The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​គ្រោង​ស្នើ​ឲ្យ​បញ្ឈប់​នាំ​ចូល​រថយន្ត​ជជុះ

ក្រសួង​គ្រោង​ស្នើ​ឲ្យ​បញ្ឈប់​នាំ​ចូល​រថយន្ត​ជជុះ

ក្រសួង​គ្រោង​ស្នើ​ឲ្យ​បញ្ឈប់​នាំ​ចូល​រថយន្ត​ជជុះ

20140423_11
រថយន្តជជុះដែលនាំចូល និងដាក់លក់តាមឃ្លាំងនៅរាជធានីភ្នំពេញ ហេង ជីវ័ន

ភ្នំពេញៈ រដ្ឋ​មន្រ្តី​ក្រសួង​ឧស្សាហកម្ម និង​សិប្បកម្ម​គ្រោង​ស្នើ​ទៅ​រដ្ឋាភិបាល​លើ​ការ​ហាម​ឃាត់​នាំ​ចូល​រថយន្ត​ជជុះ​មក ប្រទេស​កម្ពុជា ក្នុង​បំណង​កាត់​បន្ថយ​ការ​បំពុល​បរិស្ថាន។

លោក ចម ប្រសិទ្ធ ថ្លែង​ថា គ្រប់​ប្រទេស​ទាំង​អស់​ត្រូវ​ចូល​រួម​កាត់​បន្ថយ​ការ​បញ្ចេញ​ឧស្ម័ន​ផ្ទះ​កញ្ចក់​ដែល​ធ្វើ​ឲ្យ​ស្រទាប់​អូហ្សូន​កាន់​តែ​ស្តើង​ទៅ ហើយ​កម្ពុជា កំពុង​ចាប់​ផ្តើម​កាត់​បន្ថយ​បណ្តើរៗ​នូវ​ការ​នាំ​ចូល​ឧស្ម័ន​ដែល​ប៉ះពាល់​ដល់​បរិស្ថាន។

លោក​ថ្លែង​ថា៖ «ឥឡូវ​រថយន្ត​ដែល​កំពុង​ដំណើរការ​នៅ​លើ​ផ្លូវ​របស់​យើង ក៏​មាន​ប្រើ​ឧស្ម័ន​មួយ​ចំនួន​ដែល​ប៉ះពាល់​ដល់​បរិស្ថាន​ដែរ។ រថយន្ត​ស៊េរី​ថ្មី គឺ​លែង​ប៉ះពាល់​ច្រើន​ហើយ ប៉ុន្តែ​រថយន្ត​ជជុះ​ដែល​នៅ​សេសសល់​និង​នៅ​តែ​ប្រើ​ប្រាស់​វា​នៅ​តែ​ហូរ​ចូល​មក​ស្រុក​ខ្មែរ​យើង​ហើយ​នៅ​តែ​ប្រើ​ឧស្ម័ន​ដែល​ប៉ះពាល់​ដល់​បរិស្ថាន​អញ្ចឹង​វិធានការ​របស់​យើង​គឺ​ស្នើ​សុំ​ទៅ​រដ្ឋាភិបាល​ពិចារណា​រាំង​ខ្ទប់​រថយន្ត​ជជុះ​ដែល​មាន​អាយុ​លើស ១០ ឆ្នាំ​ឡើង​ទៅ​គឺ​ឈប់​ឲ្យ​ចូល កម្ពុជា»។

លោក​បន្ត​ថា៖ «វិធានការ​ដែល​យើង​ធ្វើ​ពី​ឥឡូវ​ដើម្បី​ទប់​រថយន្ត​ដែល​ចាស់ៗ​ពេក​ដែល​ប្រើ​ឧស្ម័ន​ប៉ះពាល់​បរិស្ថាន»។

