.jpg)
ភ្នំពេញៈ ក្រសួងពាណិជ្ជកម្មអំពាវនាវឲ្យក្រុមហ៊ុនផលិត និងក្រុមវិនិយោគិនក្នុងស្រុក និងបរទេសចូលរួមនៅក្នុង «ពិព័រណ៍ផលិតផលខ្មែរ និងទំនិញនាំចេញ នាំចូលអន្តរជាតិលើកទី ១៥» នៅពេលខាងមុខសំដៅលើកកម្ពស់សកម្មភាពសេដ្ឋកិច្ច ដែលរងផលប៉ះពាល់យ៉ាងខ្លាំងដោយសារតែការរីករាលដាលជំងឺកូវីដ ១៩។
សេចក្ដីប្រកាសបានពីក្រសួង ពាណិជ្ជកម្មដែលភ្នំពេញប៉ុស្ដិ៍ទទួលបានកាលពីថ្ងៃពុធបានឲ្យដឹងថា ពិព័រណ៍ផលិតផលខ្មែរ និងទំនិញនាំចេញ នាំចូលអន្តរជាតិលើកទី ១៥ នឹងត្រូវរៀបចំឡើងចាប់ពីថ្ងៃទី ១៥ ដល់ថ្ងៃទី ១៨ ខែ ធ្នូ ឆ្នាំ ២០២០ នៅមជ្ឈមណ្ឌលតាំងពិព័រណ៍ និងសន្និបាតកោះពេជ្រ រាជធានីភ្នំពេញ។
មន្ដ្រីមួយរូបនៃក្រសួងពាណិជ្ជកម្មដែលបានស្នើសុំមិនបញ្ចេញឈ្មោះបានប្រាប់ភ្នំពេញប៉ុស្ដិ៍ថា ការតាំងពិព័រណ៍នេះនឹងកែលម្អសកម្មភាពពាណិជ្ជកម្ម អាជីវកម្ម និងការវិនិយោគដែលបានថមថយល្បឿន ដោយសារតែផលប៉ះពាល់របស់វីរុសកូរ៉ូណា។
ប្រភពនោះបានថ្លែងថា៖ «ពិតហើយ សកម្មភាពអាជីវកម្ម និងសេដ្ឋកិច្ចរបស់យើង បានថមថយល្បឿន ហើយយើងទទួលបានការត្អូញត្អែរច្រើនពីក្រុមហ៊ុនផលិតក្នុងស្រុករបស់យើង ដោយសារពួកគេមិនអាចលក់ផលិតផលរបស់ពួកគេ ដូច្នេះពិព័រណ៍នេះនឹងជាវេទិកាដ៏សំខាន់សម្រាប់ពួកគេ»។
តាមសេចក្តីប្រកាស ក្រុមហ៊ុនដែលមានបំណងចូលរួមត្រូវចុះឈ្មោះឲ្យបានមុនថ្ងៃទី ១៥ ខែ វិច្ឆិកា ឆ្នាំ ២០២០ ជាកំណត់៕LA
