.jpg)
ភ្នំពេញ: ក្រសួងពាណិជ្ជកម្មបានអំពាវនាវឲ្យអ្នកនាំចេញ និងនាំចូលទំនិញមកដាក់ពាក្យស្នើសុំបណ្ណសម្គាស់អ្នកតំណាងស្របច្បាប់ក្នុងគោលបំណងដើម្បីគ្រប់គ្រង ពង្រឹងសមត្ថភាពអ្នកតំណាងស្របច្បាប់ និងគាំទ្រដល់ការផ្តល់សេវានាំចេញ-នាំចូលរបស់ក្រសួង។ នេះបើតាមសេចក្តីប្រកាសព័ត៌មានរបស់ក្រសួងដែលចេញផ្សាយកាលពីថ្ងៃចន្ទ។
សេចក្តីប្រកាសព័ត៌មានឲ្យដឹងថា នាយកដ្ឋាននាំចេញ-នាំចូលនៃអគ្គនាយកដ្ឋានសេវាពាណិជ្ជកម្មនឹងចាប់ផ្តើមទទួលពាក្យចុះឈ្មោះស្នើសុំបណ្ណសម្គាល់អ្នកតំណាងស្របច្បាប់ក្នុងការស្នើសុំឯកសារនាំចេញនាំចូលចាប់ពីថ្ងៃទី ៩ ខែមីនាដល់ខែថ្ងៃទី ៣០ ខែ មេសា ឆ្នាំ ២០២០។
សេចក្តីប្រកាសព័ត៌មានបន្តថា៖ «អ្នកដែលមានបំណងក្លាយជាអ្នកតំណាងស្របច្បាប់ក្នុងការស្នើសុំឯកសារនាំចេញនាំចូលអាចទាញយកពាក្យស្នើសុំចុះឈ្មោះ និងឯកសារផ្សេងៗតាមរយៈវេបសាយ www.co.moc.gov.kh»។
ក្រសួងពាណិជ្ជកម្មតម្រូវឲ្យអ្នកតំណាងស្របច្បាប់ស្នើសុំឯកសារនាំចេញ-នាំចូលមកនាយកដ្ឋាននាំចេញ-នាំចូលនៃអគ្គនាយកដ្ឋានសេវាពាណិជ្ជកម្ម ត្រូវមានបណ្ណសម្គាល់អ្នកតំណាងស្របច្បាប់ក្នុងការស្នើសុំឯកសារនាំចេញ-នាំចូលត្រឹមថ្ងៃទី ១ ខែឧសភា ឆ្នាំនេះតទៅ។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា វិធានការនេះនឹងជួយបង្កើនប្រសិទ្ធភាពការងារក្នុងការគ្រប់គ្រងទិន្នន័យប័ណ្ណសម្គាល់អ្នកតំណាងស្របច្បាប់ក្នុងការស្នើសុំឯកសារនាំចេញនាំចូលប្រកបដោយតម្លាភាព។
លោកបានថ្លែងថា៖ «វានឹងជួយទប់ស្កាត់មិនឲ្យការបន្លំយកឈ្មោះក្រុមហ៊ុនពីកម្ពុជាក្នុងការនាំចេញទំនិញដោយទទួលបានការអនុគ្រោះពន្ធនានា ជាពិសេសធ្វើឲ្យក្រសួងមានភាពងាយស្រួលក្នុងការគ្រប់គ្រងក្រុមហ៊ុនតំណាងស្របច្បាប់ផងដែរ»៕
