The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​នឹង​ដាក់​ចេញ​សៀវភៅ​អធិការកិច្ច




ក្រសួង​នឹង​ដាក់​ចេញ​សៀវភៅ​អធិការកិច្ច

បុគ្គលិក​កំពុង​ធ្វើ​ការ​នៅ​ក្នុង​សហគ្រាស​ផលិត​នំ​មួយ​នៅ​រាជធានី​ភ្នំពេញ​នា​ពេល​កន្លង​មក។
បុគ្គលិក​កំពុង​ធ្វើ​ការ​នៅ​ក្នុង​សហគ្រាស​ផលិត​នំ​មួយ​នៅ​រាជធានី​ភ្នំពេញ​នា​ពេល​កន្លង​មក។ ម៉ៃ វីរៈ

ក្រសួង​នឹង​ដាក់​ចេញ​សៀវភៅ​អធិការកិច្ច

ភ្នំពេញៈ ក្រសួង​ឧស្សាហកម្ម និង​សិប្បកម្ម​គ្រោង​ចេញ​សៀវភៅ​អធិការ​កិច្ច​ខណៈ​មាន​ការ​លើក​ឡើង​របស់​វិស័យ​ឯកជន​ពី​ការ​ធ្វើ​អធិការកិច្ច​ជាន់​គ្នា និង​ការ​ចំណាយ​ក្រៅ​ផ្លូវ​ការ​ទៅ​លើ​អាជ្ញាធរ​មាន​សមត្ថកិច្ច។

លោក ចម ប្រសិទ្ធ រដ្ឋ​មន្ត្រី​ក្រសួង​ឧស្សាហកម្ម និង​សិប្បកម្ម បាន​លើក​ឡើង​ថា ក្រុម​ការងារ​របស់​ក្រសួង​កំពុង​រៀប​ចំ​សៀវភៅ​អធិការកិច្ច​សម្រាប់​សហគ្រាស​ធុន​តូច និង​មធ្យម ដើម្បី​ពង្រឹង​ការ​យល់​ដឹង​របស់ SME ក្នុង​ស្រុក​ពាក់ព័ន្ធ​ច្បាប់ និង​ការ​ចុះ​ធ្វើ​អធិការ​កិច្ច​នានា​របស់​មន្រ្តី​ពាក់​ព័ន្ធ។

លោក​ថ្លែង​ថា៖ «យើង​កំពុង​តែ​ដក​ពិសោធន៍​ពី​រឿង​ដែល​ធ្វើ​អធិការកិច្ច​របស់ SME។ យើង​ចុះ​ទៅ​ដើម្បី​ត្រួត​ពិនិត្យ​ការ​ខ្វះ​ខាត​របស់​គាត់​យ៉ាង​ម៉េច ហើយ​និង​ចំណុច​ខ្លាំង​គាត់​យ៉ាង​ម៉េច ហើយ​យើង​នឹង​រៀបចំ​សៀវភៅ​មួយ​ស្តី​ពី​ការ​ធ្វើ​អធិការកិច្ច SME ហើយ​គាត់​ក៏​ត្រូវ​ដឹង​ខ្លួន​ឯង​ថា​គេ​ចុះ​ទៅ​គេ​នឹង​ពិនិត្យ​អី ចាប់​តាំង​ពី​ការ​ដំណើរ​ការ​ដំបូង​របស់​គាត់​មាន​អាជ្ញាប័ណ្ណ​ហើយ​ឬ​នៅ ឧទាហរណ៍ អគារ​សាង​សង់​មាន​ការ​អនុញ្ញាត​ដែរ​ឬ​អត់?»។

ការ​លើក​ឡើង​នេះ​ត្រូវ​បាន​ធ្វើ​ឡើង​ក្នុង​ជំនួប​វេទិកា​រវាង​ក្រសួង​ឧស្សាហកម្ម និង​សិប្បកម្ម និង​វិស័យ​ឯកជន​កាល​ពី​ម្សិល​មិញ។

សៀវភៅ​អធិការកិច្ច​នេះ​នឹង​ជា​បណ្តុំ​ព័ត៌មាន​អំពី​ច្បាប់​ពាក់ព័ន្ធ​នឹង​ដំណើរ​ការ​នៃ​ផលិត​កម្ម​របស់​សហគ្រាស​ធុន​តូច​និង​មធ្យម ដែល​នឹង​ជួយ​ឲ្យ SME អាច​ត្រួត​ពិនិត្យ​ដោយ​ខ្លួន​ឯង​អំពី​ចំណុច​ខ្វះ​ខាត​ទាំង​ឡាយ​ហើយ​ក៏​នឹង​ផ្តល់​ព័ត៌មាន​អំពី​តួនាទី​នៃ​អ្នក​ចុះ​ទៅ​ធ្វើ​អធិការកិច្ច​ផង​ដែរ។ នេះ​បើ​តាម​ប្រសាសន៍​របស់​លោក ចម ប្រសិទ្ធ។

