញកសិកម្មរបស់ពួកគេទៅកាន់ទីផ្សារ។
លោកបន្តថា៖ «ផ្លូវនេះនឹងបង្កើនសេដ្ឋកិច្ចសង្គមក្នុងសហគមន៍ និងជួយកាត់បន្ថយការចំណាកស្រុកចេញពីប្រទេសកម្ពុជា»។
គម្រោងកែលម្អផ្លូវក្រាលកៅស៊ូដែលមានប្រវែង ១ ២០០ គីឡូម៉ែត្រនឹងត្រូវធ្វើឡើងនៅក្នុងកម្រិត DBST (2 ជាន់) ហើយចំណែកភាគច្រើនរបស់មូលនិធិសម្រាប់គម្រោងកែលម្អផ្លូវនេះនឹងបានមកពីដៃគូអភិវឌ្ឍន៍បូកនឹងទឹកប្រាក់បដិភាគ ៩ លានពីរដ្ឋាភិបាល។
ខណៈដែលមានការស្វាគមន៍ដល់ដំណឹងនេះ លោក យ៉ង សាំងកុមារ ប្រធានអង្គការកសិកម្មសេដាក (CEDAC) បានថ្លែងថា ក្រសួងគួរតែផ្ដោតលើគុណភាពផ្លូវផងដែរ។
លោកបានលើកឡើងថា៖ «ខណៈដែលមានផ្លូវថ្មីគឺជារឿងដ៏ល្អ វាមានសារៈសំខាន់ដល់ការសម្លឹងមើលគុណភាពរបស់ផ្លូវផងដែរ»។
លោកបន្ថែមថា ការមានផ្លូវថ្នល់កាន់តែល្អប្រសើរពិតណាស់នឹងជួយដល់កសិករឲ្យមានលទ្ធភាពចូលក្នុងទីផ្សារបាន ប៉ុន្តែ ការមានប្រព័ន្ធធារាសាស្ដ្រគ្រប់គ្រាន់នៅនឹងកន្លែងគឺមានសារៈសំខាន់សម្រាប់កសិករដើម្បីកែលម្អកម្រិតជីវភាពរស់នៅរបស់ខ្លួន។
កាលពីម្សិលមិញលោកស្រី ចន្ធី អ្នកវិភាគសេដ្ឋកិច្ចឯករាជ្យបានស្វាគមន៍ដល់ការអភិវឌ្ឍសាធារណៈនេះដោយលើកឡើងថា ផ្លូវថ្នល់នេះនឹងធន់ជាមួយនឹងការប្រែប្រួលអាកាសធាតុ ហើយនឹងជួយដល់កសិករសមាហរណកម្មជាមួយទីផ្សារសម្រាប់ផលិតផលកសិកម្មរបស់ពួកគេ។
លោកបន្តថា៖ «វាជាការវិនិយោគដ៏ល្អមួយរបស់រដ្ឋាភិបាល។ ខេត្តនៅជុំវិញបឹងទន្លេសាបមានសក្ដានុពល សេដ្ឋកិច្ច ហើយដង់ស៊ីតេប្រជាជនមានកម្រិតខ្ពស់ ហើយតំបន់នេះងាយទទួលរងគ្រោះចំពោះការប្រែប្រួលអាកាសធាតុ ដូច្នេះ ការកែលម្អផ្លូវថ្នល់ពីក្រួសក្រហមមកជាក្រាលកៅស៊ូនឹងធ្វើឲ្យការវិនិយោគកាន់តែមានស្ថិរភាព និងធន់នឹងការខូចខាតដោយសារទឹកជំនន់»៕PB