លោក សេង វឹង នាយក​គ្រប់​គ្រង​ផ្នែក​រថយន្ត Ford របស់​ក្រុមហ៊ុន RMA ស្វាគមន៍​ចំពោះ​វិធានការ​នេះ ដោយ​លើក​ឡើង​ថា រដ្ឋាភិបាល​គួរ​តែ​យក​ចិត្ត​ទុក​ដាក់​ចំពោះ​បញ្ហា​នេះ​ដើម្បី​កាត់​បន្ថយ​ការ​កក​ស្ទះ និង​គ្រោះថ្នាក់​ចរាចរណ៍​ការ​បញ្ចេញ​ឧស្ម័ន​បំពុល​បរិស្ថាន​ហើយ​ក៏ នឹង​ធ្វើ​ឲ្យ​ទីផ្សារ​រថយន្ត​ថ្មី​កើន​ផង​ដែរ។

លោក​ថ្លែង​ថា៖ «វា​ជា​ការ​ល្អ​ព្រោះ​នៅ​ប្រទេស​គេ​បាន​ធ្វើ​រួច​ហើយ​ដើម្បី​កុំ​ឲ្យ​មាន​ការ​បំពុល​បរិស្ថាន។ បើ​តាម​តួលេខ​ឡាន​រាប់​ម៉ឺន​គ្រឿង​សុទ្ធ​តែ​ជា​ឡាន​ជជុះ​ត្រូវ​បាន​នាំ​ចូល​មក កម្ពុជា។ គេ​ច្រើន​តែ​ថា កម្ពុជា ជា​កន្លែង​ចាក់​សំរាម​ដោយ​សារ​យើង​មិន​មាន​ការ​កំណត់​ការ​នាំ​ចូល។ ឡាន​ជជុះ​ដែល​រត់​លើ​ផ្លូវ​បច្ចុប្បន្ន​ខ្លះ​មិន​មាន​លក្ខណៈ​សម្បត្តិ​គ្រប់​គ្រាន់​ដែល​ងាយ​បង្ក​គ្រោះថ្នាក់​ចរាចរណ៍»។

លោក​បន្ថែម​ថា ការ​បិទ​ការ​នាំ​ចូល​រថយន្ត​ចាស់ៗ​នេះ នឹង​អាច​ទាក់​ទាញ​ឲ្យ​ក្រុមហ៊ុន​ផលិត​រថយន្ត​មក​ផលិត​នៅ កម្ពុជា ផ្ទាល់​តែ​ម្តង។ បើ​តាម​ការ​ឲ្យ​ដឹង​របស់​លោក សេង វឹង បច្ចុប្បន្ន​នេះ រថយន្ត​ជជុះ​គ្រប​ដណ្តប់ ៩០ ភាគរយ​នៃ​ទីផ្សារ​រថយន្ត​នៅ កម្ពុជា ខណៈ​ទីផ្សារ​រថយន្ត​ថ្មី​មាន​ត្រឹម​តែ ១០ ភាគរយ​ប៉ុណ្ណោះ។

អ្នក​ជំនួញ​រថយន្ត​ជជុះ​ម្នាក់​ដែល​សុំ​មិន​បញ្ចេញ​ឈ្មោះ​ប្រាប់​ឲ្យ ភ្នំពេញ ប៉ុស្តិ៍ ដឹង​ថា លោក​រីករាយ​នឹង​គោរព​តាម​វិធានការ​ហាម​ឃាត់​ការ​នាំ​ចូល​រថយន្ត​ចាស់ៗ​នេះ តែ​បាន​ស្នើ​ឲ្យ​រដ្ឋាភិបាល​បញ្ចុះ​តម្លៃ​ពន្ធ​លើ​ការ​នាំ​ចូល​ដើម្បី​សម្រួល​ដល់​អ្នក​ប្រើ​ប្រាស់។

លោក​ថ្លែង​ថា៖ «បើ​ដាក់​វិធានការ​ក៏​ដាក់​ចុះ តែ​ខ្ញុំ​ស្នើ​ឲ្យ​រដ្ឋាភិបាល​ចុះ​ថ្លៃ​ពន្ធ​នាំ​ចូល​បន្តិច​ផង ដើម្បី​ឲ្យ​អ្នក​ប្រើ​ប្រាស់​មាន​លទ្ធភាព​ប្រើ​រថយន្ត​ស៊េរី​ថ្មីៗ​ផង»។

