The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ចេញ​ផ្សាយ​ក្រមសីលធម៌​អង្ករ

ក្រសួង​ចេញ​ផ្សាយ​ក្រមសីលធម៌​អង្ករ

ក្រសួង​ចេញ​ផ្សាយ​ក្រមសីលធម៌​អង្ករ

20140217_12
កម្មករកំពុងលីអង្ករដែលកែច្នៃរួចនៅរោងចក្រកែច្នៃអង្កររបស់ក្រុមហ៊ុន ខ្មែរហ្វូត ហេង ជីវ័ន

ភ្នំពេញោះក្រសួង​ពាណិជ្ជកម្ម​សហការ​ជាមួយ​សហគមន៍​អ្នក​នាំ​ចេញ​អង្ករ​កម្ពុជា​បាន​ចេញ​ផ្សាយ​ជា​ផ្លូវការ​នូវ «ក្រម​សីលធម៌​» សម្រាប់​ឧស្សាហកម្ម​ស្រូវ អង្ករ​នៅ​ថ្ងៃ​នេះ ជា​ការ​ឆ្លើយតប​ចំពោះ​ការ​ព្រួយបារម្ភ​របស់​សហភាព​អឺរ៉ុប​ដែល​បាន​លើក ឡើង​កាលពី​ខែ​ធ្នូ​ឆ្នាំ​២០១៣ ថា អង្ករ​កម្ពុជា​ដែល​នាំ​ចេញ​ទៅ​កាន់​ទីផ្សារ​អឺរ៉ុប​មាន​លាយ​ជាមួយ​អង្ករ ពី​ប្រទេស​វៀតណាម។ នេះ​បើ​តាម​សេចក្តី​ប្រកាស​ព័ត៌មាន​ដែល​ភ្នំពេញ​ប៉ុស្តិ៍​ទទួល​បាន​កាលពី ម្សិលមិញ​។

សហភាព​អឺរ៉ុប​គឺជា​ទីផ្សារ​អង្ករ​ធំ​មួយ​របស់​កម្ពុជា។ ការ​ផ្តួចផ្តើម​បង្កើត «​ក្រមសីលធម៌​» នេះ​ធ្វើ​ឡើង​បន្ទាប់ពី​មាន​ក្តីបារម្ភ​ថា កម្ពុជា​អាច​បាត់បង់​ការ​ទទួល​បាន​ការ​អនុគ្រោះ​«អ្វីៗ​ទាំងអស់​លើកលែង តែ​សព្វាវុធ​(EBA)​» ចូល​ក្នុង​ទីផ្សារ​ធំ​ជាង​គេ​បំផុត​របស់​ខ្លួន​មួយ​នេះ។

កិច្ចព្រមព្រៀង EBA ជាមួយ EU អនុញ្ញាត​ឲ្យ​កម្ពុជា​មាន​ប្រៀប​ជាង​បណ្តា​ប្រទេស​ជិត​ខាង​ដូចជា វៀតណាម និង​ថៃ​ក្នុង​ការ​នាំ​ចេញ​អង្ករ​ទៅ​កាន់​ប្រទេស​នៅ​អឺរ៉ុប ដោយ​មិន​គិត​ពី​កូតា និង​ពន្ធ​នាំ​ចូល​។ ការ​នាំ​អង្ករ​ចេញ​ពី​កម្ពុជា​ដែល​អង្ករ​នោះ​មិន​មាន​ប្រភព​មកពី​ប្រទេស​កម្ពុជា គឺជា​ការ​ល្មើស​នឹង​កិច្ចព្រមព្រៀង​នេះ​។

សេចក្តី ប្រកាស​ពត៌មាន​សរសេរ​ថា ក្រមសីលធម៌​នេះ មាន​គោលបំណង​ធានា​ដល់​ការ​ប្រតិបត្តិ​ខ្ជាប់ខ្ជួន​របស់​អ្នក​នាំ ចេញ​អង្ករ​កម្ពុជា​ទាំងអស់​ទាក់ទង​នឹង «ប្រភព​ដើម» នៃ​អង្ករ​នាំ​ចេញ​ពី​កម្ពុជា និង​ធានា​ដល់​ការ​ប្តេជ្ញារ​បស់​សហគមន៍​អ្នក​នាំ​ចេញ​អង្ករ​កម្ពុជា ក្នុង​កិច្ចការពារ​ភាព​អនុគ្រោះ​ពាណិជ្ជកម្ម​ស្ថិត​ក្នុង​ក្របខណ្ឌ EBA។

លោក គឹម សាវុធ ប្រធាន​សហព័ន្ធ​អ្នក​នាំ​ចេញ​អង្ករ​កម្ពុជា និង​ជា​សហហត្ថលេខី​ក្នុង​ក្រមសីលធម៌​នេះ​ឲ្យ​ដឹង​ថា នេះ​ជា​ការ​ឆ្លើយតប​ចំពោះ​ការ​ចោទប្រកាន់​របស់ EU មក​លើ​អ្នក​នាំ​ចេញ​អង្ករ​កម្ពុជា​លាយ​ជាមួយ​អង្ករ​វៀតណាម។ លោក​ថ្លែង​ថា​៖ «​ការ​ចុះ​ហត្ថលេខា​លើ​ក្រមសីលធម៌​នេះ យើង​បង្ហាញ​ឲ្យ​សហភាព​អឺរ៉ុប​ឃើញ​ថា យើង​ស្មោះត្រង់ យើង​ថ្លៃថ្នូរ យើង​មិន​បន្លំ​ទេ​។ យើង​ពិតជា​លក់​ទំនិញ​របស់​កម្ពុជា​»។

