.jpg)
សកម្មភាពប្រជាជនកំពុងជីកកកាយរករ៉ែមាសនៅភ្នំព្រឹក ខេត្តបាត់ដំបងក្នុងអំឡុងឆ្នាំ ២០១១។ ហេង ជីវ័ន
ភ្នំពេញ: ក្រសួងរ៉ែ និងថាមពលបានប្រកាសថា រដ្ឋាភិបាលនឹងផ្តល់អាជ្ញាប័ណ្ណឲ្យក្រុមហ៊ុន ២ ក្នុងចំណោមក្រុមហ៊ុនចំនួន ៦ ដែលដាក់ពាក្យស្នើសុំអាជ្ញាប័ណ្ណសិក្សាស្វែងរករ៉ែលោហៈនៅកម្ពុជា។ នេះបើយោងតាមលោក យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែ។
លោក យស មុនីរ៉ាត់ បានប្រាប់ភ្នំពេញប៉ុស្តិ៍ថា ក្រុមហ៊ុន H.T Kuang Ye Cambodia Development Co., Ltd និង Cambodia K88 Industry Co.,Ltd ត្រូវបានជ្រើសរើសជាក្រុមហ៊ុនដែលមានលក្ខណសម្បត្តិគ្រប់គ្រាន់ និងមានសិទ្ធិអាទិភាព ដើម្បីបន្តអនុវត្តន៍នីតិវិធីក្នុងការទទួលបានអាជ្ញាប័ណ្ណស្វែងរកធនធានរ៉ែនៅកម្ពុជា។ លោកបន្តថា ប៉ុន្តែក្រសួងតម្រូវឲ្យក្រុមហ៊ុនត្រូវដាក់ឯកសារពាក់ព័ន្ធមួយចំនួន។
លោកបន្តថា ក្រសួងនឹងធ្វើការពិភាក្សាលម្អិតជាមួយក្រុមហ៊ុនទាំង ២ នេះ។ បើក្រុមហ៊ុនទាំងនេះមានលក្ខណសម្បត្តិគ្រប់គ្រាន់ ពួកគេនឹងទទួលបានអាជ្ញាប័ណ្ណពីក្រសួង។ លោកថ្លែងថា៖ «នេះជាការប្រកាសព័ត៌មានបង្ហាញថា ក្រុមហ៊ុនត្រូវបានជ្រើសរើស ហើយជំហានបន្ទាប់ក្រសួងតម្រូវឲ្យក្រុមហ៊ុនធ្វើផែនការមេ និងធ្វើការសិក្សាអំពីផលប៉ះពាល់បរិស្ថានផងដែរ»។
បើយោងតាមសេចក្តីប្រកាសព័ត៌មានរបស់ក្រសួង ប្រសិនបើក្រុមហ៊ុន H.T Kuang Ye Cambodia Development ទទួលបានអាជ្ញាប័ណ្ណ ក្រុមហ៊ុននេះនឹងធ្វើការសិក្សាស្វែងរករ៉ែទង់ដែងនៅតំបន់ព្រែកកេងកង ស្រុកថាឡាបរីវ៉ាត់ ខេត្តស្ទឹងត្រែងលើផ្ទៃដីទំហំ ៤៩,២៥ គីឡូម៉ែត្រក្រឡា។ ចំណែកក្រុមហ៊ុន Cambodia K88 Industry Co នឹងធ្វើការសិក្សាស្វែងរករ៉ែលោហៈនៅតំបន់អូរចុស ឃុំកំពង់ចាម ស្រុកសំបូរ ខេត្តក្រចេះ និងឃុំសុចិត្រ និងឃុំមានរិទ្ធិ ស្រុកសណ្តាន់ ខេត្តកំពង់ធំ លើផ្ទៃដី ៩៣,៩៤ គីឡូម៉ែត្រក្រឡា។
យោងតាមលោក យស មុនីរ៉ាត់ បច្ចុប្បន្នក្រសួងបានផ្តល់អាជ្ញាប័ណ្ណសិក្សាស្វែងរករ៉ែលោហៈចំនួន ៣៩ នៅទូទាំងប្រទេស។
បច្ចុប្បន្នក្រុមហ៊ុន Emerald Resources NL ដែលជាក្រុមហ៊ុនចុះបញ្ជីនៅផ្សារហ៊ុនអូស្ត្រាលីកំពុងធ្វើការអភិវឌ្ឍគម្រោងរ៉ែមាសនៅអូរខ្វាវក្នុងខេត្តមណ្ឌលគិរី។ ក្រុមហ៊ុននេះរំពឹងថានឹងទាញយកមាសលើកដំបូងនៅឆ្នាំ ២០២០ នេះ។ ក្រុមហ៊ុននេះបានចេញផ្សាយការសិក្សាលទ្ធភាពច្បាស់លាស់របស់ខ្លួនកាលពីខែឧសភា ឆ្នាំ ២០១៧ ដែលបង្ហាញថា គម្រោងរ៉ែមាសអូរខ្វាវអាចផលិតបានមាស ១០៦ ០០០ អោនស៍ក្នុង ១ ឆ្នាំជាមធ្យម។
ក្រុមហ៊ុននេះប៉ាន់ប្រមាណថា ការទាញយករ៉ែដំបូងនឹងមានសកម្មភាពរយៈពេល ៧ ឆ្នាំ ខណៈទុនវិនិយោគមានចំនួន ៩៨ លានដុល្លារ។
កាលពីខែមករា ឆ្នាំ ២០២០ ក្រុមហ៊ុននេះបានប្រកាសផែនការប្រមូលមូលនិធិ ៧៥ លានដុល្លារអូស្ត្រាលីសម្រាប់គម្រោងរ៉ែមាសអូរខ្វាវរបស់ខ្លួននៅកម្ពុជា ជាមួយនឹងការដាក់លក់ភាគហ៊ុនសរុប ១ ៨៧៥ លានភាគហ៊ុន។ ក្រុមហ៊ុននេះក៏បានកំណត់ពេលវេលានៅថ្ងៃទី ១៩ ខែមីនា ដើម្បីបញ្ចប់ការដាក់លក់នេះ ដោយការដាក់លក់លើកទី ២ នឹងធ្វើឡើងនៅមុខភាគទុនិកក្នុងកិច្ចប្រជុំរបស់ខ្លួននៅថ្ងៃទី ១៣ ខែមីនា៕
