.jpg)
ថ្នាក់ដឹកនាំក្រុមហ៊ុនចុចប៊ូតុងបើកការដ្ឋានសាងសង់ ហ្គ្រេន ភ្នំពេញស៊ីធី។ សហការី
ភ្នំពេញៈ បន្ទាប់ពីទទួលបានសិទ្ធិគ្រប់គ្រងទាំងស្រុងលើគម្រោងអភិវឌ្ឍន៍ក្រុងរណប ហ្គ្រេន ភ្នំពេញស៊ីធី ពីក្រុមហ៊ុន ហ្គ្រេន ភ្នំពេញ អ៊ីនធើណេសិនណល ក្រុមហ៊ុន ជីប ម៉ុង លែន កាលពីថ្ងៃចន្ទម្សិលមិញបានធ្វើពិធីបើកការដ្ឋានសាងសង់គម្រោងនេះជាផ្លូវការហើយជាមួយនឹងចក្ខុវិស័យប្រែក្លាយទីនោះទៅជាក្រុងរណបប្រណីតបំផុតនៅកម្ពុជា។
ហ្គ្រេន ភ្នំពេញស៊ីធី គឺជាគម្រោងអភិវឌ្ឍន៍ក្រុងរណបដ៏ធំមួយស្ថិតនៅភាគខាងជើងរាជធានីភ្នំពេញលើផ្ទៃដី ២៦០ ហិកតានៅក្នុងខណ្ឌសែនសុខ។ គម្រោងនេះបានចាប់ផ្ដើមអភិវឌ្ឍដំបូងកាលពីជាង ១០ ឆ្នាំមុនក្រោមការវិនិយោគរួមគ្នារវាងក្រុមហ៊ុនក្នុងស្រុក YLP Group Co., Ltd និងក្រុមហ៊ុន Indonesia''s Ciputra Group លើទុនវិនិយោគដំបូង ៦០០ លានដុល្លារ។
បន្ទាប់ពីទុកចោលមួយរយៈគម្រោងនេះត្រូវបានក្រុមហ៊ុន ជីប ម៉ុង លែន ដែលជាបុត្រសម្ព័ន្ធរបស់ក្រុមហ៊ុន ជីប ម៉ុង គ្រុប ទិញយកមកអភិវឌ្ឍបន្តពីក្រុមហ៊ុន ហ្គ្រេន ភ្នំពេញអ៊ីនធើណេសិនណល កាលពីអំឡុងខែតុលា ឆ្នាំ ២០១៩ ក្នុងតម្លៃបិទជិត។
ជីប ម៉ុង គ្រុប គឺជាក្រុមហ៊ុនដែលកំពុងបើកដំណើរការអាជីវកម្មជាច្រើននៅកម្ពុជាមានដូចជា រោងចក្រផលិតស្រាបៀរកម្ពុជា រោងចក្រផលិតស៊ីម៉ងត៍ ក្រុមហ៊ុននាំចូលសម្ភារសំណង់ មជ្ឈមណ្ឌលពាណិជ្ជកម្ម និងធនាគារ។
លោក លាង ហេនរី អគ្គនាយកក្រុមហ៊ុន ជីប ម៉ុង លែន កាលពីថ្ងៃចន្ទបាននិយាយថា ទោះបីក្រុមហ៊ុនទើបបើកការដ្ឋានសាងសង់នៅថ្ងៃនេះ ប៉ុន្តែជាក់ស្តែងចាប់តាំងពីទទួលបានសិទ្ធិគ្រប់គ្រងទាំងស្រុងកាលពីខែតុលា ឆ្នាំ ២០១៩ គឺក្រុមហ៊ុនបានធ្វើការងារជាច្រើនសម្រាប់គម្រោងនេះ ជាពិសេសការសិក្សាដ៏លម្អិតជាមួយក្រុមវិស្វករ និងក្រុមស្ថាបត្យករទាំងក្នុងស្រុក និងបរទេសដើម្បីរៀបចំជា Master Plan ដ៏ល្អសម្រាប់ក្រុងរណបនេះ ខណៈបច្ចុប្បន្នក្រុមហ៊ុនបានកែលម្អ និងអភិវឌ្ឍប្រព័ន្ធហេដ្ឋារចនាសម្ព័ន្ធជាច្រើនរួចហើយ។
