ភ្នំពេញៈ វិនិយោគិនអាមេរិកនឹងមកស្វែងរកឱកាសវិនិយោគក្នុងវិស័យកសិកម្មនៅកម្ពុជា។ នេះបើតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំនៅកម្ពុជាចេញកាលពីថ្ងៃសុក្រ។
គណៈប្រតិភូតំណាងឲ្យក្រុមហ៊ុនចំនួន ១៦ មកពីអាមេរិកនឹងមកទស្សនកិច្ចដើម្បីសិក្សាស្វែងរកឱកាសវិនិយោគក្នុងវិស័យកសិកម្មនៅកម្ពុជារយៈពេល ២ ថ្ងៃនៅទីក្រុងភ្នំពេញចាប់ពីថ្ងៃទី ៦-៧ ខែកុម្ភៈ។
គណៈប្រតិភូទាំងនោះមកពីក្រុមហ៊ុនអាមេរិកល្បីៗ រួមមាន Walmart, Amazon, IBM, John Deer, Corteva, California Figs, ADM, U.S. Grains Council and Sripipat Engineering។ នេះបើតាមសេចក្តីប្រកាសព័ត៌មាន។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ក្រសួងក៏គ្រោងនឹងជួបពិភាក្សាជាមួយវិនិយោគិនអាមេរិកទាំងនោះនៅថ្ងៃទី ៦ កុម្ភៈផងដែរ។
លោក ងួន សាំង អគ្គនាយកក្រុមហ៊ុន RMA Group ដែលជាក្រុមហ៊ុនធ្វើអាជីវកម្មក្នុងវិស័យយានយន្ត គ្រឿងចក្រធុនធ្ងន់ អាហារ និងភេសជ្ជៈបានឲ្យដឹងថា ការរីកចម្រើនក្នុងវិស័យកសិកម្មកម្ពុជាបានធ្វើឲ្យការលក់ត្រាក់ទ័រម៉ាក John Deer របស់ក្រុមហ៊ុនលោកបានដំណើរការល្អជាធម្មតា។
លោកថ្លែងថា៖ «ក្រុមហ៊ុនខ្ញុំលក់ត្រាក់ទ័របានប្រមាណ ៤០០ គ្រឿងកាលពីឆ្នាំមុន»។ លោកបន្តថា កសិករងាកមកប្រើត្រាក់ទ័រក្នុងវិស័យកសិកម្មជាជាងប្រើសត្វគោ-ក្របី។ លោកបន្តថា៖ «ប្រជាកសិករសព្វថ្ងៃមិនសូវប្រើគោ- ក្របីទេ ពួកគាត់ងាកមកប្រើគោយន្ត និងត្រាក់ទ័រដែលវាជួយសម្រួលដល់ការធ្វើកសិកម្មបានលឿនកាត់បន្ថយកម្លាំងពលកម្ម និងទទួលបានទិន្នផលខ្ពស់»។
លោកប៉ាន់ប្រមាណថា មានការផ្គត់ផ្គង់ត្រាក់ទ័រប្រមាណជា ៣ ០០០ គ្រឿង កាលពីឆ្នាំមុនកើនឡើង ១០ ភាគរយ បើធៀបនឹងឆ្នាំ ២០១៨។ លោកបញ្ជាក់ថា៖ «ខ្ញុំមើលឃើញពីតម្រូវការត្រាក់ទ័រមានការកើនឡើងនៅប៉ុន្មានឆ្នាំចុងក្រោយនេះ ខ្ញុំគិតថាតម្រូវការវានឹងបន្តកើនឡើងបន្ថែមទៀតនៅឆ្នាំនេះ»។
ទំហំពាណិជ្ជកម្មរវាងកម្ពុជា និងអាមេរិកកើនឡើង ៣៨ ភាគរយដែលមានតម្លៃសរុប ៥,៤ ពាន់លានដុល្លារក្នុងរយៈពេល ១១ ខែក្នុងឆ្នាំ ២០១៩ បើធៀបនឹងឆ្នាំ ២០១៨។ នេះបើតាមរបាយការណ៍ពីការិយាល័យជំរឿនសហរដ្ឋអាមេរិក។
ទិន្នន័យបានឲ្យដឹងថា សម្រាប់ការនាំចេញទំនិញពីកម្ពុជាទៅអាមេរិកក្នុងរយៈពេលនេះ មានតម្លៃជាង ៤,៩ ពាន់លានដុល្លារកើនជាង ៤០ ភាគរយ ខណៈការនាំទំនិញពីអាមេរិកមកកម្ពុជាមានតម្លៃជាង ៤៨៤ លានដុល្លារកើន ២០ ភាគរយ៕LA