ភ្នំពេញៈ ក្នុងរយៈពេល ១ ខែក្នុងខែមេសា ឆ្នាំ ២០១៨ ក្រុមប្រឹក្សាអភិវឌ្ឍន៍កម្ពុជាបានចេញវិញ្ញាបនបត្រចុះបញ្ជីជាស្ថាពរដល់ក្រុមហ៊ុនវិនិយោគបរទេសចំនួន ៩ ក្រុមហ៊ុន ដែលមានទុនវិនិយោគសរុបជាង ៣១ លានដុល្លារ។ នេះបើយោងតាមការចេញផ្សាយព័ត៌មានរបស់ក្រុមប្រឹក្សាអភិវឌ្ឍន៍កម្ពុជានៅលើទំព័រហ្វេសប៊ុករបស់ខ្លួននៅក្នុងខែមេសា។
យោងតាមការចេញផ្សាយនេះការវិនិយោគភាគច្រើនជារោងចក្រកាត់ដេរសម្លៀកបំពាក់ និងស្បែកជើងដែលនៅក្នុងគម្រោងវិនិយោគទាំងអស់នេះបានអះអាងពីការផ្តល់ការងារសរុបចំនួនជាង ១ ម៉ឺននាក់។
យោងតាមសេចក្តីប្រកាសនៅលើទំព័រហ្វេសប៊ុកចំនួនគម្រោងដែលត្រូវបានអនុម័តដែលភ្នំពេញប៉ុស្តិ៍ប្រមូលនៅក្នុងខែមេសាបានឲ្យដឹងថា តាមសំណើសុំវិនិយោគរបស់ក្រុមហ៊ុនគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានសម្រេចចេញវិញ្ញាបនបត្រចុះបញ្ជីជាស្ថាពរដល់ក្រុមហ៊ុនចំនួន ៩ រួមមាន គម្រោងបង្កើតរោងចក្រកាត់ដេរសម្លៀកបំពាក់ និងស្បែកជើងចំនួន ៥ មានទីតាំងនៅភ្នំពេញ និងរោងចក្រផលិតកាបូប និងសម្លៀកបំពាក់ ៤ ផ្សេងទៀតមានទីតាំងវិនិយោគស្ថិតក្នុងខេត្តកណ្តាល តាកែវ និងកំពង់ស្ពឺ។
សេដ្ឋកិច្ចកម្ពុជាពឹងផ្អែកភាគច្រើនបំផុតលើវិស័យកាត់ដេរដែលបានផ្តល់ការងារដល់ប្រជាជនជាង ៧០ ម៉ឺននាក់ និងរកបានចំណូលរាប់ពាន់លានដុល្លារក្នុង ១ ឆ្នាំៗ។
របាយការណ៍ប្រចាំឆ្នាំ ២០១៧ ពីក្រសួងការងារចេញផ្សាយកាលពីខែមីនាឆ្នាំ ២០១៨ បានបង្ហាញថា «សហគ្រាស និងគ្រឹះស្ថាន» កាត់ដេរនៅកម្ពុជាសរុបមាន ១ ១៤៧ ដែលប្រតិបត្តិការកាលពីឆ្នាំ ២០១៧ ប៉ុន្តែចំនួននោះមិនត្រូវគ្នានឹងទិន្នន័យបានពីក្រសួងឧស្សាហកម្ម និងសិប្បកម្មដែលបានចេញផ្សាយរបាយការណ៍ក្នុងខែមីនាដែលបញ្ជាក់ថាមានរោងចក្រកាត់ដេរសរុប ១ ០៣១ នោះទេ។
ក្នុងរយៈពេលថ្មីៗនេះគេសង្កេតឃើញក្រុមប្រឹក្សាអភិវឌ្ឍន៍កម្ពុជាតែងតែផ្សព្វផ្សាយព័ត៌មានស្តីពីការអនុម័តគម្រោងវិនិយោគផ្សេងៗនៅកម្ពុជាដែលពីមុនទិន្នន័យត្រូវបានបង្ហាញតែនៅដំណាច់ឆ្នាំប៉ុណ្ណោះ៕