លោកបានថ្លែងថា៖ «ក្រុមហ៊ុនមានបំណងប្រែក្លាយ ហ្គ្រេន ភ្នំពេញស៊ីធី ឲ្យទៅជាទីក្រុងដ៏អស្ចារ្យដែលមានលំនៅឋាន មជ្ឈមណ្ឌលពាណិជ្ជកម្ម កន្លែងលក់ទំនិញដ៏រស់រវើក ព្រមជាមួយនឹងការប្រែក្លាយទីនេះឲ្យទៅជាទីក្រុងបៃតង។ ហ្គ្រេន ភ្នំពេញស៊ីធី ប្រៀបបីដូចជា ទីក្រុងក្នុងទីក្រុង និងជាកន្លែងដែលមានសក្តានុពលក្នុងរាជធានីភ្នំពេញ»។
បើតាមលោក ហេនរី ការសាងសង់គម្រោងនេះនឹងត្រូវចែកចេញជាច្រើនដំណាក់កាលដោយដំណាក់កាលទី ១ នឹងសង់លើផ្ទៃដីទំហំ ៥០ ហិកតា ខណៈតម្លៃមិនត្រូវបង្ហាញឲ្យដឹងទេ។ នេះជាគម្រោងអភិវឌ្ឍន៍ទី ៨ របស់ក្រុមហ៊ុន ជីប ម៉ុង លែន។
លោកថ្លែងថា៖ «ទោះក្នុងស្ថានភាពបែបណាក៏យើងនៅតែបន្តសាងសង់លំនៅឋានដែលមានគុណភាពខ្ពស់បំផុត។ យើងមិនដើរផ្លូវកាត់សាងសង់អ្វីដែលលំៗដើម្បីឲ្យតែលក់ចេញទេ»។
សេចក្តីប្រកាសព័ត៌មានរបស់ក្រុមហ៊ុនបានឲ្យដឹងថា ក្រុមហ៊ុន ជីប ម៉ុងលែន នឹងសាងសង់លំនៅឋានម៉ូដថ្មីដែលមិនធ្លាប់មានពីមុន ដើម្បីឆ្លើយតបនឹងតម្រូវការរបស់អតិថិជន និងប្រណីតភាពរបស់គម្រោង។ លើសពីនេះ មជ្ឈមណ្ឌលពាណិជ្ជកម្ម និងមជ្ឈមណ្ឌលកីឡាដ៏ធំក៏នឹងមានវត្តមាននៅគម្រោង ហ្គ្រេន ភ្នំពេញស៊ីធី អមជាមួយនឹងទីលានវាយកូនហ្គោល ហ្គ្រេនភ្នំពេញស៊ីធី ផងដែរ។
លោក សំ សុខនឿន អគ្គនាយកក្រុមហ៊ុនអចលនទ្រព្យ KW សែនសុខ បានប្រាប់ភ្នំពេញប៉ុស្តិ៍ថា បន្តិចម្តងៗតំបន់ក្រុងរណប ហ្គ្រេន ភ្នំពេញស៊ីធី កំពុងក្លាយជាកន្លែងដែលមានទីផ្សារអចលនទ្រព្យល្អជាងគេនៅក្នុងខណ្ឌសែនសុខ ហើយនឹងមានមជ្ឈមណ្ឌលសេវាកម្មចម្រុះជាច្រើនបែរឆ្ពោះទៅកាន់តំបន់នោះ។
លោកបន្តថា ភាពល្អប្រសើរនៃស្ថានភាពភូមិសាស្ត្រ និងហេដ្ឋារចនាសម្ព័ន្ធ បានធ្វើឲ្យតម្លៃអចលនទ្រព្យនៅទីនោះកើនឡើងជាលំដាប់។ បច្ចុប្បន្នដីនៅក្នុងតំបន់ ហ្គ្រេន ភ្នំពេញស៊ីធី អាចមានតម្លៃចន្លោះពី ៣៥០-៨០០ ដុល្លារ ក្នុង ១ ម៉ែត្រការ៉េ។
លោកបញ្ជាក់ថា៖ «ហ្គ្រេន ភ្នំពេញ ស៊ីធី បានក្លាយជាតំបន់ល្អឥតខ្ចោះសម្រាប់លំនៅឋានប្រណីត និងមានតម្លៃខ្ពស់ក្នុងខណ្ឌសែនសុខ ហើយនៅពេលខាងមុខ ទីនោះក៏នឹងក្លាយជាកន្លែងដែលមានសេវាកម្មចម្រុះជាច្រើនទៀតផងដែរ»។
លោកបន្ថែមថា សក្តានុពលរបស់ទីតាំងនឹងធ្វើឲ្យគម្រោងនេះទទួលបានជោគជ័យនៅក្នុងរយៈពេលដ៏ខ្លីបំផុត ខណៈតាមផែនការលំនៅឋានក្នុងគម្រោងនេះនឹងចាប់ផ្តើមបើកលក់ក្នុងខែកក្កដាខាងមុខ៕