លោក​ក៏​បាន​បញ្ជាក់​ដែរ​ថា សព្វ​ថ្ងៃ​លោក​បាន​នាំ​ចូល​រថយន្ត​ចាប់​ត្រឹម​ពី​ស៊េរី ឆ្នាំ​២០០០ ឡើង​ទៅ។

លោក កង ច័ន្ទតារារ័ត្ន ប្រធាន​វិទ្យាស្ថាន​សិក្សា​ការ​អភិវឌ្ឍន៍​កម្ពុជា មាន​ប្រសាសន៍​ថា ការ​លើក​ឡើង​ពី​វិធានការ​នេះ ដូច​ជា​ឆាប់​ពេក​សម្រាប់ កម្ពុជា ខណៈ​ជីវភាព​ប្រជាជន​នៅ​មាន​កម្រិត​នៅ​ឡើយ។

លោក​បន្ត​ថា គ្រឿង​ម៉ាស៊ីន និង​រថយន្ត​ចាស់ៗ​បាន​និង​កំពុង​ជំរុញ​សេដ្ឋកិច្ច​កម្ពុជា​តាម​រយៈ​វិស័យ​កសិកម្ម និង​សេវា​ដឹក​ជញ្ជូន។

លោក​ថ្លែង​ថា៖ «ពេល​នេះ​យើង​ឃើញ​ថា ទំនិញ​វា​ហូរ​ច្រើន​ហើយ​ការ​ធ្វើ​ដំណើរ​មាន​ឱកាស​ច្រើន​ជាង​មុន។ បើ​ទោះ​ជា​ឡាន​ចាស់​ក៏​ដោយ។ បើ​យើង​ត្រូវ​ប្រើ​ម៉ាស៊ីន​ឆ្នាំ​ថ្មីៗ ខ្ញុំ​ជឿ​ថា វា​ត្រូវ​ការ​ចំណាយ​ច្រើន។ វា​ប៉ះពាល់​ដល់​អ្នក​ដែល​ប្រើ​ឡាន​ចាស់​ដើម្បី​ដឹក​ជញ្ជូន ទាំង​មនុស្ស ទំនិញ ផ្សេងៗ ប្រសិន​បើ​ហាម​ឃាត់​អ៊ីចឹង​វា​ធ្វើ​ឲ្យ​តម្លៃ​ដើម​ក៏​ឡើង​ខ្ពស់​សេវាកម្ម​ដឹក​ជញ្ជូន​ឡើង​ខ្ពស់។

លោក​បាន​បន្ត​ថា៖ «ក្នុង​ស្ថានភាព​ជីវភាព​ប្រជាជន​ដូច​ជា​ឆាប់​ពេក​ហើយ ព្រោះ​មិន​ថា តែ​រថយន្ត​ទេ សូម្បី​តែ​ម៉ាស៊ីន​ចាស់​ក៏​យើង​យក​មក​ប្រើ​ពី​គេ​ដែរ​វា​ថោក ហើយ​ក៏​វា​អាច​ប្រើ​ប្រាស់​តាម​ជីវភាព​របស់​ប្រជាជន​នៅ​ក្នុង​វិស័យ​កសិកម្ម​ជាដើម»។

ស្ថិតិ​ពី​នាយកដ្ឋាន​ដឹក​ជញ្ជូន​នៃ​ក្រសួង សាធារណការ និង​ដឹក​ជញ្ជូន​បង្ហាញ​ថា ចាប់​ពី ឆ្នាំ​១៩៩០ ដល់ ឆ្នាំ​២០១៣ មាន​យានយន្ត​ជាង ២ លាន​គ្រឿង​បាន​ចុះ​បញ្ជី​នៅ កម្ពុជា៕

អត្ថបទគួរចាប់អារម្មណ៍