សៀវភៅ​អធិការ​កិច្ច​នេះ​នឹង​ត្រូវ​បញ្ចប់​នៅ​ក្នុង​រយៈ​ពេល ២ ខែ​ខាង​មុខ ហើយ​នឹង​ត្រូវ​បង្ហោះ​លើ​គេហទំព័រ​របស់​ក្រសួង​ឧស្សាហកម្ម និង​សិប្បកម្ម​សម្រាប់​សិប្បករ និង​សហគ្រិន​ទាញ​យក​ទៅ​ប្រើ​ប្រាស់។

អ្នក​ស្រី អន ស៊ីដាណា ថ្លែង​ក្នុង​នាម​អ្នក​តំណាង SME ដូច្នេះ​ថា អ្នក​ស្រី​បាន​ប្រទះ​នឹង​បញ្ហា​ការ​ធ្វើ​អធិការ​កិច្ច​ហួស​ដែន​សមត្ថកិច្ច​នេះ​ជា​ច្រើន​ឆ្នាំ​មក​ហើយ ហើយ​អ្នក​ស្រី​មិន​មាន​មូលដ្ឋាន​ក្នុង​ការ​ជជែក​ជា​មួយ​មន្រ្តី​ដែល​ចុះ​មក​ធ្វើ​អធិការកិច្ច​នោះ​ទេ ដោយ​សារ​តែ​កង្វះ​ព័ត៌មាន។

អ្នក​ស្រី​បន្ត​ថា៖ «អ្នក​ត្រួត​ពិនិត្យ​មួយ​ចំនួន​ថែម​ទាំង​ស្នើ​ឲ្យ​ខ្ញុំ​បង់​ប្រាក់​ឲ្យ​គេ​ប្រចាំ​ខែ​ទៀត​ផង។ ពួក​គេ​មក​ទារ សើរើ​ឯកសារ​នេះ ឯកសារ​នោះ​ដែល​ពេល​ខ្លះ​មិន​ស្ថិត​នៅ​ក្នុង​ដែន​សមត្ថកិច្ច​របស់​គាត់​ក៏​មាន។

គ្រាន់​តែ​រើ​ឯកសារ​ឲ្យ​គាត់​ខ្ញុំ​ត្រូវ​ខាត​ពេល​មួយ​ព្រឹក​ដែរ»។

អ្នក​ស្រី​បន្ត​ថា៖ «ពេល​គាត់​មក ខ្ញុំ​ចេះ​តែ​ឲ្យ​ស្រោម​សំបុត្រ​ទៅ​កុំ​ឲ្យ​មាន​បញ្ហា។ ខ្ញុំ​មិន​ចង់​ខាត​ពេល​ហើយ​ខ្ញុំ​មិន​អាច​ដឹង​ថា តើ​អ្វី​នឹង​កើត​ឡើង​ចំពោះ​អាជីវកម្ម​របស់​ខ្ញុំ​ទេ​បើ​ខ្ញុំ​មិន​ហុច​ស្រោម​សំបុត្រ​នោះ»។

លោក តែ តាំងប៉ ប្រធាន​សហព័ន្ធ​សមាគម​សហគ្រាស​ធុន​តូច និង​មធ្យម​កម្ពុជា ថ្លែង​ថា លោក​រីករាយ​ដែល​បាន ឮ​អំពី​ការ​ដាក់​ចេញ​សៀវភៅ​អធិការ​កិច្ច​នេះ។ លោក​បាន​បន្ត​ថា៖ «វា​សន្សំ​ពេល​វេលា​សម្រាប់​អាជ្ញាធរ និង​វិស័យ​ឯកជន។ វា​នឹង​កាត់​បន្ថយ​អំពើ​ពុក​រលួយ​ផង​ដែរ»។

លោក សុន ឆ័យ តំណាង​រាស្ត្រ​មក​ពី​គណបក្ស​ប្រឆាំង បាន​ចោទ​សួរ​ពី​ប្រសិទ្ធ​ភាព​សៀវភៅ​អធិការ​កិច្ច​នេះ ខណៈ មិន​មាន​ស្ថាប័ន​ត្រួត​ពិនិត្យ​ណា​មួយ​ត្រូវ​បាន​បង្កើត​ឡើង​ដើម្បី​ជួយ​ដល់ SME នោះ។

លោក​ថ្លែង​ថា៖ «កន្លង​មក​រដ្ឋាភិបាល​បាន​ការ​លើក​លែង​និង​ការ​គាំទ្រ​ច្រើន​ដល់​ឧស្សាហកម្ម​ធំៗ ប៉ុន្តែ​មិន​មាន​គោល​នយោបាយ​លើក​ទឹក​ចិត្ត​អ្នក​ផលិត​ក្នុង​ស្រុក​តូចៗ​នេះ​ទេ»។

តាម​លោក សុន ឆ័យ SME នៅ​កម្ពុជា កំពុង​ផ្តល់​ការងារ​ដល់​ប្រជាជន​ជាង ៣ លាន​នាក់​ខណៈ​ឧស្សាហ​កម្ម​ធំៗ​ផ្តល់​ការងារ​ត្រឹម ៦ សែន​នាក់៕

អត្ថបទគួរចាប់អារម្មណ៍