លោក​បន្ថែម ថា ក្រមសីលធម៌​នេះ​នឹង​ជួយ​ដល់​កេរ្តិ៍ឈ្មោះ​អង្ករ​របស់​កម្ពុជា កេរ្តិ៍ឈ្មោះ​អ្នក​នាំ​ចេញ​អង្ករ​កម្ពុជា និង​ដល់​កេរ្តិ៍ឈ្មោះ​របស់​ប្រទេស​កម្ពុជា​។

លោក កាន់ គន្ធី នាយកប្រតិបត្តិ​ក្រុមហ៊ុន Battambang Rice Investment ក៏​បាន​គាំទ្រ​ចំពោះ​ការ​ផ្តួចផ្តើម​នៃ «ក្រមសីលធម៌​» នេះ​ដែរ​។

លោក​ថ្លែង​ថា​៖ «​នេះ​គឺជា​ការ​បង្ហាញ​ពី​ឆន្ទៈ​របស់​កម្ពុជា​ថា កម្ពុជា​មិន​លក់​អង្ករ​វៀតណាម​ទេ។ នេះ​គឺ ដើម្បី​បញ្ជាក់​ថា យើង​មាន​ឆន្ទៈ ដោយសារ​ក្នុង​ក្រមសីលធម៌​នេះ មាន​ដំណើរការ​ច្បាស់លាស់​ណាស់ ថា បើ​ជា​គេ​រក​ឃើញ​ថា យើង​នាំ​អង្ករ​វៀតណាម​ទៅ ត្រូវ​មាន​ដំណើរការ​ស៊ើបអង្កេត និង​ការ​ដាក់​ទោសទណ្ឌ​»។

ក្រុម​ឈ្មួញ​កណ្តាល អ្នក​ប្រមូល​ទិញ​អង្ករ ម្ចាស់​រោងម៉ាស៊ីន​កិនស្រូវ និង​អ្នក​នាំ​ចេញ​ត្រូវ​បាន​លើក​ទឹកចិត្ត​ឲ្យ​ចុះ​ហត្ថលេខា​លើ​ក្រមសីលធម៌​នេះ​។ ក្រុមហ៊ុន​នាំ​អង្ករ​ចេញ​ដែល​ស្នើសុំ​វិញ្ញាបនបត្រ​បញ្ជាក់​ប្រភព​ដើម ពី​ក្រសួង​ពាណិជ្ជកម្ម​នឹង​ត្រូវ​តម្រូវ​ឲ្យ​បង្ហាញ​ភ័ស្ដុតាង តាមរយៈ​វិក្កយបត្រ និង​បង្កាន់​ដៃ​ទទួល​ប្រាក់​ថា អង្ករ​នោះ​មាន​ប្រភព​នៅ​កម្ពុជា។

គណៈកម្មាធិការ​សនវកម្ម​រួមមាន តំណាង​មកពី​ឧស្សាហកម្ម​ទាំង​ពីរ និង​អង្គការ​មិនមែន​ឧស្សាហកម្ម​នេះ ត្រូវ​មាន​ភារកិច្ច​ស៊ើបអង្កេត​លើ​បណ្តឹង​នៃ​ករណី​ក្លែងបន្លំ ដែល​លើក​ឡើង​ដោយ​គយ​របស់​សហភាព​អឺរ៉ុប​។

ការ​ផាក​ពិន័យ​អាច​មាន លក្ខណៈ​ធ្ងន់ធ្ងរ ដូចជា​ការ​ផ្អាក​ជា​អចិន្ត្រៃយ៍​ចំពោះ​ក្រុមហ៊ុន​នាំ​ចេញ​អង្ករ​ក្នុង​ការ​ទទួល​បាន​វិញ្ញាបនបត្រ បញ្ជាក់ពី​ប្រភព​ដើម និង​សិទ្ធិ​នាំ​អង្ករ​ចូល​ទៅ​ទីផ្សារ​អឺរ៉ុប​។

ទិន្នន័យ​ពី​ក្រសួង​កសិកម្ម​បង្ហាញ​ថា កម្ពុជា​បាន​នាំ​ចេញ​អង្ករ​ជិត​៣៨០ ០០០​តោន​កាលពី​ឆ្នាំ​២០១៣ ជា​តួលេខ​ដែល​កើន ៨៥​ភាគរយ​ធៀប​នឹង​ឆ្នាំ​២០១២។

ការ​នាំ​ចេញ​ទៅ​សហភាព​អឺរ៉ុប មាន​ចំនួន​ប្រមាណ​៦០​ភាគរយ​នៃ​ការ​នាំ​ចេញ​អង្ករ​សរុប ដោយ​មាន​ប្រទេស​បារាំង ប៉ូឡូញ និង​ហូឡង់ ស្ថិត​នៅក្នុង​ចំណោម​ប្រទេស​ជា​ទិសដៅ​ដែល​មាន​ការ​នាំ​ចេញ​ខ្ពស់ បំផុត៕PB

អត្ថបទគួរចាប់អារម្មណ៍